កិច្ចប្រជុំពិនិត្យវឌ្ឍនភាពការងារប្រចាំខែសីហា នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យក្រោមហិរញ្ញប្បទានឥណទានរបស់ធនាគារពិភពលោក (World Bank) ដឹកនាំផ្ទាល់ដោយឯកឧត្តម រស់ វណ្ណា រដ្ឋលេខាធិការ និងជាប្រធានដឹកនាំអង្គប្រជុំ ថ្ងៃសុក្រ ៦រោច ខែភទ្របទ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៦ ខែកញ្ញា ឆ្នាំ២០២២ នៅទីស្ដីការក្រសួងសាធារណការ និងដឹកជញ្ជូន ឯកឧត្តម រស់ វណ្ណា រដ្ឋលេខាធិការបានអញ្ជើញដឹកនាំកិច្ចប្រជុំពិនិត្យវឌ្ឍនភាពប្រចាំខែសីហា នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ដោយមានការអញ្ជើញចូលរួមពីថ្នាក់ដឹកនាំទទួលបន្ទុក មន្ត្រីជំនាញ ក្រុមការងារបច្ចេកទេស ទីប្រឹក្សាគម្រោង និងភាគីពាក់ព័ន្ធផងដែរ។ គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ជាគម្រោងផ្តោតសំខាន់លើការកែលម្អលើការផ្តល់សេវាជូនប្រជាពលរដ្ឋ និងពង្រឹងលើកកម្ពស់សមត្ថភាពបន្ថែមអង្គភាពផ្តល់សេវាអនាម័យ ព្រមទាំងសាងសង់ពង្រីកបណ្តាញលូខ្នែង លូខ្នែងរងទឹកកខ្វក់ កែលម្អស្ថានីយបូម និងស្ថានីយប្រព្រឹត្តកម្មទឹកកខ្វក់ឱ្យបានកាន់តែល្អប្រសើរជាបន្តបន្ទាប់ ក្រោមហិរញ្ញប្បទានឥណទានរបស់ធនាគារពិភពលោក (World Bank)។ គម្រោងនេះកំពុងអនុវត្តដោយត្រូវចំណាយពេលវេលាបន្ថែមជាង ២៣ខែ ឱ្យសម្រេចបានការកែលម្អ និងលើកកម្ពស់អនាម័យ ឆ្លើយតបតាមគោលបំណង និងសូចនាករនៃគម្រោង។ កិច្ចប្រជុំក៏បានលម្អិតទៅលើវឌ្ឍភាពការងារ បញ្ហាប្រឈមដែលរាំងស្ទះលើការអនុវត្តការងារ និងការស្វែងរកដំណោះស្រាយផ្សេងៗ សម្រាប់ជាទិសដៅក្នុងការអនុវត្តគម្រោងបន្ថែមទៀតផងដែរ។ ថ្លែងក្នុងឱកាសនេះ ឯកឧត្តមរដ្ឋលេខាធិការ បានចែករំលែកពីគន្លឹះជោគជ័យ និងមានស្មារតីជាក្រុម (Team Spirit) មួយចំនួនដល់អង្គភាពគ្រប់គ្រងគម្រោង (CMU-2) អាចយកទៅអនុវត្តដើម្បីបង្កើនប្រសិទ្ធភាពនៃគម្រោងបន្ថែមទៀត ដោយផ្ដោតលើការបែងចែកឱ្យបានច្បាស់ពីបំណែងចែកតួនាទីការងារ ភារកិច្ច សម្រាប់ក្រុមការងារនីមួយៗ និងធ្វើយ៉ាងណាត្រូវបង្កើនទំនាក់ទំនង និងសេចក្ដីទុកចិត្តឱ្យបានកាន់តែប្រសើររវាងសមាជិកនៃគម្រោង។ ឯកឧត្តម បានផ្ដល់មតិណែនាំឱ្យក្រុមការងារ បង្កើនការយកចិត្តទុកដាក់ដោយពង្រីកឱ្យមានកិច្ចពិភាក្សាជាប្រចាំលើការងារគម្រោង លើកទឹកចិត្តឱ្យមានការបណ្ដុះបណ្ដាលបន្ថែមលើបច្ចេកទេសការងារផ្សេងៗដល់សមាជិកនៃគម្រោង ធ្វើយ៉ាងណាជំរុញការងារឱ្យមានភាពងាយស្រួល និងប្រសិទ្ធភាពខ្ពស់ និងលើកទឹកចិត្តឱ្យក្រុមការងារធ្វើការផ្សព្វផ្សាយឱ្យបានទូលំទូលាយពីសមិទ្ធផលដែលសម្រេចបានជូនប្រជាពលរដ្ឋផងដែរ។ ឯកឧត្តម រដ្ឋលេខាធិការ និងជាប្រធានដឹកនាំអង្គប្រជុំ បានថ្លែងអំណរគុណទៅកាន់ទីប្រឹក្សាបច្ចេកទេសទាំងអស់ក្នុងគម្រោង ដោយលើកទឹកចិត្តឱ្យខិតខំបន្ថែមទៀតដើម្បីសម្រេចបានគោលដៅរួម និងស្នើសុំឱ្យចូលរួមក្នុងការពង្រីក និងចែករំលែកចំណេះដឹងដល់មន្ត្រី និងក្រុមការងារនៃគម្រោងទាំងមូលន្ថែមទៀត៕