ឯកឧត្តមរដ្ឋលេខាធិការ សួន រចនា ដឹកនាំគណៈប្រតិភូក្រសួងចូលរួមពិធីប្រកាសផ្សព្វផ្សាយ និងដាក់ឱ្យអនុវត្តជាផ្លូវការកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទីពីរ (២០២១-២០៣០) នៅសណ្ឋាគារសុខា ក្រោមអធិបតីភាពដ៏ខ្ពង់ខ្ពស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃ រាជធានីភ្នំពេញ៖ ថ្ងៃចន្ទ ៤រោច ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២១ ខែមីនា ឆ្នាំ ២០២២ ឯកឧត្តម សួន រចនា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួងចូលរួមពិធីប្រកាសផ្សព្វផ្សាយ និងដាក់ឱ្យអនុវត្តជាផ្លូវការកម្មវិធីជាតិសម្រាប់ការ អភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិដំណាក់កាលទីពីរ (២០២១-២០៣០) ក្រោមអធិបតីភាពដ៏ខ្ពង់ខ្ពស់សម្ដេចក្រឡា ហោម ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យ (គ.ជ.អ.ប)។ ដោយឡែកនៅទីស្តីការក្រសួង ឯកឧត្តមអនុរដ្ឋលេខាធិការ គឹម សាន់ ដឹកនាំក្រុមការងារក្រសួងចូលរួមពិធីប្រកាសផ្សព្វផ្សាយ និងដាក់ឱ្យអនុវត្តជាផ្លូវការកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទីពីរ (២០២១-២០៣០) តាមប្រព័ន្ធវីដេអូពីចម្ងាយផងដែរ។ ពិធីប្រកាសផ្សព្វផ្សាយនេះបានប្រព្រឹត្តទៅនៅសណ្ឋាគារសុខាភ្នំពេញ ដោយមានការចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីថ្នាក់ដឹកនាំនៃក្រសួង-ស្ថាប័ននៅថ្នាក់ជាតិ និងថ្នាក់ក្រោមជាតិ ដៃគូ អភិវឌ្ឍន៍ និងអង្គការសង្គមស៊ីវិលពាក់ព័ន្ធនានា ក្នុងគោលបំណងដើម្បីបង្ហាញពីសមិទ្ធផល និងបញ្ហា ប្រឈមនៃកិច្ចដំណើរការកំណែទម្រង់វិមជ្ឈការ និងវិសហមជ្ឈការក្នុងអំឡុងពេលនៃការអនុវត្តកម្មវិធីជាតិ សម្រាប់ការអនុវត្តតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី១ (២០១០ -២០២០) ព្រមទាំងផ្សព្វផ្សាយពីចក្ខុវិស័យគោលបំណង គោលដៅ សមិទ្ធផលរំពឹងទុក និងបេសកកម្មនៃកម្មវិធីជាតិ ដំណាក់កាលទីពីរ (២០២១-២០៣០)។ ពិធីនេះមានការធ្វើបទបង្ហាញស្ដីអំពីវឌ្ឍនភាព និងបញ្ហាប្រឈមនៃការអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទីមួយ (២០១០-២០២០) និងបទបង្ហាញអំពីកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទីពីរ (២០២១-២០៣០) ផងដែរ។ ថ្លែងទៅកាន់អង្គពិធីនាឱកាសនោះ សម្ដេចក្រឡាហោមឧបនាយករដ្ឋមន្ត្រី បានគូសបញ្ជាក់ថា៖ វិមជ្ឈការ និងវិសហមជ្ឈការត្រូវបានចាត់ទុកជាយុទ្ធសាស្ត្រ និងគោលនយោបាយសាធារណៈដ៏មានប្រសិទ្ធភាពខ្ពស់ប្រកបដោយប្រជាប្រិយភាពក្នុងការលើកកម្ពស់អភិបាលកិច្ច និងការគ្រប់គ្រងការផ្ដល់សេវាសាធារណៈ ឆ្លើយតបបានយ៉ាងឆាប់រហ័សទៅនឹងតម្រូវការចាំបាច់របស់ប្រជាពលរដ្ឋ និងបានបន្ថែមទៀតថា៖ ប្រព័ន្ធវិមជ្ឈការ និងវិសហមជ្ឈការ ត្រូវបានអនុវត្តនៅក្នុងការរៀបចំប្រព័ន្ធគ្រប់គ្រងរដ្ឋបាលថ្នាក់ក្រោមជាតិ ឬរដ្ឋបាលមូលដ្ឋាន នៅតាមបណ្ដាប្រទេសជាច្រើននៅលើពិភពលោក មិនថាប្រទេសនោះតូច ឬប្រទេសធំ ជារដ្ឋទោល ឬជារដ្ឋសហព័ន្ធ និងមិនថាប្រទេសនោះប្រកាន់របបនយោបាយបែបណានោះឡើយ។ បន្ថែមពីលើនេះ សម្តេចបានកត់សម្គាល់ថាផងដែរ ប្រព័ន្ធនេះបានផ្ដល់ការទទួលខុសត្រូវ និងភាពជា ម្ចាស់ទៅឱ្យរដ្ឋបាលថ្នាក់ក្រោមជាតិ ដែលនៅកៀកនឹងប្រជាពលរដ្ឋ ដើម្បីធ្វើសេចក្តីសម្រេចចិត្តពីការផ្ដល់សេវាសាធារណៈចាំបាច់នានាក្នុងដែនសមត្ថកិច្ចរបស់ខ្លួន ដោយហេតុថារដ្ឋបាលថ្នាក់ក្រោមជាតិដឹងសុខ ទុក្ខ និងតម្រូវការរបស់ប្រជាពលរដ្ឋយ៉ាងច្បាស់ហើយក៏អាចរៀបចំផែនការ មានមធ្យោបាយដោះស្រាយ និងអាចធ្វើសេចក្តីសម្រេចចិត្តបានត្រឹមត្រូវក្នុងការឆ្លើយតបសំណូមពរនិងតម្រូវការនានារបស់ប្រជាពល រដ្ឋបានយ៉ាងសមស្រប និងមានប្រសិទ្ធភាពខ្ពស់។ សូមបញ្ជាក់ជូនថា៖ រាជរដ្ឋាភិបាលកម្ពុជា បានដាក់ចេញនូវចក្ខុវិស័យសម្រាប់កំណែទម្រង់ការអភិវឌ្ឍ តាមបែបប្រជាធិបតេយ្យ នៅថ្នាក់ក្រោមជាតិក្នុងរយៈពេល១០ឆ្នាំខាងមុខ (ឆ្នាំ២០២១ ដល់ឆ្នាំ២០៣០) ដើម្បីឱ្យប្រជាពលរដ្ឋទទួលបានសេវាសាធារណៈ និងផលប្រយោជន៍ពីការអភិវឌ្ឍមូលដ្ឋានរបស់រដ្ឋបាល ថ្នាក់ក្រោមជាប្រកបដោយបរិយាប័ន្ន និងសមធម៌សង្គម រួមចំណែកសម្រេចឱ្យបាននូវគោលបំណងដ៏ទូលំទូលាយក្នុងការអភិវឌ្ឍសេដ្ឋកិច្ច និងសង្គមជាតិ និងប្រែក្លាយកម្ពុជាទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០៕