ឯកឧត្ដមរដ្ឋលេខាធិការ ស៊ុយ សាន តំណាងដ៏ខ្ពង់ខ្ពស់ឯកឧត្ដមទេសរដ្ឋមន្ត្រី ស៊ុន ចាន់ថុល ដឹកនាំគណៈប្រតិភូក្រសួងចូលរួមគោរពវិញ្ញាណក្ខន្ធសពឧបាសិកា យូ គីមហូយ ត្រូវជាមាតាបង្កើតរបស់ឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋានបច្ចេកទេស ក្រសួងសាធារណការ និងដឹកជញ្ជូន ភ្នំពេញ៖ ថ្ងៃព្រហស្បតិ៍ ៦កើត ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០១ ខែកញ្ញា ឆ្នាំ ២០២២ ឯកឧត្ដម ស៊ុយ សាន រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្ដមទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំគណៈប្រតិភូក្រសួងចូលរួមគោរពវិញ្ញាណក្ខន្ធ សពឧបាសិកា យូ គីមហូយ ត្រូវជាមាតាបង្កើតរបស់ ឯកឧត្តម ហ៊ាង វុត្ថា អគ្គនាយកនៃអគ្គនាយកដ្ឋាន បច្ចេកទេស ក្រសួងសាធារណការ និងដឹកជញ្ជូន ឋិតនៅផ្ទះលេខ១៧១បេ ផ្លូវ២០៩ សង្កាត់ច្រំាងចំរេះ ១ ខណ្ឌប្ញស្សីកែវ បុរីវិមានភ្នំពេញ ផ្លូវ៥៩៨ រាជធានីភ្នំពេញ។ ឧបាសិកា យូ គីមហូយ បានទទួលមរណភាពនៅថ្ងៃពុធ ៥កើត ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣១ ខែសីហា ឆ្នាំ២០២២ វេលាម៉ោង០៧:១៨នាទីព្រឹក ក្នុងជន្មាយុ៧៨ឆ្នាំ ដោយរោគាពាធ។ មរណភាពរបស់ឧបាសិកា យូ គីមហូយ គឺជាការបាត់បង់នូវ មាតាបង្កើត មាតាក្មេក ជីដូន និងជីទួតជាទី គោរពស្រឡាញ់ដ៏ជ្រាលជ្រៅរបស់ឯកឧត្ដម និងលោកជំទាវ ព្រមទាំងក្រុមគ្រួសារ ដែលកន្លងមកឧបាសិកាតែងតែបានខិតខំអស់ពីកម្លាំងកាយចិត្ត និងប្រាជ្ញាស្មារតី ដើម្បីចិញ្ចឹមបីបាច់ថែរក្សា និងអប់រំទូន្មានបុត្រធីតា និងចៅៗឱ្យប្រកបដោយគន្លងធម៌រហូតក្លាយជាបញ្ញាវន្ត និងជាថ្នាក់ដឹកនាំនៅតាម ក្រសួងស្ថាប័នជាតិផងដែរ។ ឯកឧត្តមរដ្ឋលេខាធិការ ព្រមទាំងគណៈប្រតិភូតំណាងឱ្យថ្នាក់ដឹកនាំ មន្ត្រីរាជការ បុគ្គលិក និងកម្មករនៃ ក្រសួងសាធារណការ និងដឹកជញ្ជូន បានសម្តែងនូវការចូលរួមរំលែកនូវមរណទុក្ខដ៏ក្រៀមក្រំជាទីបំផុត ជាមួយឯកឧត្ដមអគ្គនាយក និងលោកជំទាវ ព្រមទាំងក្រុមគ្រួសារ ដោយសេចក្ដីសង្វេគជាទីបំផុត និងបានលំឱនកាយវាចាចិត្តឧទ្ទិសបួងសួងដល់ដួងវិញ្ញាណក្ខន្ធរបស់ឧបាសិកា យូ គីមហូយ សូមបានសោយសុខក្នុងសុគតិភពកុំបីឃ្លៀងឃ្លាតឡើយ។ សូមឧទ្ទិសបួងសួងដល់វត្ថុស័ក្កសិទ្ធទាំងអស់ក្នុងលោក ជួយលើកស្ទួយដួងវិញ្ញាណក្ខន្ធរបស់ឧបាសិកា យូ គីមហូយ បានសោយសុខក្នុងសុគតិភពជានិច្ចនិរន្តន៍ ហើយយើងទំាងអស់គ្នាត្រូវខិតខំប្រព្រឹត្តិនូវអំពើល្អ ធ្វើបុណ្យ ដាក់ទាន រួមកម្លំាងគ្នារក្សានូវសុខសន្តិភាព ស្ថិរភាពនយោបាយ ដើម្បីធ្វើការអភិវឌ្ឍប្រទេស ជាតិរបស់យើងឱ្យមានការរីកចម្រើនគ្រប់វិស័យទាំងអាណាចក្រ និងពុទ្ធចក្រ ក្រោមការដឹកនាំ របស់សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