កំពង់ស្ពឺ៖ ប្រជាពលរដ្ឋរស់នៅក្នុងសង្កាត់រការធំ នៃក្រុងច្បារមន ខេត្តកំពង់ស្ពឺ បានស្នើឱ្យអាជ្ញាធរមូលដ្ឋានឱ្យជួយជួសជុលផ្លូវមួយខ្សែប្រវែងជាង ១គីឡូម៉ែត្រ ដែលរងការខូចខាត ពិបាកក្នុងការធ្វើដំណើរយ៉ាងខ្លាំង។ ផ្លូវមួយខ្សែនេះតភ្ជាប់ពីភូមិទួលធ្នង់ទៅភូមិខោប ស្ថិតក្នុងសង្កាត់រការធំ ក្រុងច្បារមន ខេត្តកំពង់ស្ពឺ។ លោក យ៉េត សារ៉ុម អាយុ៥០ឆ្នាំ រស់នៅភូមិទួលធ្នង់ សង្កាត់រការ ក្រុងច្បារមន ខេត្តកំពង់ស្ពឺ បានលើកឡើងថា ផ្លូវខាងលើបានរងការខូចខាតជាយូរខែណាស់មកហើយ ដែលបច្ចុប្បន្នផ្លូវនេះស្ទើរតែក្លាយទៅជាថ្លុកក្របីដេកបានទៅហើយ។ លោកថា អាជ្ញាធរ និងជំនាញពាក់ព័ន្ធខ្លះបានធ្វើដំណើរឆ្លងកាត់ដែរ តែហាក់មើលរំលង មិនខ្វល់ពីការខូចខាតនេះឡើយ ដោយបណ្តែតបណ្តោយឱ្យអ្នកធ្វើដំណើរ និងប្រជាពលរដ្ឋរស់នៅតំបន់នោះ ពិសេសសិស្សានុសិស្សាធ្វើដំណើរទៅសាលាលើកំណាត់ផ្លូវដែលរងការខូចខាតនេះ ខ្លះត្រូវបានបប្រឡាក់ដោយទឹកភក់ដោយសារតែរអិលដួលម៉ូតូ កង់ និងខ្លះត្រូវបាចសាចលើដោយសាររថយន្ត។ ជាមួយគ្នានេះ លោក ហេង សារឹម អាយុ៤៦ឆ្នាំ ពលរដ្ឋរស់នៅក្នុងភូមិជាមួយគ្នាក៏បានលើកឡើងស្រដៀងគ្នាថា ផ្លូវមួយខ្សែនេះ ជាផ្លូវសកម្មដែលរថយន្តដឹកកម្មករ កម្មការិនី រោងចក្រឆ្លងកាត់ ហើយក៏ជាផ្លូវដែលសិស្សឆ្លងកាត់ទៅសាលាច្រើនផងដែរ។ មួយវិញទៀតក៏ស្ថិតនៅមិនឆ្ងាយពីសាលាសង្កាត់រការធំប៉ុន្មានដែរ មិនគួរណាមើលមិនឃើញពីការលំបាកនោះទេ។ លោកថា ពេលគ្មានភ្លៀងគឺដីហុយងងឹតមេឃ តែបើមានភ្លៀងវិញគឺ រអិល និងខ្លះក្លាយជាថ្លុកក្របីទៅហើយ។ ដោយភាពសកម្មនៃការចរាចរណ៍លើកំណាត់ផ្លូវមួយខ្សែនេះ គួរណាស់តែអាជ្ញាធរមូលដ្ឋានមើលឃើញពីការលំបាក និងផលប៉ះពាល់ពេលធ្វើដំណើរឆ្លងកាត់ផ្លូវនេះ។ លោក ហេង សារឹម បានបន្តឱ្យដឹងថា កាលពីអំឡុងឆ្នាំ២០១៩~២០២០ ផ្លូវមួយខ្សែនេះ ត្រូវអាជ្ញាធរក្រុងច្បារមនធ្វើការជួសជុលម្តងរួចមកហើយដោយមានដាក់លូផងដែរ ប៉ុន្តែក៏បាត់ទៅវិញសូន្យឈឹងរហូតមានដល់មានការផ្លាស់ប្តូរអភិបាលក្រុង។ ក្រោយផ្លាស់ប្តូរ ផ្លូវមួយខ្សែនេះក៏ចេះតែខូចទៅៗ ទោះជាពលរដ្ឋត្អូញត្អែរថាពិបាកធ្វើដំណើរ និងសុំឱ្យមានការជួសជុលសម្រួលចរាចរណ៍ឡើងវិញយ៉ាងណាក៏ដោយ។ ពាក់ព័ន្ធនឹងកង្វល់ពលរដ្ឋនេះ លោក ទឹម ផានូ អភិបាលក្រុងច្បារមន បានឱ្យដឹងនៅព្រឹកថ្ងៃទី១៧ ខែតុលា ឆ្នាំ២០២៤ ថា ផ្លូវមួយខ្សែខាងលើនេះជាគម្រោងអភិវឌ្ឍន៍របស់រដ្ឋបាលខេត្តជំហ៊ានទី២។ ផ្លូវនេះខូចខាត និងពិបាកធ្វើដំណើរឆ្លងកាត់ ហើយក៏បានរាយការណ៍ជូនទៅរដ្ឋបាលខេត្តរួចហើយដែរ។ លោកអភិបាលក្រុង បានបន្ថែមទៀតថា លោកមិនច្បាស់នោះទេ ថានឹងត្រូវធ្វើនៅពេលណា ប៉ុន្តែវាស្ថិតក្នុងជំហ៊ានអភិវឌ្ឍន៍របស់រដ្ឋបាលខេត្តមួយឆ្នាំម្តង។ ម្យ៉ាងវិញទៀតផ្លូវមួយខ្សែនេះក៏បានធ្វើនៅក្នុងឆ្នាំ២០២៣ ម្តងរួចមកហើយ អញ្ចឹងក្នុងឆ្នាំ២០២៤ ប្រហែលជាអាចធ្វើបន្តទៀត៕