សេចក្តីព្រាងអនុក្រឹត្យស្តីពីបែបបទ និងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ កំពុងស្ថិតក្នុងដំណាក់កាលពិនិត្យពិភាក្សាបន្ត ក្នុងគោលបំណងដើម្បីរៀបចំនីតិវិធីជាក់លាក់សម្រាប់ការប្រមូលប្រាក់ពីអ្នកប្រើប្រាស់ប្រព័ន្ធលូ ឱ្យមានប្រសិទ្ធភាព ទីស្តីការគណៈរដ្ឋមន្ត្រី៖ នាថ្ងៃសុក្រ ទី២៦ ខែធ្នូ ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន អញ្ជើញដឹកនាំក្រុមការងាររៀបចំលិខិតបទដ្ឋានគតិយុត្តក្នុងក្របខ័ណ្ឌច្បាប់ស្តីពីប្រព័ន្ធទឹកកខ្វក់ ចូលរួមកិច្ចប្រជុំចង្អៀតដើម្បីពិនិត្យពិភាក្សាបន្តលើ សេចក្តីព្រាងអនុក្រឹត្យស្តីពីបែបបទនិងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ ក្រោមអធិបតីភាព ឯកឧត្តម លីវ សុវណ្ណា អនុប្រធាន និងជាប្រធានក្រុមការងារទី៤ នៃក្រុមប្រឹក្សាអ្នកច្បាប់ និងឯកឧត្តម នៅ បោនន័រ អនុប្រធាន និងជាប្រធានក្រុមការងារទី១ នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ដោយមានការអញ្ជើញចូលរួមពី ក្រុមការងាររៀបចំលិខិតបទដ្ឋានគតិយុត្តក្នុងក្របខ័ណ្ឌច្បាប់ស្តីពីប្រព័ន្ធទឹកកខ្វក់ នៃក្រសួងសាធារណការ និងដឹកជញ្ជូន ឯកឧត្តម-លោកជំទាវ ក្រុមការងារអ្នកច្បាប់ ក្រុមការងារក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ នៃទីស្តីការគណៈរដ្ឋមន្ត្រី ឯកឧត្តមរដ្ឋលេខាធិការ មកពីតំណាងក្រសួងស្ថាប័នពាក់ព័ន្ធ សរុបចំនួន ៦០រូប។ កិច្ចប្រជុំនេះរៀបចំឡើងដើម្បីពិនិត្យពិភាក្សា និងផ្លាស់ប្ដូរយោបល់បន្តលើទិដ្ឋភាពច្បាប់ នយោបាយ សេដ្ឋកិច្ច និងទិដ្ឋភាពទូទៅ ពាក់ព័ន្ធនិងខ្លឹមសារសេចក្តីព្រាងអនុក្រឹត្យស្តីពី បែបបទ និងនីតិវិធីនៃការប្រមូលកម្រៃសេវាប្រើប្រាស់ប្រព័ន្ធលូ។ជាលទ្ធផលអង្គប្រជុំបានបញ្ចប់ដោយជោគជ័យជាស្ថាពរក្នុងកម្រិតបច្ចេកទេស និងត្រៀមរៀបចំកិច្ចប្រជុំអន្តរក្រសួងដើម្បីសម្រេចអនុក្រឹត្យនេះជាផ្លូវការ នាពេលឆាប់ៗខាងមុខនេះ៕