ទីបំផុតរង្វង់មូលប្រាសាទកំពូលប្រាសាទបី នៅក្រុងប៉ោយប៉ែតគ្រោងចំណាយថវិកាប្រមាណជាង ៥០ ម៉ឺនដុល្លារ ដែល​ផ្តួចផ្តើម​សាងសង់ដោយ​លោក សាន ស៊ានហូ អតីតអភិបាល​ក្រុងប៉ោយប៉ែត បានធ្វើការវាយកម្ទេចវិញហើយតាំងពីថ្ងៃទី ១២ ខែតុលា ២០២០ មកម្ល៉េះ បន្ទាប់ពីមានការបញ្ជាឱ្យរុះរើពីសំណាក់ក្រសួងមហាផ្ទៃនៃព្រះរាជាណាចក្រកម្ពុជា ។ ជុំវិញមូលហេតុនាំឱ្យមានការបញ្ជាឱ្យរុះរើរង្វង់មូលខាងលើនេះចេញវិញ តាម​លិខិត​មួយ​ច្បាប់​របស់​ក្រសួងមហាផ្ទៃ ផ្ញើទៅ​កាន់​អភិបាល​ខេត្ត​បន្ទាយមានជ័យ បាន​បញ្ជាក់ថា ការ​ឱ្យ​រុះរើនេះ គឺ​ដោយ​សារ​តែសំណង់អគារ​ច្រកទ្វារអន្តរជាតិ​ប៉ោយប៉ែត គឺមាន​រូប​ប្រាសាទ​កំពូលបី និង ​មាន​រចនា​បទ​ជា​ខ្មែរ​រួចទៅហើយ ហេតុនេះពុំ​ចាំបាច់សាងសង់ទៀតឡើយ ។ ម្យ៉ាងទៀត គឺ​ដើម្បីចៀសវាង​ផលប៉ះពាល់​ដល់​ប្រព័ន្ធ​ការពារ​សុវត្ថិភាព​ស្វ័យប្រវត្តិ នៃ​រនាំងបាំងផ្លូវ​រថភ្លើងឆ្លង​កាត់​ផ្លូវជាតិ និង ​កិច្ច​ព្រមព្រៀង​ដឹកជញ្ជូន​ផ្លូវដែករវាង​ព្រះរាជាណាចក្រ​កម្ពុជា និង​ព្រះរាជាណាចក្រ​ថៃ។ សូមបញ្ជាក់ថា គម្រោងសង់រង្វង់មូលឋានសួគ៌ប្រាសាទកំពូល ៣ នេះបានបញ្ចុះបឋមសិលាកាលពីឆ្នាំ ២០១៨ ដោយមានគណអធិបតីសំខាន់ៗជាច្រើននាក់ ព្រមទាំងមានការចូលរួមពីប្រជាពលរដ្ឋ សិស្សានុសិស្សរាប់ពាន់នាក់ ។ តាមគ្រោងការសាងសង់រង្វង់មូលនេះ មានតម្លៃជាង ៥០ ម៉ឺនដុល្លារ មានកម្ពស់២៣ម៉ែត្រ និងទំហំ៤១ម៉ែត្រ ៕