សិក្ខាសាលាស្ដីពីការប្រើប្រាស់បច្ចេកវិទ្យា ក្នុងការតាមដាន និងអង្កេតស្ថានភាពគ្រឿងបង្គុំនៃស្ពាន ទីស្តីការក្រសួង៖ នាថ្ងៃពុធ ទី២២ ខែតុលា ឆ្នាំ២០២៥ ឯកឧត្តម ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ បានចូលរួមបើកសិក្ខាសាលាចែករំលែកចំណេះដឹងស្ដីពី ការប្រើប្រាស់បច្ចេកវិទ្យា ក្នុងការតាមដាន និងអង្កេតស្ថានភាពគ្រឿងបង្គុំនៃស្ពាន ដោយមានការចូលរួមផ្ដល់បទបង្ហាញពីសំណាក់អ្នកជំនាញការនៃក្រុមហ៊ុន N-Plus ពីប្រទេសអ៊ីតាលី ជូនដល់ថ្នាក់ដឹកនាំ និងមន្ដ្រីរាជការនៃក្រសួងសាធារណការ និងដឹកជញ្ជូន និងមន្ទីរសាធារណការ និងដឹកជញ្ជូនរាជធានីខេត្ត។ សិក្ខាសាលានេះ បានផ្ដល់ការចែករំលែកចំណេះដឹង និងបច្ចេកវិទ្យា ដែលជាគំនិតនវានុវត្ដន៍ថ្មី ក្នុងការតាមដាន និងអង្កេតស្ថានភាពគ្រឿងបង្គុំស្ពាន ដែលនឹងចូលរួមចំណែកយ៉ាងសំខាន់ដល់ការពង្រឹងសមត្ថភាព និងជួយសម្រួលដល់ការអនុវត្តការងារអង្កេតត្រួតពិនិត្យ និងថែទាំស្ពាន ជាមួយការប្រើប្រាស់ប្រព័ន្ធសេនស័រ និងឧបករណ៍សម្រាប់តេស្ដគ្រឿងបង្គុំ ភ្ជាប់ជាមួយកម្មវិធី (Software) Structural Health Monitoring ដែលហៅកាត់ថា SHM ដែលជួយសន្សំសំចៃថវិកា ចំណេញពេលវេលា បូករួមទាំងប្រសិទ្ធភាពខ្ពស់ក្នុងការអភិវឌ្ឍវិស័យហេដ្ឋារចនាសម្ព័ន្ធស្ពាននៅក្នុងប្រទេសកម្ពុជា៕