ភ្នំពេញ ថ្ងៃទី០៥ ខែកុម្ភៈ ឆ្នាំ២០២៤ -- ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចុះពិនិត្យមណ្ឌលត្រួតពិនិត្យលក្ខណៈបច្ចេកទេសយានជំនិះ (ឆៀក) សាខាឫស្សីកែវ របស់ក្រុមហ៊ុន Cambodia Motor Vehicle Inspection Center – CMVIC ដែលមានទីតាំងស្ថិតនៅក្នុងដីឡូតិ៍ តាមបណ្តោយផ្លូវលេខ៥៩៨ សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ ខាងត្បូងទីស្តីការក្រសួង នាព្រឹកថ្ងៃចន្ទ ទី០៥ ខែកុម្ភៈ ឆ្នាំ២០២៤។ការចុះត្រួតពិនិត្យនេះត្រូវបានធ្វើឡើងដើម្បីស្វែងយល់បន្ថែមអំពីដំណើរប្រតិបត្តិការនៃការអនុវត្តការងារត្រួតពិនិត្យលក្ខណៈបច្ចេកទេសយានជំនិះរបស់ក្រុមហ៊ុន CMVIC ដែលជាក្រុមហ៊ុនទទួលបានអាជ្ញាបណ្ណអនុញ្ញាតឱ្យធ្វើអាជីវកម្មពីក្រសួងសាធារណការ និងដឹកជញ្ជូន ដែលធានាបានថាការត្រួតពិនិត្យលក្ខណៈបច្ចេកទេសយានយន្តនៅទីនេះ គឺពិតជាប្រកបដោយភាពត្រឹមត្រូវតាមបទដ្ឋានបច្ចេកទេស និងគ្រប់លក្ខខណ្ឌដែលបានកំណត់។ការត្រួតពិនិត្យលក្ខណៈបច្ចេកទេសយានជំនិះ ស្របតាមស្តង់ដារលក្ខណៈបច្ចេកទេស និងបទប្បញ្ញត្តិច្បាប់ដែលបានកំណត់ គឺពិតជារឿងចាំបាច់ដែលម្ចាស់យានជំនិះគ្រប់រូបមិនអាចមើលរំលង ព្រោះគ្រោះថ្នាក់ចរាចរណ៍តាមដងផ្លូវ ដែលកើតឡើងពីកត្តាយានជំនិះមិនបានត្រួតពិនិត្យលក្ខណៈបច្ចេកទេសឱ្យបានត្រឹមត្រូវ និងទៀងទាត់ពេលវេលា។សូមជម្រាបជូនថា បងប្អូនអាចធ្វើការស្នើសុំ ត្រួតពិនិត្យលក្ខណៈបច្ចេកទេសយានជំនិះ ដោយខ្លួនឯងបាន តាមរយៈប្រព័ន្ធស្វ័យប្រវត្តិកម្ម៖ https://techinspection.mpwt.gov.kh ដោយគ្រាន់តែបំពេញព័ត៌មានដោយខ្លួនឯង និងមិនចាំបាច់ធ្វើការចំណាយក្រៅផ្លូវការផ្សេងៗ៕