ភ្នំពេញ៖ មន្ត្រីជំនាញក្រសួងសាធារណការ និងដឹកជញ្ជូន បានអះអាងថា ការទិញ-លក់រថយន្តដែលបានផ្ទេរកម្មសិទ្ធិ នៅទូទាំងប្រទេស គិតត្រឹមពេលនេះ មានរថយន្តប្រមាណ ១០ម៉ឺនគ្រឿង ដែលស្មើនឹង ៦០ភាគរយ នៃរថយន្តត្រូវបានទិញ-លក់សរុប នៅកម្ពុជា។ លោក ឈួន វ៉ន់ អគ្គនាយកនៃអគ្គនាយកដ្ឋានដឹកជញ្ជូនផ្លូវគោក បានឱ្យដឹងថា យានយន្តដែលបានចុះបញ្ជី តាំងពីឆ្នាំ១៩៩០ រហូតដល់ខែសីហា ឆ្នាំ២០២០ មានប្រមាណជាង ៥,៧លានគ្រឿង ក្នុងនោះម៉ូតូមានប្រមាណជិត ៥លានគ្រឿង និងរថយន្តប្រមាណជាង ៨០ម៉ឺនគ្រឿង។ លោកបញ្ជាក់ថា មានតែរថយន្តប្រមាណ ១០ម៉ឺនគ្រឿងប៉ុណ្ណោះ ដែលបានផ្ទេរកម្មសិទ្ធិ ដែលភាគច្រើនគឺរថយន្តធន់ស្រាល ពោលគឺមានជាង ៦០ភាគរយ នៃចំនួនសរុប។ ហើយថា តួលេខនេះ គឺស្ថិតនៅទាបនៅឡើយ។ លោកបានអំពាវនាវ ឱ្យអ្នកដែលទិញ-លក់រថយន្តទាំងអស់ មកផ្ទេរកម្មសិទ្ធិ ដើម្បីទទួលបានភាពស្របច្បាប់ នៃការកាន់កាប់យានយន្តរបស់ខ្លួន។ កាលពីម្សិលមិញនេះ ក្រសួងសាធារណការ និងដឹកជញ្ជូន និងអង្គភាពពន្ធដារ បានបើកឱ្យដំណើរការជាផ្លូវការប្រព័ន្ធស្វ័យប្រវត្តិកម្មផ្ទេរកម្មសិទ្ធិយានជំនិះ មណ្ឌលផ្ដល់សេវាសាធារណៈនៅផ្សារទំនើបជីបម៉ុង ណូរ៉ូម៉ល ដើម្បីធ្វើទំនើបកម្មសេវាសាធារណៈ និងបង្ខិតសេវាសាធារណៈឱ្យកាន់តែកៀកប្រជាពលរដ្ឋ សំដៅឱ្យការផ្ដល់និងទទួលសេវាសាធារណៈកាន់តែងាយស្រួល រហ័សទាន់ចិត្ត ស្របតាមប្រសាសន៍សម្ដេចតេជោនាយករដ្ឋមន្ត្រីគឺ ធ្វើឱ្យបានលឿន ធ្វើឱ្យមានប្រសិទ្ធភាព និងធ្វើឱ្យមានតម្លាភាពផងដែរ។ ក្រសួងសាធារណការ និងដឹកជញ្ជូន បានឱ្យដឹងថា តាមរយៈប្រព័ន្ធស្វ័យប្រវត្តិកម្មផ្ទេរកម្មសិទ្ធិយានជំនិះនេះ ម្ចាស់យានជំនិះអាចដាក់ពាក្យស្នើសុំផ្ទេរកម្មសិទ្ធិយានជំនិះ បង់ថ្លៃសេវា និងពន្ធប្រថាប់ត្រានៅកន្លែង និងពេលតែមួយតាមរយៈគេហទំព័រ vehicle.mpwt.gov.kh ឬទៅកាន់ទីតាំងផ្ដល់សេវារបស់ក្រសួង ដោយហេតុថា ក្រសួងបានសហការតភ្ជាប់ប្រព័ន្ធស្វ័យប្រវត្តិកម្មនេះជាមួយនឹងប្រព័ន្ធរបស់អគ្គនាយពន្ធដាររួចហើយ។ តាមក្រសួងសាធារណការ និងដឹកជញ្ជូន បានឱ្យដឹងថា ដើម្បីប្រើប្រាស់ជម្រើសណាមួយក្នុងជម្រើសទាំងពីរនៃការផ្ទេរកម្មសិទ្ធិយានជំនិះ ម្ចាស់យានជំនិះត្រូវមានព័ត៌មានគ្រប់គ្រាន់អំពីយានជំនិះ លិខិតទិញ-លក់ ព័ត៌មានអ្នកលក់ និងព័ត៌មានអ្នកទិញ ។ល។ ដើម្បីឱ្យការផ្ដល់ និងទទួលសេវានេះកាន់តែលឿន៕