នៅថ្ងៃពុធ ១៤កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៤ ខែសីហា ឆ្នាំ២០១៩ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរកីឡាហែលទឹក បានអញ្ជើញអមដំណើរសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងពិធីបញ្ចុះបឋមសិលាបើកការដ្ឋានសាងសង់មណ្ឌលកីឡាហែលទឹកខេត្តបាត់ដំបង ស្ថិតនៅក្នុងបរិវេណសាកលវិទ្យាល័យបាត់ដំបង។ កម្មវិធីនេះមានការចូលរួមពីថ្នាក់ដឹកនាំក្រសួង ស្ថាប័នពាក់ព័ន្ធ ឯកឧត្ដមប្រធានក្រុមប្រឹក្សាខេត្ត ឯកឧត្ដមអភិបាល នៃគណៈអភិបាលខេត្ត អាជ្ញាធរគ្រប់លំដាប់ថ្នាក់ ថ្នាក់ដឹកនាំមន្ទីរជុំវិញខេត្ត សាស្ត្រាចារ្យ លោកគ្រូ អ្នកគ្រូ បុគ្គលិកសិក្សា និងនិស្សិតនៃសាកលវិទ្យាល័យបាត់ដំបង ជាច្រើននាក់ផងដែរ។ មណ្ឌលកីឡាហែលទឹកខេត្តបាត់ដំបងនេះ គ្រោងនឹងសាងសង់ឡើងដោយយកគំរូប្លង់តាម “មណ្ឌលកីឡាហែលទឹកតេជោសែនខេត្តកំពង់ចាម” លើផ្ទៃដីទំហំ១១២ ម៉ែត្រ គុណនឹង ៦៥ ម៉ែត្រ ចំណាយពេលសាងសង់ ២៤ខែ និងថវិកា ២.០០០.០០០ ដុល្លារ (ពីរលានដុល្លារសហរដ្ឋអាមេរិក) សម្រាប់ការហ្វឹកហាត់ និងការប្រកួតជាលក្ខណៈជាតិ និងអន្តរជាតិ ជាពិសេសការប្រកួតដណ្តើមមេដាយក្នុងព្រឹត្តិការណ៍ស៊ីហ្គេម (SEA GAME) ឆ្នាំ២០២៣ ដែលកម្ពុជាគ្រោងធ្វើម្ចាស់ផ្ទះ។ សូមបញ្ជាក់ថាហេដ្ឋារចនាសម្ព័ន្ធសំខាន់ៗដែលត្រូវសាងសង់រួមមាន៖ អាងសម្រាប់ប្រកួតទំហំ ២៥ម គុណ ៥០ម ជម្រៅ ២ម អាងលោតទឹកទំហំ ២០ម គុណ ២៥ម ជម្រៅ ៤,៥ម អាងហែលកម្តៅសាច់ដុំ ទំហំ ១០ម គុណ ១៥ម ជម្រៅ ១,៥ម ប៉មលោតទឹកកំពស់ ១០ម ចែកជាថ្នាក់លោតកំពស់ ៣ម, ៥ម, ៧ម និង១០ម។ អាងទាំងបី និងប៉មលោតទឹកត្រូវសាងសង់នៅលើខឿនទំហំ ៤០ម គុណ ១១២ម ខ្ពស់ជាងដីកំណើត១,៥ម អាងទឹកក្នុងដីសម្រាប់រក្សាតុល្យភាពទឹកអាងទាំងបី ទំហំ ១០ម គុណ ១៥ម ជម្រៅ២,៥ម កន្លែងអង្គុយទស្សនាទំហំ ៧ម គុណ ៨៣ម ចំណុះ៤០០នាក់ ក្នុងនោះសម្រាប់គណៈអធិបតីចំនួន ៥០នាក់ រួមទាំងអគារ និងបន្ទប់ផ្សេងៗជាច្រើនទៀត