និស្សិតជ័យលាភីអាហារូបករណ៍សិក្សានៅប្រទេសជប៉ុន ទទួលអនុសាសន៍ផ្តាំផ្ញើល្អៗ មុនចេញដំណើរទៅបន្តការសិក្សា ទីស្តីការក្រសួង៖ នាព្រឹកថ្ងៃចន្ទ ទី១៦ ខែកញ្ញា ឆ្នាំ២០២៤ ឯកឧត្តម ហេង ណន រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបសំណេះសំណាលជាមួយនិស្សិតជ័យលាភីអាហារូបករណ៍ចំនួន១២រូបទៅសិក្សានៅប្រទេសជប៉ុន ក្រោមកម្មវិធីអ្នកដឹកនាំសាកល SDGs (JICA SDGs Global Leader, JFY2024) និងកម្មវិធីអាហាររូបករណ៍របស់ JICA មួយចំនួនផ្សេងទៀត ដោយមានការចូលរួមពីសំណាក់ថ្នាក់ដឹកនាំ និងមន្ត្រីពាក់ព័ន្ធជាច្រើនរូបផងដែរ។ ជំនួបនេះ ធ្វើឡើងដើម្បីចែករំលែកអំពីបទពិសោធន៍ អនុសាសន៍ និងការអនុវត្តល្អៗ ដែលជាទស្សនទានដ៏មានតម្លៃបំផុតសម្រាប់ប្អូនៗនិស្សិត ក្នុងការប្រណិប័តន៍ខ្លួនក្នុងនាមជានិស្សិតអាហារូបករណ៍យកទៅផ្សព្វផ្សាយវប្បធម៌ អរិយធម៌ និងការអភិវឌ្ឍរបស់ជាតិ ក្នុងគោលបំណងឱ្យពិភពលោកបានដឹងបានយល់អំពីប្រទេសកម្ពុជាកាន់តែច្បាស់។ បន្ថែមពីនេះឯកឧត្តមរដ្ឋលេខាធិការ ក៏បានលើកឡើងអំពីសមិទ្ធផលសំខាន់ៗ និងការងារជាច្រើនដែលក្រសួង ក្នុងនាមជាសេនាធិការរបស់រាជរដ្ឋាភិបាល ដែលបាន និងកំពុងអនុវត្តលើវិស័យសាធារណការ និងដឹកជញ្ជូននៅកម្ពុជា។ ថ្លែងក្នុងឱកាសនោះ ឯកឧត្តមរដ្ឋលេខាធិការ បានចូលរួមអបអរសាទរ កោតសរសើរចំពោះមន្ត្រីរាជការនិស្សិតជ័យលាភីទាំងអស់ និងបានពាំនាំនូវការផ្ដាំផ្ញើសាកសួរសុខទុក្ខពីសំណាក់ ឯកឧត្តមរដ្ឋមន្ត្រី ក៏ដូចជាជំរុញលើកទឹកចិត្តឱ្យនិស្សិតទាំងអស់ផ្ដោតសំខាន់លើការខិតខំប្រឹងប្រែងរៀនសូត្រទាំងនៅក្នុងសាលា ទាំងការស្វែងយល់ចំណេះដឹងបន្ថែមពីមជ្ឈដ្ឋានខាងក្រៅឱ្យអស់ពីលទ្ធភាព និងសមត្ថភាពដែលខ្លួនមាន ដើម្បីទទួលបានលទ្ធផលល្អប្រសើរ ក្លាយជាទំពាំងដ៏ល្អ ដែលជាផ្នែកមួយដ៏សំខាន់ចូលរួមចំណែកកសាងប្រទេសជាតិ ជាមួយរាជរដ្ឋាភិបាល នៅពេលវិលត្រឡប់មកមាតុប្រទេសវិញ។ សូមជម្រាបដែរថា៖ និស្សិតជ័យលាភីអាហារូបករណ៍ទាំង ១២ រូប នឹងត្រូវបន្ដការសិក្សាថ្នាក់បណ្ឌិត និងអនុបណ្ឌិត នៅប្រទេសជប៉ុន។ ក្នុងនោះ មានមន្ត្រីរាជការមកពី ក្រសួងសាធារណការ និងដឹកជញ្ជូន ក្រសួងអប់រំ យុវជន និងកីឡា ក្រសួងសុខាភិបាល និងនិស្សិតមកពីសកលវិទ្យាល័យនានា ដែលនឹងត្រូវបន្តសិក្សាលើមុខជំនាញ រួមមាន៖ ICT នៅក្នុងការអប់រំ ការអប់រំសុខភាព ចិត្តវិទ្យានៃការអប់រំ សិក្សាសង្គម រដ្ឋបាលសាធារណៈ វេជ្ជសាស្ត្រជំងឺក្រពេញ និងមេតាប៉ូលីស វិធីសាស្ត្រនៃការញែកខនិជ និងវិស្វកម្មសំណង់ស៊ីវិល៕