ស្ទឹងត្រែង ៖ អាជ្ញាធរខេត្តស្ទឹងត្រែងបានឈូសឆាយចោល ផ្លូវកៅស៊ូដែលចាស់ ខូច និងតូចចង្អៀតចំនួន៣ខ្សែ មកសាងសង់ជំនួសមកវិញជាផ្លូវបេតុង ដើម្បីធានាដល់ការប្រើប្រាស់ និងសម្រាប់បម្រើដល់ការធ្វើចរាចរណ៍ទៅមករបស់ប្រជាពលរដ្ឋឱ្យកាន់តែងាយស្រួល ។ ក្នុងសកម្មភាពសាងសង់ផ្លូវបេតុងនៅក្នុងសង្កាត់ ក្រុង ខេត្តស្ទឹងត្រែង ថ្ងៃទី១៣ខែធ្នូ ឆ្នាំ ២០២៣ លោក ស គឹមណាតប្រធានមន្ទីរសាធារណការ និងដឹកជញ្ជូនខេត្តមានប្រសាសន៍ថា៖ ផ្លូវ៣ខ្សែនេះមានអាយុកាលយូរឆ្នាំ មកហើយ និងខូចបង្កភាពលំបាកដល់ ប្រជាពលរដ្ឋធ្វើចរាចរណ៍ទៅមក ព្រោះជាផ្លូវកៅស៊ូចាស់តូចចង្អៀត ហើយកន្លងមកធ្លាប់បានជួសជុលច្រើនលើកច្រើនសារួចមកហើយដែរ។ លោកបន្តថា៖នៅចុងឆ្នាំ ២០២៣នេះ អាជ្ញាធរខេត្តបាន សម្រេចផ្លាស់ប្ដូរយុទ្ធសាស្ត្រប្រែ ក្លាយផ្លូវកៅស៊ូ មកសាងសង់ផ្លូវបេតុងជំនួសវិញ ព្រោះយើងធ្វើបានតិច តែមានគុណភាពរឹងមាំល្អប្រើប្រាស់បានយូរអង្វែង និងចៀសវាងបានកុំឱ្យខាតថវិកាជាតិ សម្រាប់ជួសជុល ពីមួយឆ្នាំទៅមួយឆ្នាំ។ លោកជាសំណាង មេភូមិស្ពានថ្មសង្កាត់ស្ទឹងត្រែងបានគាំទ្រយុទ្ធសាស្ត្រថ្មីនេះ ព្រោះយើងទទួលបានសមិទ្ធផលល្អសម្រាប់ប្រើប្រាស់ និងធ្វើឱ្យទីក្រុងមានសោភ័ណភាព ពេលមានភ្ញៀវទេសចរមកលេង ក៏បានលើកសរសើរពីភាពស្អាតផងដែរ ។ លោកបន្តថា៖ពេលសាងសង់រួចប្រជាពលរដ្ឋត្រូវចូលរួមជាមួយអាជ្ញាធរ ជួយសម្អាតផ្នែកបរិស្ថានតាមមុខផ្ទះ ធ្វើយ៉ាងណាកុំឆ្លៀតយកផ្លូវដាក់តាំងអីវ៉ាន់លក់ដូរដែលនាំឱ្យប៉ះពាល់ដល់សណ្តាប់ធ្នាប់សារធាណៈ៖« សំណូមពររបស់ខ្ញុំមេភូមិ សូមឱ្យប្រជាពលរដ្ឋយើងទាំងអស់នៅតាមដងផ្លូវហ្នឹង ត្រូវគោរពសណ្ដាប់ធ្នាប់ កុំអាងតែមុខផ្ទះរបស់ខ្លួនចេះតែទាញយកអីវ៉ាន់យកមកដាក់លើផ្លូវធ្វើឱ្យបាត់សណ្ដាប់ធ្នាប់ ប្រជាពលរដ្ឋដើរចេញចូលអ៊ីចឹង ហើយមួយទៀតចង់ឱ្យគាត់ ចូលរួមថែទាំងអស់គ្នាផ្ទះយើងយើងត្រូវបោសច្រាស សំរាមដាក់តាមផ្ទះឱ្យបានស្រួលបួល ដើម្បីជាសណ្ដាប់ធ្នាប់ក្នុងក្រុងយើង។ លោកសាយ កុសលអភិបាលក្រុងស្ទឹងត្រែង បានបញ្ជាក់ថា៖ នេះជាការយកចិត្តទុកដាក់បង្ហាញឱ្យឃើញពីជំហរទទួលខុសត្រូវ ព្រោះមានផ្លូវ បេតុងប្រជាពលរដ្ឋធ្វើដំណើរ បានស្រួល ហើយទីប្រជុំជនក្រុង ក៏មានសោភ័ណភាពស្អាត ភូមិដ្ឋានក៏ល្អថែមទៀត ។ លោកនូវណ្ណាប្រធានក្រុមបច្ចេកទេសសាងសង់ផ្លូវនេះបានបញ្ជាក់ថា៖ក្រុមការងារអនុវត្តការសាងសង់ទៅតាមស្តង់ដារ ដើម្បីឱ្យមានគុណភាពល្អ ព្រោះជាផ្លូវនៅក្នុងក្រុងផង ហើយសកម្មភាពសាងសង់ អាចបញ្ចប់នៅដើមខែកុម្ភៈឆ្នាំ២០២៤ខាងមុខនេះ ។ សូមបញ្ជាក់ថា៖នេះជាផ្លូវលេខ៥១-៦១-និងផ្លូវលេខ១២ ដែលអាជ្ញាធរខេត្តបានសាងសង់ជាផ្លូវបេតុងនេះស្ថិតនៅក្នុងភូមិស្ពានថ្ម-សង្កាត់ ក្រុងស្ទឹងត្រែង មានទទឹង៩.៥០ម៉ែត្រ និងមានបណ្តោយប្រវែងសរុប ២.៥៣០ម៉ែត្រ ដែលត្រូវចំណាយថវិកាជាតិជាច្រើនរយលានរៀល៕