សម្រាប់ប្រើប្រាស់ក្នុងវិស័យកីឡានេះ រួមទាំងទីធ្លាសម្រាប់ចតរថយន្តផងដែរ។ សម្ដេចក្រឡាហោមឧបនាយករដ្ឋមន្ត្រី បានគូសបញ្ជាក់ថា ដោយសារប្រទេសមានសុខសន្តិភាព និងស្ថិរភាពនយោបាយ បានជំរុញឱ្យវិស័យកីឡាគ្រប់ប្រភេទរបស់កម្ពុជាមានការរីកច្រើនគួរឱ្យកត់សម្គាល់ បច្ចុប្បន្នយើងបានទាក់ទងជាមួយភាគីថៃដើម្បីបញ្ជូនកីឡាករ កីឡាការិនីខ្មែរទៅហ្វឹកហាត់នៅប្រទេសថៃ ក៏ដូចជាអញ្ជើញគ្រូបង្វឹកពីប្រទេសថៃ ដើម្បីមកបង្វឹកកីឡាករ និងកីឡាការិនីខ្មែរផងដែរ។ សម្ដេចក្រឡាហោម ឧបនាយករដ្ឋមន្ត្រីបានបន្តថា៖ កីឡាមិនត្រឹមតែនាំមកនូវសុខភាព មិត្តភាព និងការរីកចម្រើនវប្បធម៌ អរិយធម៌របស់ជាតិសាសន៍មួយប៉ុណ្ណោះទេ ប៉ុន្តែវាថែមជួយអភិវឌ្ឍ និងពង្រឹងសេដ្ឋកិច្ចជាតិផងដែរ តាមរយៈការទាក់ទាញភ្ញៀវទេសចរ ឱ្យមកទស្សនាកាន់តែច្រើនឡើង។ ជាមួយគ្នានោះផងដែរ សម្ដេចក្រឡាហោមឧបនាយករដ្ឋមន្ត្រី បានផ្ដល់អនុសាសន៍ឱ្យបង្កើតក្លឹបកីឡាផ្សេងៗទៀតឱ្យបានច្រើនតាមដែលអាចធ្វើបានដូចជាកីឡាបាល់ទាត់ បាល់ទះ និងកីឡាប្រដាល់ជាដើម និងបានអំពាវនាវដល់បងប្អូន ប្រជាពលរដ្ឋ កីឡាករ កីឡាការិនី ជាពិសេសសិស្សនិស្សិតទាំងអស់ដែលមាននិស្ស័យនឹងកីឡាហែលទឹកចូលរួមហ្វឹកហាត់តាមក្រមវិន័យ និងដំបូន្មានរបស់គ្រូបង្វឹកដើម្បីពង្រឹងសមត្ថភាពរបស់ខ្លួនឱ្យបានរឹង មាំ និងពេញលេញ សម្រាប់ត្រៀមប្រកួតថ្នាក់ជាតិ និងអន្តរជាតិ ជាពិសេសការប្រកួតពាន់រង្វាន់កីឡាស៊ីហ្គែមឆ្នាំ២០២៣។ សម្តេចឧបនាយករដ្ឋមន្ត្រីក្រឡាហោមហោមឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះសប្បុរសជនខ្មែរទាំងអស់នៅសហរដ្ឋអាមេរិក ដែលបានបរិច្ចាគថវិកា ដើម្បីជួយជ្រោមជ្រែងសាងសង់បណ្ណាល័យនៅក្នុងសាកលវិទ្យាល័យបាត់ដំបងនេះ។ ទីបញ្ចប់ សម្ដេចក្រឡាហោមឧបនាយករដ្ឋមន្ត្រី អមដំណើរដោយឯកឧត្ដមទេសរដ្ឋមន្ត្រី ស៊ុន ចាន់ថុល និងគណៈប្រតិភូជាច្រើនរូប បានអញ្ជើញជានិមិត្តរូបក្នុងការបញ្ចុះបឋមសិលាសាងសង់អាងហែលទឹកនេះផងដែរ៕