សៀមរាប៖ នៅក្នុងឆ្នាំ២០២៦តទៅ ក្រសួងសាធារណការ និងដឹកជញ្ជូន នឹងរៀបចំឱ្យមានស្លាកលេខ សម្គាល់យានយន្តអគ្គិសនីដោយឡែក គ្រប់យានយន្តទាំងម៉ូតូ ឡាន ដែលមានបន្ថែម Logo-EV ពណ៌បៃតង ដើម្បីងាយស្រួលសម្គាល់ថាជាប្រភេទយានយន្តមេត្រីភាពចំពោះបរិស្ថាន។យោងតាមការចុះផ្សាយរបស់ក្រសួងព័ត៌មាន ដែលស្រង់សំដីពីអ្នកនាំពាក្យក្រសួងសាធារណការ និងដឹកជញ្ជូន ការបន្ថែម Logo-EV ពណ៌បៃតង ធ្វើឡើងនៅគ្រាប់ស្លាកលេខ រាជធានី-ខេត្ត និងស្លាកលេខពិសេសផ្ទាល់ខ្លួន ដើម្បីងាយស្រួលសម្គាល់ថាជារថយន្តអគ្គិសនី។ តាមរបាយការណ៍របស់ក្រសួង ក្នុងឆ្នាំ២០២៤ ការចុះបញ្ជីរថយន្ត និងម៉ូតូអគ្គិសនី មានចំនួន ៣ ៥០៨គ្រឿង ក្នុងនោះទោចក្រយានចំនួន ៩៤គ្រឿង ត្រីចក្រយាន ១ ១៦១គ្រឿង និងរថយន្ត ២ ២៥៣គ្រឿង។ គិតត្រឹមខែកញ្ញា ឆ្នាំ២០២៥ យានយន្តអគ្គិសនីដែលបានចុះបញ្ជីមានចំនួន ១០ ៥៦៨គ្រឿង និងទោចក្រយានយន្តចំនួន ២ ៧១០គ្រឿង។ សូមជម្រាបថា រាជរដ្ឋាភិបាលបានដាក់ចេញនូវគោលនយោបាយជាតិស្តីពីការអភិវឌ្ឍវិស័យយានយន្ត អគ្គិសនីឆ្នាំ២០២៤-២០៣០ ក្នុងបំណងប្រែក្លាយកម្ពុជាទៅជាប្រទេសដែលមានការប្រើប្រាស់យានយន្ត អគ្គិសនីក្នុងកម្រិតល្អប្រសើរ ដើម្បីគាំទ្រការអភិវឌ្ឍប្រកបដោយចីរភាព និងសុខុមាលភាពប្រជាពលរដ្ឋ ដោយមានគោលដៅជំរុញការប្រើប្រាស់យានយន្តអគ្គិសនីចំនួន ៣០ ០០០គ្រឿង ទោចក្រយានយន្តអគ្គិសនី ៧២០ ០០០គ្រឿង និងត្រីចក្រយានយន្តអគ្គិសនីចំនួន ២០ ០០០គ្រឿង៕