ចូលរួមវេទិកាផ្សព្វផ្សាយស្តីពីការអនុវត្តការងារគណនេយ្យភាពសង្គម ដើម្បីលើកកម្ពស់ការផ្តល់សេវានៅរដ្ឋបាលមូលដ្ឋានឱ្យកាន់តែប្រសើរឡើងប្រកបដោយគុណភាព ប្រសិទ្ធភាព តម្លាភាព និងគណនេយ្យភាព រាជធានីភ្នំពេញ៖ ថ្ងៃសុក្រ ទី២៩ ខែមីនា ឆ្នាំ២០២៤ ឯកឧត្តម ចៅ សុភៈភិបាល អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការនិងដឹកជញ្ជូន និងជាសមាជិក គ.គ.អ.ស បានចូលរួមវេទិកាផ្សព្វផ្សាយស្តីពីការអនុវត្តការងារគណនេយ្យភាពសង្គម (Social Accountability Forum) ដែលរៀបចំដោយគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ក្នុងគោលបំណងផ្សព្វផ្សាយ និងបង្ហាញដល់សាធារណជនអំពីដំណើរការអនុវត្តសកម្មភាពគណនេយ្យភាពសង្គម និងបង្ហាញពីសមិទ្ធផលសម្រេចបាន ក្រោមកិច្ចខិតខំប្រឹងប្រែងរបស់ក្រសួង-ស្ថាប័ន និងអង្គការសង្គមស៊ីវិលពាក់ព័ន្ធ តាមរយៈការគាំទ្រថវិកាដោយរាជរដ្ឋាភិបាលកម្ពុជា និងអង្គការដៃគូនានា។ សូមជម្រាបជូនថា បច្ចុប្បន្នអគ្គនាយកដ្ឋានប្រព័ន្ធចម្រោះទឹកកខ្វក់ បានបញ្ចូលការងារលើកកម្ពស់ការចូលរួមរបស់ប្រជាពលរដ្ឋ ក្នុងដំណើរការអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្រោមហិរញ្ញប្បទានរបស់ធនាគារពិភពលោក សំដៅលើកកម្ពស់ការចូលរួមរបស់ប្រជាពលរដ្ឋដែលរស់នៅក្នុងតំបន់អនុវត្តគម្រោង ដើម្បីចូលរួមផ្តល់មតិយោបល់ត្រឡប់ (Feedback) លើការផ្តល់សេវាកម្មទឹកកខ្វក់ និងឈានដល់ការបង្កើតផែនការសកម្មភាពរួម (ដែលហៅកាត់ថាJAP) ក្នុងការលើកកម្ពស់គុណភាពសេវារបស់អង្គភាពគ្រប់គ្រងប្រព័ន្ធចម្រោះទឹកកខ្វក់ ក្នុងក្រុងសៀមរាប និងបានបង្កើតយន្តការត្រួតពិនិត្យ-តាមដានលើដំណើរការអនុវត្តផែនការដែលបានព្រមព្រៀងរវាងប្រជាពលរដ្ឋ និងភាគីអ្នកផ្តល់សេវាប្រព័ន្ធទឹកកខ្វក់៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube