[Phnom Penh Post] - ក្រសួងណែនាំឱ្យពង្រឹងគុណភាពនៃការបង្រៀនបើកបរយានយន្ដ
2023-09-21
ទៅកាន់ទំព័រចុះផ្សាយក្នុង Phnom Penh Post
ភ្នំពេញៈ ក្រសួងសាធារណការ និងដឹកជញ្ជូនបានណែនាំឱ្យសាលាបង្រៀនបើកបរទាំងអស់ពង្រឹងប្រសិទ្ធភាព និងគុណភាពនៃការបង្រៀន បន្ទាប់ពីរកឃើញមានភាពមិនប្រក្រតីមួយចំនួនពាក់ព័ន្ធនឹងការអនុវត្តមិនបានត្រឹមត្រូវរបស់សាលា និងបានសម្រេចឱ្យមានកិច្ចប្រជុំ ២ ដង ក្នុង ១ ឆ្នាំជាមួយសាលាបង្រៀនបើកបរទូទាំងប្រទេស។
កាលពីថ្ងៃទី ១៩ ខែកញ្ញា ក្រសួងសាធារណការ និងដឹកជញ្ជូន បានរៀបចំក្នុងកិច្ចប្រជុំស្តីពីការពង្រឹងការងារសាលាបង្រៀនបើកបរយានយន្តគ្រប់ប្រភេទដើម្បីពង្រឹងប្រសិទ្ធភាព និងគុណភាពនៃការបង្រៀនក៏ដូចជាគ្រប់គ្រងសាលា និងសាខាសាលាបង្រៀនបើកបរឱ្យបានប្រសើរ។
កិច្ចប្រជុំនេះមានការចូលរួមពីមន្ត្រីជំនាញពាក់ព័ន្ធនៃអគ្គនាយកដ្ឋានដឹកជញ្ជូនផ្លូវគោកនិងនាយកនាយិកាសាលាបង្រៀនបើកបរយានយន្តគ្រប់ប្រភេទមកពី ២៥ រាជធានី-ខេត្តសរុបចំនួន ៥៤ សាលា។ នេះបើតាមការប្រកាសរបស់ក្រសួង។
លោកឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោកក្រសួងសាធារណការ និងដឹកជញ្ជូនដែលបានចូលរួមក្នុងឱកាសនោះបានថ្លែងថា កិច្ចប្រជុំនេះ គឺដើម្បីពង្រឹងការងារសាលាបង្រៀនបើកបរយានយន្តទាំងជាង ៥០ សាលាមកពី ២៥ រាជធានី-ខេត្ត។
លោកបានបន្ថែមថា ការពង្រឹងបន្ថែមលើការងារសាលា និងសាខាសាលាបង្រៀនបើកបរយានយន្តនេះ ដោយសារកន្លងមកបានពិនិត្យឃើញមានភាពមិនប្រក្រតីមួយចំនួន ដូចជាការអនុវត្តមិនបានត្រឹមត្រូវតាមខ្លឹមសារប្រកាសស្តីពីលក្ខខណ្ឌ និងនីតិវិធីនៃការចេញលិខិតអនុញ្ញាតឱ្យធ្វើអាជីវកម្មសាលាបង្រៀនបើកបរយានយន្តរបស់ក្រសួង និងការគ្រប់គ្រងសាខាសាលាបង្រៀនបើកបររបស់ខ្លួនមិនបានគ្រប់ជ្រុងជ្រោយ ព្រមទាំងការចេញបង្កាន់ដៃជូនអតិថិជនមិនទាន់បានត្រឹមត្រូវដោយប្រើប្រាស់រូបសញ្ញា (LOGO) ក្រសួងជាដើម។
លោកបានបញ្ជាក់ថា៖ «អគ្គនាយកដ្ឋានបានឯកភាពឱ្យមានកិច្ចប្រជុំ ២ ដង ក្នុង ១ ឆ្នាំ និងបានស្នើឱ្យនាយកនាយិកាសាលាបង្រៀនបើកបរយានយន្តទាំងអស់ពង្រឹងប្រសិទ្ធភាព និងគុណភាពនៃការបង្រៀនក៏ដូចជាគ្រប់គ្រងសាលា និងសាខាសាលាបង្រៀនបើកបរយានយន្តរបស់ខ្លួនឱ្យបានល្អប្រសើរព្រមទាំងស្នើឱ្យបង្កើតសមាគមឱ្យបានឆាប់ផងដែរ»។
