ភ្នំពេញ ៖ ក្នុងពិធីចុះហត្ថលេខាលើកិច្ចសន្យា រវាងអង្គភាពគ្រប់គ្រងគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង (PMU-UIDP) ជាមួយនឹងសម្ព័ន្ធក្រុមហ៊ុន KUNHWA ENGINEERING & CONSULTING CO., LTD. ក្រោមហិរញ្ញប្បទានឥតសំណងពីមូលនិធិពិសេសសម្រាប់ការរៀបចំគម្រោង (Project Preparation Special Fund - PPSF) របស់ ធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដើម្បីអនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង (Urban Infrastructure Development Project - UIDP) កាលពីថ្ងៃទី១៩ ខែមករា ឆ្នាំ២០២៦ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានមានប្រសាសន៍ថា ពិធីចុះហត្ថលេខានាពេលនេះ គឺជាព្រឹត្តិការណ៍ដ៏សំខាន់មួយដែលបង្ហាញពីការចាប់ផ្តើមអនុវត្តន៍ការងារបច្ចេកទេសជាក់ស្តែង បន្ទាប់ពីអង្គភាពគ្រប់គ្រងគម្រោងបានបញ្ចប់និតិវិធីលទ្ធកម្មប្រកបដោយជោគជ័យ។ ឯកឧត្តម បានបន្តថា គម្រោងអភិវឌ្ឍន៍ហេដ្ឋារចនាសម្ព័ន្ធទីក្រុងនេះ ផ្តោតលើសេវាផ្គត់ផ្គង់ទឹកស្អាត អនាម័យ និងការគ្រប់គ្រងសំណល់រឹង ខណៈដែលគម្រោងនេះនឹងអនុវត្តន៍ក្នុងក្រុងគោលដៅចំនួន៤ គឺក្រុងកំពង់ឆ្នាំង ក្រុងកំពង់ចាម ក្រុងដូនកែវ និងក្រុងព្រៃវែង ដើម្បីឆ្លើយតបនឹងកំណើនប្រជាជននិងភាពងាយរងគ្រោះដោយសារការប្រែប្រួលអាកាសធាតុ ក្នុងការរួចចំណែកឈានទៅសម្រេចគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ។ ឯកឧត្តម បានបន្តបន្ថែមថា គម្រោងនេះនឹងរួមចំណែកដល់ការការពារនិងការលើកកម្ពស់គុណភាពទឹក អនាម័យ បរិស្ថាន សុខមាលភាព និងជីវភាពរស់នៅប្រចាំថ្ងៃរបស់ប្រជាពលរដ្ឋដែលរាជរដ្ឋាភិបាលបានចាត់ទុកថា ជាអាទិភាព។ សូមជម្រាបថា ពិធីចុះហត្ថលេខាលើកិច្ចសន្យាផ្តល់សេវាទីប្រឹក្សា រវាងអង្គភាពគ្រប់គ្រងគម្រោងអភិវឌ្ឍន៍ហេដ្ឋារចនា សម្ព័ន្ធទីក្រុង (Urban Infrastructure Development Project- UIDP) និងសម្ព័ន្ធក្រុមហ៊ុនដឹកនាំដោយក្រុមហ៊ុន Kunhwa Engineering & Consulting Co., Ltd. សម្រាប់ការរៀបចំរបាយការណ៍សិក្សាសមិទ្ធលទ្ធភាព (FSR) របាយការណ៍វាយតម្លៃផលប៉ះពាល់បរិស្ថាន និងសង្គម (ESIAR) និងប្លង់បច្ចេកទេសលម្អិត (DED) លើគម្រោងប្រព័ន្ធប្រព្រឹត្តកម្មទឹកកខ្វក់ និងប្រព័ន្ធរំដោះទឹក សម្រាប់ក្រុងចំនួន ៤ គឺ ក្រុងកំពង់ឆ្នាំង ក្រុងកំពង់ចាម ក្រុងដូនកែវ (ខេត្តតាកែវ) និងក្រុងព្រៃវែង និងគម្រោងទីលានទុកដាក់សំរាមស្តង់ដារ និងហេដ្ឋារចនាសម្ព័ន្ធគ្រប់គ្រងសំណល់ សម្រាប់ក្រុងដូនកែវ និងក្រុងព្រៃវែង៕