កម្ពុជា៖ ផ្លូវជាតិលេខ៧១C សាងសង់ដោយក្រុមហ៊ុនចិន សម្រេចបាន៣៧%ហើយ គម្រោងសាងសង់ផ្លូវជាតិលេខ ៧១C ចាប់ពីស្រុកត្បូងឃ្មុំ ខេត្តត្បូងឃ្មុំ រហូតដល់ស្រុកចំការលើ ខេត្តកំពង់ចាម មានប្រវែងសរុប១១៤,៦២គីឡូម៉ែត្រ ដែលបាននិងកំពុងសាងសង់ដោយក្រុមហ៊ុនចិន សម្រេចវឌ្ឍនភាពការងារសាងសង់ បាន៣៧%ហើយ គិតត្រឹមថ្ងៃទី២០ មិថុនា ២០២២។ វឌ្ឍនភាពការងារសាងសង់នេះត្រូវបានបង្ហាញ ស្របពេលដែលឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូននៃប្រទេសកម្ពុជាបានអញ្ជើញចុះទៅត្រួតពិនិត្យលក្ខណៈបច្ចេកទេស និងតាមដានវឌ្ឍនភាពការងារ គម្រោងសាងសង់ផ្លូវជាតិលេខ៧១Cនេះ ដោយមានការចូលរួមពីមន្ត្រីជំនាញបច្ចេកទេស តំណាងក្រុមហ៊ុនសាងសង់ ក្រុមហ៊ុនត្រួតពិនិត្យលក្ខណៈបច្ចេកទេស អាជ្ញាធរដែនដី និងភាគីពាក់ព័ន្ធផងដែរ ជាការការចុះត្រួតពិនិត្យ ក្នុងគោលបំណងត្រួតពិនិត្យលក្ខណៈបច្ចេកទេស តាមដានវឌ្ឍនភាពការងារសាងសង់ និងពិនិត្យថា តើក្រុមហ៊ុនសាងសង់កំពុងអនុវត្តការងារនីមួយៗត្រឹមត្រូវតាមសៀវភៅបន្ទុក ឬ កិច្ចសន្យាដែរឬទេ ដើម្បីធានាគុណភាពផ្លូវរឹងមាំ និងប្រើប្រាស់ជាប់បានយូអង្វែង។ ឯកឧត្ដមទេសរដ្ឋមន្ត្រី បានផ្ដាំផ្ញើឱ្យក្រុមសាងសង់ និងក្រុមហ៊ុនត្រួតពិនិត្យបច្ចេកទេសសាងសង់យកចិត្តទុកដាក់ដោយឈរលើគោលការណ៍គុណភាពជាចម្បង និងត្រូវស្រោចទឹកឱ្យបានជាប្រចាំ ដើម្បីកុំឱ្យរំខាន និងប៉ះពាល់ដល់សុខភាពអ្នកធ្វើដំណើរ និងបងប្អូនប្រជាពលរដ្ឋដែលរស់នៅតាមបណ្ដោយផ្លូវនោះ។ គួររម្លឹកថា គម្រោងសាងសង់ផ្លូវជាតិលេខ៧១C ត្រូវបានរៀបចំពិធីបើកការដ្ឋានសាងសង់ជាផ្លូវការ កាលពីថ្ងៃទី២៣ វិច្ឆិកា ២០២១ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រី និង ឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា ដោយពេលនោះ ក៏ស្របនឹងពិធីប្រកាសដាក់ឲ្យប្រើប្រាស់ជាផ្លូវការ ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ផងដែរ។ តាមគម្រោង ផ្លូវជាតិលេខ ៧១Cនេះ នឹងប្រើប្រាស់រយៈពេលសាងសង់ចំនួន៤២ខែ គ្រោងបញ្ចប់ការសាងសង់នៅខែតុលា ឆ្នាំ២០២៤ សាងសង់ដោយក្រុមហ៊ុនសំណង់សៀងហៃ (SCG) និងត្រួតពិនិត្យបច្ចេកទេសដោយ ក្រុមហ៊ុនទីប្រឹក្សាបច្ចេកទេស ក្វាងចូវវ៉ាន អាន គ្រោងចំណាយថវិកាសាងសង់ ជិត១៣០លានដុល្លារអាមេរិក។ ជាការកត់សម្គាល់ ផ្លូវជាតិលេខ៧១C គឺជាសរសៃឈាមសេដ្ឋកិច្ចជាតិដ៏មានសក្តានុពលរបស់កម្ពុជា អាចជួយសម្រួលដល់ការតភ្ជាប់ទំនាក់ទំនងគមនាគមន៍ ធ្វើសមាហរណកម្មតភ្ជាប់ផ្ទៃក្នុងប្រទេស និងជាមួយតំបន់ រួមចំណែកក្នុងការលើកកម្ពស់ប្រសិទ្ធភាពនៃការដោះដូរពាណិជ្ជកម្ម វិនិយោគ ដំណាំកសិផល កសិ-ឧស្សាហកម្ម និងទេសចរណ៍ឆាប់រហ័ស និងចំណាយតិច ជាពិសេស ជាមួយប្រទេសជិតខាង៕