ភ្នំពេញ ៖ ឯកឧត្តមរដ្ឋលេខាធិការ ឈួន វិន ទទួលបន្ទុកជាប្រធានលេខាធិការដ្ឋានគ្រប់គ្រង គ្រោះមហន្តរាយ របស់ក្រសួងសាធារណការ និងដឹកជញ្ជូន បានជំរុញឱ្យគ្រប់អង្គភាពក្រោមឱវាទ បន្តយកចិត្តទុកដាក់លើគ្រប់ដំណាក់កាល នៃការគ្រប់គ្រងគ្រោះមហន្តរាយ ដើម្បីទប់ស្កាត់ បង្ការ ស្ដារឡើងវិញ និងរាយការណ៍ឱ្យបានទាន់ពេលវេលា។ អង្គប្រជុំបានពិភាក្សាយ៉ាងផុសផុល និងបានរាយការណ៍អំពីលទ្ធផលការងាររបស់លេខាធិការដ្ឋានគ្រប់គ្រងគ្រោះមហន្តរាយ ពីគ្រប់បណ្ដាអគ្គនាយកដ្ឋានពាក់ព័ន្ធ និងបានរំឭកពីក្របខ័ណ្ឌការងារគ្រប់គ្រងគ្រោះ មហន្តរាយទាក់ទងនឹងសកម្មភាពត្រៀម បង្ការ និងកាត់បន្ថយគ្រោះថ្នាក់ សកម្មភាពត្រៀមរៀបចំសកម្មភាពឆ្លើយតប និងសង្គ្រោះបន្ទាន់ និងសកម្មភាពស្តារឡើងវិញ ព្រមទាំង បាន លើកឡើងពីផែនការសកម្មភាពគាំទ្រ នៅក្នុងផែនការសកម្មភាពជាតិ សម្រាប់ការកាត់បន្ថយហានិភ័យគ្រោះមហន្តរាយ ២០១៩-២០២៣ ដែលរួមមាន ១) បន្តការផ្សព្វផ្សាយ និងបណ្តុះបណ្តាលស្តីពីការគ្រប់គ្រង និងការកសាងហេដ្ឋារចនាសម្ព័ន្ធ ដឹកជញ្ជូន ដែលធន់នឹងការប្រែប្រួលអាកាសធាតុ ដើម្បីរួមចំណែកលើកកម្ពស់វិស័យដឹកជញ្ចូនប្រកបដោយចីរភាព និងនវានុវត្តន៍ ២) បន្តរៀបចំបទដ្ឋានបច្ចេកទេស និងគំនូសប្លង់ និងសាងសង់ ជួសជុលហេដ្ឋារចនាសម្ព័ន្ធដឹកជញ្ជូន ដែលធន់នឹងការប្រែប្រួល អាកាសធាតុ និង ៣) បន្តបណ្តុះបណ្តាល និងពង្រឹងសមត្ថភាពលើបទដ្ឋានបច្ចេកទេស និងការសិក្សាគម្រោងសាងសង់ ជួសជុល ហេដ្ឋារចនាសម្ព័ន្ធដឹកជញ្ជូន។ ថ្លែងក្នុងកិច្ចប្រជុំស្តីពីការត្រៀម រៀបចំរបាយការណ៍ឆមាសទី១ ឆ្នាំ២០២២ ទាក់ទងនឹងការគ្រប់គ្រងគ្រោះមហន្តរាយ នៃវិស័យ សាធារណការ និងដឹកជញ្ជូន កាលពីថ្ងៃទី១៩ ខែមេសា ឆ្នាំ២០២២ ឯកឧត្តមប្រធានលេខាធិការដ្ឋាន បានជំរុញឱ្យគ្រប់អង្គភាព ក្រោមឱវាទក្រសួងទាំងថ្នាក់ជាតិ និងថ្នាក់ក្រោមជាតិបន្តយកចិត្តទុកដាក់លើគ្រប់ដំណាក់កាលនៃការគ្រប់គ្រងគ្រោះមហន្តរាយ ដើម្បីទប់ស្កាត់ បង្ការ ស្ដារឡើងវិញ និងរាយការណ៍ឱ្យបានទាន់ពេលវេលា។ ឯកឧត្តមប្រធានក៏បានស្នើឱ្យអគ្គនាយកដ្ឋានពាក់ព័ន្ធបន្តផ្សព្វផ្សាយ បណ្ដុះបណ្ដាល និងពង្រឹងសមត្ថភាពលើការងារគ្រប់គ្រង កសាង និងជួសជុលហេដ្ឋារចនាសម្ព័ន្ធដឹកជញ្ជូន ដូចមានចែងនៅក្នុងផែនការសកម្មភាពជាតិ សម្រាប់ការកាត់បន្ថយហានិភ័យ គ្រោះមហន្តរាយ២០១៩-២០២៣ តាមរយៈការរៀបចំជាទម្រង់សម្រាប់តាមដាន ត្រួតពិនិត្យ និងវាយតម្លៃលទ្ធផល ឱ្យសម្រេចបាន តាមផែនការ៕