យល់ដឹងពីគោលការណ៍សុវត្ថិភាព ព្រមទាំងការរៀបចំខ្លួនមុនពេលចេញដំណើរ និងការប្រើប្រាស់ផ្លូវល្បឿនលឿន សូមបងប្អូនប្រជាពលរដ្ឋ ជាអ្នកបើកបរគ្រប់រូប ត្រូវពិនិត្យមើលយានយន្តរបស់ខ្លួនឱ្យបានត្រឹមត្រូវមុនពេលចេញដំណើរ និងគោរពតាមផ្លាកសញ្ញា និងគំនូសសញ្ញានៅតាមដងផ្លូវ ព្រមទាំងលក្ខខណ្ឌនៃការបើកបរលើផ្លូវល្បឿនលឿនផ្សេងៗទៀតឱ្យបានខ្ជាប់ខ្ជួន ដើម្បីសុវត្ថិភាពក្នុងការធ្វើដំណើរទាំងអស់គ្នា។ ក្នុងការប្រើប្រាស់ផ្លូវល្បឿនលឿន បងប្អូនប្រជាពលរដ្ឋត្រូវឈ្វេងយល់ពីគន្លងដូចខាងក្រោម៖ (១) គន្លងធម្មតា តម្រូវឱ្យយកកាតនៅច្រកចូល និងបង់សាច់ប្រាក់នៅច្រកចេញ។ ក្នុងករណីមានចរាចរណ៍មមាញឹក បងប្អូន អាចប្រឈមនឹងការរង់ចាំយូរនៅពេលទូទាត់ និងអាប់សាច់ប្រាក់នៅច្រកចេញ។ (២) គន្លងស្វ័យប្រវត្តិ ETC ជាគន្លងអាទិភាព នៅខាងឆ្វេងបង្អស់ អនុញ្ញាតឱ្យបងប្អូនចេញចូលបានលឿនរហ័ស ដោយមិនបាច់រង់ចាំយូរ។ ដើម្បីប្រើប្រាស់គន្លង ETC នេះម្ចាស់យានយន្តត្រូវបំពាក់ឧបករណ៍ ETC នៅអគាររដ្ឋបាល គ្រប់ច្រកចូលផ្លូវល្បឿនលឿន ឬ នៅមណ្ឌលផ្តល់សេវាសាធារណៈ ទីស្តីការក្រសួងសាធារណការ និងដឹកជញ្ជូន និងមណ្ឌលផ្តល់សេវាសាធារណៈ នៅផ្សារទំនើប AEON Mall មានជ័យ។ សូមចូលទៅកាន់គេហទំព័រ ew.mpwt.gov.kh ដើម្បីដឹងពីវិធីបញ្ចូលសមតុល្យ និងពិនិត្យសមតុល្យទឹកប្រាក់ដែលបានបញ្ចូល។ ការដែលបងប្អូនបានស្វែងយល់បន្ថែមពីគន្លងចេញចូលរួមនឹងការគោរពច្បាប់ស្តីពីចរាចរណ៍ផ្លូវគោក ការគោរពលក្ខខណ្ឌនៃការប្រើប្រាស់ផ្លូវល្បឿនលឿន និងការចេះយោគយល់អធ្យាស្រ័យគ្នា គឺពិតជាអាចចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ និងបង្ការការកកស្ទះបានមួយកម្រិតធំ បើទោះជាស្ថិតក្នុងកាលៈទេសៈដែលចរាចរណ៍អាចនឹងមមាញឹកខ្លាំងនៅក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ នេះក៏ដោយ។ សូមជូនពរដល់បងប្អូនប្រជាពលរដ្ឋគ្រប់រូប សូមមានសុខភាពល្អបរិបូរណ៍ ទទួលបានសេចក្តីសុខចម្រុងចម្រើនក្រោមម្លប់នៃសន្តិភាព មានសុខសុវត្ថិភាពក្នុងការធ្វើដំណើរទាំងទីជិតទីឆ្ងាយ និងសមប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube