ប្រជុំពិនិត្យពិភាក្សាវឌ្ឍនភាពការងារសិក្សាសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ នៅទីស្តីការក្រសួង នាថ្ងៃទី៥ ខែមីនា ឆ្នាំ២០២៤ ឯកឧត្តម ឈៀង អគ្គនាយកនៃអគ្គនាយកដ្ឋានភស្តុភារកម្មក្រសួងសាធារណការ និងដឹកជញ្ជូន បានដឹកនាំកិច្ចប្រជុំពិនិត្យពិភាក្សាវឌ្ឍនភាពការងារសិក្សាសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ។ ដោយកិច្ចប្រជុំនេះមានការអញ្ជើញចូលរួមដោយផ្ទាល់ និងតាមរយៈវីដេអូពីចម្ងាយ មានអង្គភាពពាក់ព័ន្ធចំណុះក្រសួងសាធារណការ និងដឹកជញ្ជូន កំពង់ផែស្វយ័តព្រះសីហនុ រដ្ឋលេខាធិការដ្ឋានអាកាសចរណ៍ស៊ីវិល អគ្គនាយកដ្ឋានភាពជាដៃគូរវាងរដ្ឋនិងឯកជន ក្រសួងសេដ្ឋកិច្ច និងហិរញ្ញវត្ថុ និងសាជីវកម្មហិរញ្ញវត្ថុអន្តរជាតិ IFC (International Finance Corporation) សរុបអ្នកចូលរួមប្រមាណ៤០នាក់។ គោលបំណងនៃកិច្ចប្រជុំធ្វើឡើងដើម្បីត្រួតពិនិត្យ (១) លើលទ្ធផលបឋមនៃការជ្រើសរើសទីតាំងគម្រោងដោយផ្អែកលើវិធីសាស្ត្រវិភាគមានលក្ខណៈវិនិច្ឆ័យចម្រុះ MCA (Multi-Criteria Analysis) ដែលបានបង្ហាញដោយក្រុមការងារ IFC និង (២) ពិភាក្សាប្រមូលធាតុចូលពីភាគីពាក់ព័ន្ធដើម្បីបំពេញបន្ថែមនូវកង្វះខ្វះខាតនៃការសិក្សា ធ្វើយ៉ាងណាឱ្យមានភាពច្បាស់លាស់ត្រឹមត្រូវ និងសង្គតិភាព។ ជាចុងបញ្ចប់នៃកិច្ចប្រជុំ ឯកឧត្តមអគ្គនាយក ឈៀង ពេជ្រ ក៏បានស្នើឱ្យ IFC ជំរុញការរៀបចំសិក្សាករណីអាជីវកម្ម (Business Case Study) លើទីតាំងទាំងបីដែលត្រូវបានធ្វើចំណាត់ថ្នាក់ក្នុងការជ្រើសរើសសម្រាប់ការសិក្សាបន្ត។ ឯកឧត្តមរំពឹងថាការសិក្សា Business Case Study ទាំងបីទីតាំងអាចនឹងត្រូវបញ្ចប់ក្នុងខែមេសា ឆ្នាំ២០២៤ ដើម្បីក្រសួងអាចបន្តនីតិវិធីសម្រាប់ការជ្រើសរើសទីតាំងសមសម្របដើម្បីធ្វើការអភិវឌ្ឍនាពេលខាងមុខ៕