[Phnom Penh Times] - ឯកឧត្តមទេសរដ្ឋមន្ត្រី ស៊ុន ចាន់ថុល អញ្ជើញដង្ហែព្រះត្រៃបិដកចំនួន១១០គម្ពីវេរប្រគេនព្រះសង្ឃវត្ត ឧត្តរមានជ័យឋិត នៅឃុំជ្រោយតាកែវ ស្រុកកោះធំ ខេត្តកណ្តាល
2019-12-07
ទៅកាន់ទំព័រចុះផ្សាយក្នុង Phnom Penh Times
កណ្តាល៖ កាលពីព្រឹកថ្ងៃសៅរ៍ ១១កើត ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៧ ខែធ្នូ ឆ្នាំ២០១៩ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធាន ក្រុមការងារថ្នាក់ជាតិចុះជួយស្រុកកោះធំ បានអញ្ជើញដង្ហែព្រះគម្ពីត្រៃបិដកវេរ ប្រគេនព្រះសង្ឃគង់នៅវត្តឧត្តរមានជ័យ ឋិតនៅឃុំជ្រោយតាកែវ ស្រុកកោះធំ ខេត្តកណ្តាល ដោយមាន ការចូលរួមពីថ្នាក់ដឹកនាំក្រសួង មន្ត្រីរាជការ និងពុទ្ធបរិស័ទចំណុះជើងវត្តប្រមាណ៤០០នាក់។
ព្រះគម្ពីត្រៃបិដកដែលបានដង្ហែ និងវេរប្រគេនវត្តខាងលើនេះមានចំនួន១១០គម្ពី ដើម្បីអាចឱ្យព្រះសង្ឃ ឧបាសក ឧបាសិកា និងអ្នកសំណាក់ធម៌ទាំងឡាយ អាចសិក្សារៀនសូត្រអំពីវិន័យបិដកដែលជាព្រះ គម្ពីរខាងព្រះពុទ្ធសាសនាដែលបានចារិកទុកនូវពុទ្ធប្បញ្ញត្តិ និងពុទ្ធានុញាត។
ជាមួយគ្នានោះផងដែរ ឯកឧត្តមទេសរដ្ឋមន្ត្រីក៏បាននាំយកទេយ្យវត្ថុ គ្រឿងឧបភោគបរិភោគ និងគ្រឿង បរិក្ខាផ្សេងៗទៅប្រគេនព្រះសង្ឃសម្រាប់ប្រើប្រាស់ ក៏ដូចជាដើម្បីឧទ្ទិសបុណ្យកុសលផលបុណ្យជូនបង ប្អូនប្រជាពលរដ្ឋខ្មែរទាំងអស់ឱ្យជួបតែសេចក្តីសុខគ្រប់ប្រការផងដែរ។
ឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រី បានអញ្ជើញចុះពិនិត្យមើលវឌ្ឍនភាពនៃការសាងសង់ អាងហែលទឹកកោះធំ ដែលមានទទឹង២២ម៉ែត្រ បណ្តោយ៤២ម៉ែត្រ ឋិតនៅក្នុងបរិវេណកីឡដ្ឋានស្រុក កោះធំ ក្នុងភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្តាល គ្រោងចំណាយថវិកាអស់សរុបប្រមាណ៣០ម៉ឺនដុល្លារ សហរដ្ឋអាមេរិក សម្រាប់សិស្សានុសិស្ស ក៏ដូចជាកីឡាករហែលទឹកអាចហ្វឹកហាត់កីឡាដើម្បីសុខភាព និងត្រៀមចូលរួមប្រកួតកីឡាស៊ីហ្គេម ដែលកម្ពុជាគ្រោងធ្វើជាម្ចាស់ផ្ទះនៅឆ្នាំ២០២៣ខាងមុខ៕
