សិក្ខាសាលាស្តីពី ការគ្រប់គ្រងទឹកកខ្វក់ និងសំណល់ភក់ ក្នុងរាជធានីភ្នំពេញ ដើម្បីរកនីតិវិធីដោះស្រាយផលប៉ះពាល់រួមរបស់បងប្អូនប្រជាពលរដ្ឋ អំពីកង្វះខាតការរៀបចំបណ្ដាញលូទឹកកខ្វក់ ភ្នំពេញ៖ ថ្ងៃព្រហស្បតិ៍ ៥កើត ខែពិសាខ ឆ្នាំខាល ចត្វាស័ក ព.ស.២៥៦៥ ត្រូវនឹងថ្ងៃទី០៥ ខែឧសភា ឆ្នាំ២០២២ ឯកឧត្តម ត្រាក់ ថៃសៀង រដ្ឋលេខាធិការ ក្រសួងសាធារណការ និងដឹកជញ្ជូន រួមជាមួយលោក ថូនី ហ្កៀល (TONY Gill) នាយកធនាគាអភិវឌ្ឍន៍អាស៊ីប្រចាំកម្ពុជា បានអញ្ជើញជាអធិបតីក្នុងពិធីបើកសិក្ខាសាលាស្តីពីការគ្រប់គ្រងទឹកកខ្វក់ និងសំណល់ភក់ ក្នុងរាជធានីភ្នំពេញ ដោយមានការចូលរួមដោយផ្ទាល់ពីលោក នួន សំណាវុធ នាយកគ្រប់គ្រងសំណល់ និងបរិស្ថានរាជធានីភ្នំពេញ តំណាងសាលារាជធានីភ្នំពេញ និងថ្នាក់ដឹកនាំ មន្ត្រីរាជការមកពីគ្រប់ស្ថាប័នពាក់ព័ន្ធ និងការចូលរួមតាមរយៈប្រព័ន្ធវីដេអូពីចម្ងាយសរុបប្រមាណជាង ៦០ នាក់។ សិក្ខាសាលានេះមានគោលបំណង ពិនិត្យផែនការមេលើ ប្រព័ន្ឋអនាម័យសម្រាប់ទាំងអស់គ្នាក្នុងទីក្រុងទាំងមូល (CWIS) លើការកែលម្អខ្សែសង្វាក់សេវាកម្មអនាម័យទាំងមូលដូចជាការទុកដាក់ ការបូមចេញ ការដឹកជញ្ជូន និងការធ្វើប្រព្រឹត្តិកម្ម។ ចំពោះការវិនិយោគ នឹងពិចារណាលើជម្រើសអនាម័យ មាន ឬគ្មានបណ្តាញលូ ដើម្បីធានាថាដំណោះស្រាយដែលលើកឡើងមានតម្លៃសមរម្យ និងនិរន្តរភាពហិរញ្ញវត្ថុ លើបច្ចេកវិទ្យាសមស្របមួយចំនួន រួមមានប្រពន្ធ័លូរួមមកមណ្ឌលកណ្តាល ប្រព័ន្ធលូមិនមកមណ្ឌលកណ្តាល និងអនាម័យនៅនឹងកន្លែងដោយកែលម្អការប្រមូលភក់លាមក និងកំណត់ពីតម្រូវការលើការវិនិយោគរយ:ពេលខ្លី មធ្យម និងវែង ដើម្បីសម្រេចបាននូវគោលបំណង រួមមានការគាំទ្រចាំបាច់ដូចជា ការរៀបចំស្ថាប័ន បទបញ្ញត្តិ និងការគ្រប់គ្រងហិរញ្ញវត្ថុផងដែរ។ ស្ថិតក្នុងឱកាសនោះ ឯកឧត្តមរដ្ឋលេខាធិការ បានថ្លែងអំណរគុណដល់ លោកថូនី ហ្កៀល (TONY Gill) ដែលបានចូលរួមក្នុងអង្គសិក្ខាសាលាទាំងមូល និងបានលើកស្នើឱ្យក្រុមការងារពាក់ព័ន្ធទាំងអស់មកពីគ្រប់ស្ថាប័នជាតិ និងអន្តរជាតិ ចូលរួមពិភាក្សា ស្វែងរកដំណោះស្រាយរួមឱ្យបានផុលផុស។ ជាមួយគ្នានោះ ឯកឧត្ដម បានលើកឡើងពីប្រវត្តិនៃការជ្រើសរើសទីតាំងធ្វើប្រព្រឹត្តិកម្មទឹកកខ្វក់ក្នុងរាជធានី និងផលប៉ះពាល់រួមរបស់បងប្អូនប្រជាពលរដ្ឋ អំពីកង្វះខាតការរៀបចំបណ្ដាញលូទឹកកខ្វក់ ដោយស្នើឱ្យជំរុញការជំរឿនកិច្ចការងារ ដើម្បីជ្រើសទីតាំងធ្វើប្រព្រឹត្តិកម្មទឹកកខ្វក់នៅរាជធានីភ្នំពេញឱ្យបានឆាប់។ គម្រោងនេះត្រូវបានចាប់ផ្តើមសិក្សានៅខែមីនា ឆ្នាំ២០២១ ហើយគ្រោងនឹងបញ្ចប់នៅខែមិថុនា ឆ្នាំ២០២២នេះ។ រហូតមកដល់ថ្ងៃនេះគម្រោងបានបញ្ចប់ការសិក្សាវាយតម្លៃស្ថានភាពប្រព័ន្ធអនាម័យ ការសិក្សាអង្កេតតាមខ្នងផ្ទះ ការសិក្សាលទ្ធភាពជំរាបនៃស្រទាប់ដី ការសិក្សាលើប្រតិបត្តិករផ្តល់សេវាបូមលូ ការចុះអង្កេតលើការគ្រប់គ្រង និងប្រើប្រាស់បង្គន់សាធារណៈ ការចុះអង្កេតសហគ្រាសប្រើប្រាស់ទឹកច្រើន (រោងចក្រ) ការសិក្សាគុណភាពទឹក។ល។ក្នុងមូលដ្ឋានរាជធានីភ្នំពេញទាំងមូល ក្រៅពីការសិក្សាវាស់វែង និងធ្វើអង្កេតខាងលើ ក្រុមសិក្សាគម្រោងបានជួបប្រជុំពិគ្រោះយោបល់ជាមួយស្ថាប័នពាក់ព័ន្ធជាច្រើនដើម្បីទទួលបានធាតុផ្សំគ្រប់ជ្រុងជ្រោយសម្រាប់រៀបចំ ផែនការមេស្តីពីប្រព័ន្ធអនាម័យសម្រាប់ទាំងអស់គ្នាក្នុងទីក្រុងទាំងមូលបានល្អប្រសើរ មុននឹងដាក់ជូនស្ថាប័នអនុវត្តគម្រោងទាំងពីរគឺ ក្រសួងសាធារណការ និងដឹកជញ្ជូន និងរដ្ឋបាលរាជធានីភ្នំពេញ ពិនិត្យ និងផ្តល់អនុសាសន៍បន្ថែម មុនដាក់រាជរដ្ឋាភិបាលសម្រេច៕