កាលពីពេលថ្មីៗកន្លងទៅនេះរាជរដ្ឋាភិបាលកម្ពុជា បានចាប់ផ្តើមស្ថាបនា និងពង្រីកផ្លូវជាតិលេខ៤ហើយ ដើម្បីឆ្លើយតបនឹងកំណើនចរាចរណ៍នាពេលបច្ចុប្បន្ន ខណៈសព្វថ្ងៃនេះផ្លូវមួយនេះមានសភាពតូចចង្អៀតដែលពិបាកក្នុងធ្វើដំណើរ។ តាមការបញ្ជាក់ពីក្រសួងបានឱ្យដឹងថា ដំណើរការសាងសង់គ្រោងបញ្ចប់នៅធ្នូ ឆ្នាំ២០២៦ខាងមុខ។ ក្រៅតែពីការស្ថាបនាឡើងវិញនេះ កាលពីថ្ងៃទី១៦ ខែឧសភា ឆ្នាំ ២០២២ ក្រសួងសាធារណការ និងដឹកជញ្ជូនបានធ្វើការប្រជុំស្ដីអំពីគោលបំណងបង្ហាញពីវឌ្ឍនភាពគម្រោងផែនការមេប្រព័ន្ធដឹកជញ្ជូនឆ្លាតវៃ និងគម្រោងសាកល្បងប្រព័ន្ធដឹកជញ្ជូនឆ្លាតវៃ (ITS Pilot Project) លើផ្លូវជាតិលេខ៤នេះផងដែរ ដែលមានការចូលរួមធ្វើបទបង្ហាញពីអ្នកជំនាញរបស់កូរ៉េអំពីគ្រោងឆ្អឹងរបស់ផែនការមេ និងគម្រោងសាកល្បង។ មិនតែប៉ុណ្ណោះ អ្នកជំនាញកូរ៉េក៏បានបង្កើតកម្មវិធីទូរស័ព្ទ (Application) និងបំពាក់ CCTV Cameras និង Variable Message Signs (VMS) សម្រាប់ប្រមូល និងបង្ហាញព័ត៌មានកំពុងកើតមាន (Real-Time Information) នៅលើកំណាត់ផ្លូវជាតិលេខ៤ ដែលនឹងត្រូវអនុវត្តចាប់ពីឆ្នាំ២០២៣ ដល់ឆ្នាំ២០២៥។ សូមបញ្ជាក់ផងដែរថានេះជាកិច្ចប្រជុំលើកទី២ហើយ រវាងអ្នកជំនាញមកពីវិទ្យាស្ថាន KRIHS របស់ប្រទេសកូរ៉េ និងក្រសួងសាធារណការ និងដឹកជញ្ជូន។ តាមគម្រោងផែនការមេប្រព័ន្ធដឹកជញ្ជូនឆ្លាតវៃនឹងត្រូវបញ្ចប់នៅក្នុងខែកក្កដាខាងមុខនេះ៕ អត្ថបទ៖ ឌឿក ស្រីនុត រតនៈ