សិក្ខាកាមអន្តរក្រសួងប្រមាណជាង៣០រូបចូលរួមវគ្គបណ្តុះបណ្តាលស្តីពីការគ្រប់គ្រងកិច្ចសន្យាសម្រាប់ គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមហិរញ្ញប្បទានឥណទានសម្បទានពីធនាគារពិភពលោក សៀមរាប៖ ថ្ងៃពុធ ១កើត ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៩ ខែមិថុនា ឆ្នាំ២០២២ ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្រ្តី ស៊ុន ចាន់ថុល បានអញ្ជើញជាអធិបតីក្នុងពិធីបិទវគ្គបណ្តុះបណ្តាលស្តីពីការគ្រប់គ្រងកិច្ចសន្យាសម្រាប់គម្រោងលើកកម្ពស់ការផ្គត់ផ្គង់ទឹកស្អាត និងអនាម័យក្រោមហិរញ្ញប្បទានឥណទានសម្បទានពីធនាគារពិភពលោក ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធក្រោមឱវាទក្រសួង និងដោយឡែកខាងភាគីធនាគារពិភពលោកមានការចូលរួមពីអ្នកជំនាញផ្នែកហិរញ្ញវត្ថុ ជំនាញផ្នែកលទ្ធកម្ម ទីប្រឹក្សាលទ្ធកម្ម និងគ្រប់គ្រងកិច្ចសន្យាអន្តរជាតិ និងសិក្ខាកាមសរុបប្រមាណជាង៣០រូប។ វគ្គបណ្តុះបណ្តាលនេះមានរយៈពេល៣ថ្ងៃ ចាប់ពីថ្ងៃទី២៧-២៩ ខែមិថុនា ឆ្នាំ២០២២ សហការរៀបចំ ឡើងដោយអង្គភាពគ្រប់គ្រងសមាសភាគគម្រោង-1 (CMU-1) នៃក្រសួងឧស្សាហកម្មវិទ្យាសាស្រ្តបច្ចេកវិទ្យា និងនវានុវត្តន៍ និងអង្គភាពគ្រប់គ្រងសមាសភាគគម្រោង-2 (CMU-2) នៃក្រសួងសាធារណការ និងដឹកជញ្ចូន ក្នុងគោលបំណងផ្តល់ជូនដល់សិក្ខាកាមដែលជាមន្រ្តីអនុវត្តគម្រោងទទួលបាននូវចំណេះដឹងអំពីគោលការណ៍ និងនីតិវិធីលទ្ធកម្មរបស់ធនាគារពិភពលោក ការគ្រប់គ្រងកិច្ចសន្យា គោលការណ៍ទាក់ទងនឹងពន្ធ និងវិធីសាស្រ្តក្នុងការគ្រប់គ្រងការចំណាយ និងកត់ត្រាឱ្យបានត្រឹមត្រូវ និងច្បាស់លាស់ដើម្បីធានាដល់ការអនុវត្តការប្រកបដោយប្រសិទ្ធភាព។ ផ្តល់បទពិសោធន៍នៃការអនុវត្តល្អៗលើកិច្ចការងារលទ្ធកម្មសម្រាប់សេវាកម្មប្រឹក្សាផ្តល់យោបល់ និងវិធីសាស្រ្តសំខាន់ៗដូចជា៖ QCBS និង CQS ក៏ដូចជាកិច្ចលទ្ធកម្មទំនិញ និងការងារសាងសង់រួមមានប្រភេទ ICB និងNBC និងប្រភេទ Shopping សម្រាប់កិច្ចលទ្ធកម្មទំនិញ។ ការគ្រប់គ្រងកិច្ចសន្យានៃទំនិញការងារសាងសង់ និងសេវាកម្ម ទីប្រឹក្សាដែលមានកិច្ចសន្យាពីរប្រភេទ (i) កិច្ចសន្យាផ្អែកលើពេលវេលា (Time-Based) និង (ii) កិច្ចសន្យាការបង់ប្រាក់តែមួយលើក (Lump Sum)។ ឯកឧត្តមអនុរដ្ឋលេខាធិការ បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះ ធនាគារពិភពលោក ដែលបានផ្តល់កិច្ចសហការយ៉ាងសកម្មក្នុងការរៀបចំវគ្គបណ្តុះបណ្តាលនេះប្រកប ដោយអត្ថន័យខ្លឹមសារដើម្បីផ្តល់ជាចំណេះដឹងបន្ថែម ក៏ដូចជាចែករំលែកនូវបទពិសោធន៍ល្អៗដល់សិក្ខាកាមដែលជាមន្រ្តីអនុវត្តគម្រោងនៃស្ថាប័នទាំងពីរ ក្នុងន័យពង្រឹងសមត្ថភាពរបស់មន្រ្តីយើងលើការអនុវត្តការគ្រប់គ្រងកិច្ចសន្យាប្រកបដោយប្រសិទ្ធភាព តម្លាភាព និងស្របទៅតាមខ្លឹមសាររបស់កិច្ចសន្យា។ ឯកឧត្តមអនុរដ្ឋលេខាធិការ បានបង្ហាញក្តីសង្ឃឹមយ៉ាងមុតមាំថាធនាគារពិភពលោកនឹងបន្តរៀបចំវគ្គបណ្តុះបណ្តាលល្អៗបន្ថែមទៀត ដើម្បីចូលរួមចំណែកក្នុងការពង្រឹងសមត្ថភាពមន្រ្តី និងស្ថាប័ននៃរាជរដ្ឋាភិបាលកម្ពុជាឱ្យកាន់តែរឹងមាំបន្ថែមទៀត៕