លើសពីនេះ លោក ឈួន វ៉ន់ ក៏បានលើកទឹកចិត្តឱ្យនាយកនាយិកាសាលាបង្រៀនបើកបរយានយន្តលើកពីការលំបាកបញ្ហាប្រឈមក៏ដូចជាមតិយោបល់ និងសំណូមពរផ្សេងៗ ដោយលោក ថា មតិយោបល់ និងសំណូមពរមួយចំនួនត្រូវដោះស្រាយភ្លាមៗ និងមួយចំនួនទៀតត្រូវយកទៅពិនិត្យពិភាក្សាឱ្យបានច្បាស់លាស់ជាមួយជំនាញ។
តាមរបាយការណ៍របស់ក្រសួងសាធារណការ និងដឹកជញ្ជូន កាលពីឆ្នាំ ២០២១ បានបង្ហាញថា ចាប់តាំងពីឆ្នាំ ១៩៩០ រហូតមកទល់ឆ្នាំ ២០២០ ក្រសួងបានចេញវិញ្ញាបនបត្រ ចុះបញ្ចីសាលាបង្រៀនបើកបរយានយន្តសរុបចំនួន ៤២ និងមានសាខាសាលាបង្រៀនបើកបរយានយន្តសរុបចំនួន ១៨៤ នៅទូទាំងប្រទេស។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជាបានថ្លែងថា ការពង្រឹងគុណភាពទៅដល់សាលាបង្រៀនបើកបរគឺជារឿងល្អ ព្រោះដើម្បីឱ្យដងផ្លូវមានសុវត្ថិភាព គឺចាំបាច់ត្រូវមានអ្នកបើកបរដែលមានសមត្ថភាព តាមរយៈការទទួលបានការបណ្តុះបណ្តាលពីសាលាបានត្រឹមត្រូវ ។
ចំពោះការកំណត់ឱ្យមានកិច្ចប្រជុំ ២ ដង ក្នុង ១ ឆ្នាំវិញ លោក គឹម បញ្ញា ស្នើឱ្យធ្វើជាប្រចាំដែលមិនត្រឹមតែធ្វើនៅថ្នាក់ជាតិទេគឺតាមមន្ទីរសាធារណការ និងដឹកជញ្ជូននីមួយៗតាមខេត្តគួរតែមានកិច្ចប្រជុំជាទៀងទាត់ជាមួយសាលាបង្រៀនបើកបរដើម្បីបង្ហាញទិន្នន័យ ពីគ្រោះថ្នាក់ចរាចរណ៍ដល់សាលាទាំងនោះឱ្យបានដឹងនិងយកចិត្តទុកដាក់បណ្តុះបណ្តាលទៅដល់សិស្សដែលកំពុងរៀនបើកបរនៅតាមសាលាទាំងនោះ។
លោកបានបញ្ជាក់ថា៖ «គួរមានកិច្ចប្រជុំនៅកម្រិតថ្នាក់ខេត្តនីមួយៗជាមួយសាលាបង្រៀនបើកបរអាចថា ៦ ខែម្តង ដើម្បីយើងផ្សព្វផ្សាយ និងជំរុញបន្ថែមពីកិច្ចប្រជុំនៅថ្នាក់ជាតិ។ ខ្ញុំសុំឱ្យសាលាគាត់ចូលរួមពង្រឹងគុណភាពក្នុងការបង្រៀន ទាំងទ្រឹស្តី និងបង្រៀនដៃចង្កូត។ ខ្ញុំក៏សុំឱ្យក្រសួងលោកពង្រឹងការប្រឡងយកបណ្ណបើកបរ និងការបណ្តុះបណ្តាលឡើងវិញដល់អ្នកបើកបរដែរ»។
ក្រៅពីនេះលោក គឹម បញ្ញា ក៏បានសំណូមពរដល់សាលាបង្រៀនបើកបរទាំងអស់ គួរស្វែងរកទីតាំងបង្រៀនឱ្យបានត្រឹមត្រូវ និងបង្រៀនដៃចង្កូតឱ្យសិស្សអាចបើកបរឱ្យបានស្ទាត់ជាមុនសិន មុននឹងបណ្តាយឱ្យបើកបរតាមផ្លូវសាធារណៈបាន ខណៈការបង្រៀនទ្រឹស្តី គួរតែបញ្ចូលមេរៀនឱ្យបានច្រើន ពាក់ព័ន្ធនឹងសុជីវធម៌ និងការអធ្យាស្រ័យក្នុងការបើកបរ រួមទាំងស្លាកសញ្ញា និងច្បាប់ចរាចរណ៍ផងដែរ៕
