ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និង ដឹកជញ្ជូន បានអញ្ជើញដឹកនាំកិច្ចប្រជុំថ្នាក់ដឹកនាំក្រសួងប្រចាំសប្តាហ៍ ផ្តោតលើការប្រកាសសុពលភាពមន្ត្រីរាជការទើបតែងតាំងថ្មី នៃអគ្គនាយកដ្ឋាន បច្ចេកវិទ្យា និងទំនាក់ទំនងសាធារណៈ, ការប្រគល់-ទទួលសម្ភារឧបករណ៍ត្រួតពិនិត្យគុណភាពផ្លូវថ្នល់ជូនអង្គភាពជំនាញក្រោមឱវាទក្រសួង និងមន្ទីរសាធារណៈការ និងដឹកជញ្ជូនរាជធានី-ខេត្ត, និងការប្រគល់-ទទួល អគារមន្ទីរពិសោធន៍ទាំងបួនទីតាំងស្ថិតនៅខេត្តសៀមរាប, ខេត្តពោធិ៍សាត់, ខេត្តក្រចេះ, និងខេត្តព្រះសីហនុ កាលពីថ្ងៃពុធ ៩កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០២ ខែវិច្ឆិកា ឆ្នាំ២០២២។ នៅក្នុងឱកាសនោះ ឯកឧត្តមទេសរដ្ឋមន្ត្រី បានកោតសរសើរចំពោះអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ដែលបានខិតខំប្រឹងប្រែងធ្វើកិច្ចការរបស់ខ្លួនបានជោគជ័យជាច្រើន ។ ជាពិសេសការអភិវឌ្ឍកម្មវិធីបច្ចេកវិទ្យានានា ក្នុងការសម្រួលដល់ការផ្តល់សេវាសាធារណៈ សំដៅបង្កើនចំណូលជាតិយ៉ាងមានប្រសិទ្ធភាព និងបានបំពេញការងារអស់ពីកម្លាំងកាយចិត្ត ពេលវេលាក្នុងការបំពេញភារកិច្ចប្រកបដោយការទទួលខុសត្រូវខ្ពស់ ដើម្បីរួមចំណែកបម្រើប្រជាពលរដ្ឋ និងអភិវឌ្ឍន៍ប្រទេសតាមរយៈវិស័យសាធារណការ និងដឹកជញ្ជូន ឱ្យកាន់តែរីកចម្រើនជាលំដាប់។ឯកឧត្តមទេសរដ្ឋមន្ត្រី បានគូសបញ្ជាក់បន្ថែមទៀតថា អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈនេះ បាន និងកំពុងជំរុញការសហការជាមួយក្រុមហ៊ុនផ្លូវល្បឿនលឿន និងគ្រឹះស្ថានធនាគារ-ហិរញ្ញវត្ថុជាដៃគូ ក្នុងការបំពាក់បច្ចេកវិទ្យា DIP សម្រាប់ការគ្រប់គ្រង និងប្រមូលចំណូលចេញ-ចូលប្រើប្រាស់ផ្លូវល្បឿនលឿន ដែលធានាភាពលឿនរហ័ស ងាយស្រួល សុវត្ថិភាព សម្រាប់អ្នកប្រើប្រាស់ផ្លូវ និងធានាការធ្វើអាជីវកម្មក្រុមហ៊ុន កាន់តែមានប្រសិទ្ធភាព និងតម្លាភាព សម្រាប់សង្គមជាតិ ជាពិសេសធានាការប្រមូលចំណូលថវិកាជាតិ កាន់តែមានភាពប្រសើរឡើង ។ ប្រព័ន្ធបច្ចេកវិទ្យា DIP នឹងផ្តល់ភាពងាយស្រួល ដល់ប្រជាពលរដ្ឋអាចបញ្ចូលសមតុល្យទឹកប្រាក់ជាមុន តាមរយៈផ្លាក លេខ និងជួយសម្រួលឱ្យការចេញ-ចូលផ្លូវល្បឿនលឿន បានលឿនរហ័ស កាត់បន្ថយការកកស្ទះ បង្ការពីជំងឺកូវីដ-១៩ ព្រមទាំងបញ្ចៀសការប្រើកាតចេញ-ចូល ដែលប្រឈមការបាត់បង់ផងដែរ ឬផាកពិន័យផ្សេងៗផងដែរ។ ប្រព័ន្ធនេះគ្រោងនឹងបញ្ចប់ការរៀបចំ ដើម្បីដាក់ឱ្យប្រើប្រាស់ជាផ្លូវការ នាថ្ងៃទី០៩ ខែវិច្ឆិកា ឆ្នាំ២០២២ខាងមុខនេះ។ ជាមួយគ្នានេះដែរ ឯកឧត្តមទេសរដ្ឋមន្ត្រី បានសំណូមពរឱ្យមន្ត្រីជំនាញពាក់ព័ន្ធក្រោមឱវាទ ប្រើប្រាស់សម្ភារ ឧបករណ៍ត្រួតពិនិត្យគុណភាពផ្លូវ ឱ្យមានប្រសិទ្ធភាព និងថែទាំឱ្យបានល្អ អាចប្រើប្រាស់បានយូរអង្វែង ដោយហេតុថា ការចំណាយលើការទិញឧបករណ៍ទាំងនោះ ជាចំណាយថវិកាជាតិយើង និងណែនាំឱ្យមន្ត្រីពាក់ព័ន្ធសហការជា មួយធនាគារអភិវឌ្ឍន៍អាស៊ី(ADB) ធនាគារពិភពលោក(WB) ក៏ដូចជាដៃគូអភិវឌ្ឍន៍នានា ស្វែងរកប្រភពថវិកា ដើម្បីគូសគំនូសចរាចរណ៍ និងការបំពាក់ផ្លាកសញ្ញាចរាចរណ៍ឱ្យបានត្រឹមត្រូវ ដើម្បីចូលរួមកាត់បន្ថយគ្រោះថ្នាក់ចរាចរណ៍ ឱ្យនៅកម្រិតទាប។ ទន្ទឹមនឹងនេះ ឯកឧត្តមទេសរដ្ឋមន្ត្រី បានអញ្ជើញជាអធិបតីក្នុងពិធីប្រគល់-ទទួលសម្ភារឧបករណ៍ត្រួតពិនិត្យគុណភាពផ្លូវ ដែលជាឥណទានកម្ចីរបស់ធនាគារអភិវឌ្ឍន៍អាស៊ី សម្រាប់ទិញសម្ភារត្រួតពិនិត្យគុណភាពផ្លូវ ដើម្បីគាំទ្រដល់គំនិតផ្តួចផ្តើមរបស់ឯកឧត្តមទេសរដ្ឋមន្ត្រី ក្នុងទិសដៅធ្វើឱ្យយ៉ាងណាឱ្យគុណភាព នៃការស្ថាបនាផ្លូវថ្នល់មានភាពរឹងមាំ និងអនុលោមតាមទស្សនវិស័យច្បាស់លាស់៕