សៀមរាប៖ នៅរសៀលថ្ងៃទី០១ ខែមីនា ឆ្នាំ២០២១នេះ លោក ង៉ាន់ ភិរុណ អភិបាលរងខេត្តសៀមរាប បានដឹកនាំក្រុមការបច្ចេកទេសចុះពិនិត្យ វឌ្ឍនភាពគម្រោងសាងសង់ហេដ្ឋារចនាសម្ព័ន្ធផ្លូវ ៣៨ខ្សែ ក្នុងក្រុងសៀមរាប ដោយបានផ្តោតសំខាន់ទៅលើការពិនិត្យលើប្រព័ន្ធលូបង្ហូរទឹកភ្លៀង និងសុវត្ថិភាពចរាចរណ៍ ព្រមទាំងសណ្តាប់ធ្នាប់តាមការដ្ឋាន។ លោក ង៉ាន់ ភិរុណ មានប្រសាសន៍ថា ការចុះពិនិត្យនេះធ្វើឡើងក្នុងគោលបំណងតាមដានមើលពីសកម្មភាពផ្ទាល់ ក្នុងការអនុវត្តរបស់ក្រុមការងារដោយត្រូវពិនិត្យឲ្យបានខ្ជាប់ខ្ជួនតាមបទដ្ឋានបច្ចេកទេសប្រកបដោយការទទួលខុសត្រូវខ្ពស់ ក៏ដូចជាដើម្បីពិនិត្យគុណភាពនៃការសាងសង់ប្រព័ន្ធលូបង្ហូរទឹកភ្លៀង និងប្រព័ន្ធលូទឹកកខ្វក់ ដែលអាចធានាបានគុណភាពល្អ អាចប្រើប្រាស់បានយូរអង្វែង ក្នុងការកាត់បន្ថយភាពខ្ជះខ្ជាយថវិកាជាតិ និង ខាតបង់ពេលវេលាផងដែរ។ ចំពោះការសាងសង់នេះត្រូវពិនិត្យជាពិសេសទៅលើលក្ខណៈបច្ចេកទេសសាងសង់ និងការអនុវត្តតាមលក្ខខណ្ឌតម្រូវ នៃស្តង់ដាបច្ចេកទេសធានាបាននូវគុណភាពជាប់រឹងមាំ និងប្រើប្រាស់បានយូរអង្វែងតាមអាយុកាលមានប្រសិទ្ធភាពខ្ពស់ និងសម្រេចការងារឱ្យបានទាន់ពេលវេលា។ ជាមួយគ្នានេះលោកអភិបាលរងខេត្ត ក៏ដូចជាអាជ្ញាធរខេត្ត បានសំណូមពរដល់ប្រជាពលរដ្ឋដែលរស់នៅតាមដងផ្លូវ សុំមានការយោគយល់ អធ្យាស្រ័យ អត់ធ្មត់ចំពោះការរំខាន និងផលប៉ះពាល់ដោយសារដំណើរការការដ្ឋានសាងសង់ដោយតម្រូវឲ្យបិទចរាចរណ៍ជាបណ្តោះអាសន្ន ដើម្បីសម្រួលដល់ដំណើរការសាងសង់ រៀបចំដាក់បណ្តាញលូទឹកភ្លៀង លូទឹកកខ្វល់ ទឹកស្អាត បណ្តាញអគ្គិសនី និងខ្សែកាប។ ក្នុងនោះក៏សូមឲ្យប្រជាពលរដ្ឋក្នុងខេត្តទាំងអស់ចូលរួមសហការល្អជាមួយនឹងអាជ្ញាធរមានសមត្ថកិច្ច និងក្រុមការងារបច្ចេកទេស ដើម្បីឲ្យដំណើរការគម្រោងស្ថាបនាផ្លូវ៣៨ខ្សែនេះ អនុវត្តទៅដោយរលូន និងអាចប្រែក្លាយទីក្រុងសៀមរាបទៅជាទីក្រុងទំនើប ជាតំបន់ស្នូលនៃប៉ូលអភិវឌ្ឍជាតិ ជាគោលដៅទេសចរណ៍ វប្បធម៌ ប្រវត្តិសាស្រ្ត និងធម្មជាតិលើកកម្ពស់សោភ័ណភាពក្រុង ឲ្យស័ក្កិសមជាទីក្រុងទេសចរណ៍ប្រវត្តិសាស្ត្រផងដែរ។ សូមជម្រាបផងដែរថា គម្រោងផ្លូវ ៣៨ខ្សែក្នុងក្រុងសៀមរាប បានអនុវត្តដោយអង្គភាពសាងសង់ចំនួន០៨ រួមមាន ទី១-កងវិស្វកម្មលេខ ១៧៨ស្ពាន-ថ្នល់ នៃនាយកដ្ឋានវិស្វកម្ម, ទី២-កងវិស្វកម្មសម្តេចតេជោ ខេត្តសៀមរាប ,ទី៣-កងវិស្វកម្មតេជោ ហ៊ុន សែន សៀមរាប ,ទី៤-អគ្គនាយកដ្ឋាន សាធារណការ ,ទី៥-អគ្គនាយកដ្ឋានប្រព័ន្ធចម្រោះទឹកកខ្វក់ ,ទី៦-នាយកដ្ឋាន គ្រឿងចក្រនិងស្ថាបនាផ្លូវ ,ទី៧- នាយកដ្ឋាន ជួសជុល និងថែទាំផ្លូវថ្នល់ និង ទី៨-មន្ទីរសាធារណការ និងដឹកជញ្ជូន ខេត្តសៀមរាប។ ដោយគិតត្រឹមថ្ងៃទី០១ ខែមីនា ឆ្នាំ២០២១ សម្រេចលទ្ធផលការងារបានជិត២០%ហើយ៕