[Kampuchea Thmey] - សិក្ខាសាលា ស្ដីពីបច្ចេកទេសការជួសជុលផ្លូវថ្នល់ ដោយប្រើវិធីសាស្ត្រ COLD IN PLACE RECYCLING
2019-08-02
ទៅកាន់ទំព័រចុះផ្សាយក្នុង Kampuchea Thmey
ភ្នំពេញ ៖ កាលពីថ្ងៃព្រហស្បតិ៍ ១កើត ខែស្រាពណ៍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០១ ខែសីហា ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីបើកសិក្ខាសាលាស្ដីពី បច្ចេកទេសការជួសជុលផ្លូវថ្នល់ ប្រើវិធីសាស្ត្រ Cold in Place Recycling ដោយមានការចូលរួមពីស្ថាប័នពាក់ព័ន្ធ និងមន្ត្រីបច្ចេកទេស នៃក្រសួងសាធារណការ និងដឹកជញ្ជូនផងដែរ។
សិក្ខាសាលានេះ មានគោលបំណងបណ្ដុះបណ្ដាល ក៏ដូចជាបំពាក់បំប៉ននូវចំណេះដឹងថ្មី ចំណេះធ្វើ និងបទពិសោធន៍ថ្មីៗ បន្ថែមលើចំណេះដឹងដែលមានស្រាប់ជូនដល់មន្ត្រីពាក់ព័ន្ធ នៃក្រសួងសំដៅពង្រីក និងពង្រឹងសមត្ថភាពមន្ត្រីក្នុងការសាងសង់ និងជួសជុលថែទាំផ្លូវថ្នល់តាមវិធីសាស្ត្រថ្មី ស្របតាមការរីកចម្រើនផ្នែកបច្ចេកវិទ្យាក្នុងការសាងសង់ផ្លូវឲ្យបានមាំ និងជាប់បានយូរ។
ថ្លែងក្នុងពិធីបើកសិក្ខាសាលានោះ លោកទេសរដ្ឋមន្ត្រី ស៊ុន ចាន់ថុល បានបង្ហាញថា ការអភិវឌ្ឍសមត្ថភាពមន្ត្រីរាជការ គឺជាអាទិភាពទី១ ក្នុងវិស័យអាទិភាពទាំងបួន នៃគោលនយោបាយចតុកោណដំណាក់កាលទី៤ របស់រាជរដ្ឋាភិបាល ព្រោះថា មន្ត្រីមានសមត្ថភាពគ្រប់គ្រាន់ ស្ថាប័ននោះនឹងមានការរីកចម្រើន ហើយប្រទេសជាតិក៏មានការរីកចម្រើនតាមនោះដែរ ជាពិសេស សមត្ថភាព និងទេពកោសល្យ លើការសាងសង់ និងជួសជុលថែទាំផ្លូវថ្នល់ឲ្យមានគុណភាព មាំ និងជាប់បានយូរអង្វែង។
លោកទេសរដ្ឋមន្ត្រីបានសង្កត់ធ្ងន់ថា ក្រសួងមានគោលការណ៍ច្បាស់លាស់ក្នុងការសាងសង់ និងជួសជុលថែទាំផ្លូវថ្នល់ ពោលគឺទទួលយកតែផ្លូវណាដែលត្រូវបានសាងសង់ និងជួសជុល មានគុណភាព និងជាប់បានយូរប៉ុណ្ណោះ។
ក្រសួង នឹងរិះរកគ្រប់មធ្យោបាយ និងនីតិវិធីដើម្បីលើកកម្ពស់គុណភាព នៃការសាងសង់ និងជួសជុលផ្លូវ តាមរយៈការបណ្ដុះបណ្ដាល និងទស្សនកិច្ចសិក្សានៅតាមបណ្ដាប្រទេសជឿនលឿនមួយចំនួនលើសកលលោក។
ជាមួយគ្នានោះដែរ លោកទេសរដ្ឋមន្ត្រី ក៏បានផ្ដាំផ្ញើសិក្ខាកាមទាំងអស់ឲ្យយកចិត្តទុកដាក់ក្នុងការត្រងត្រាប់ស្តាប់ការធ្វើបទបង្ហាញរបស់វាគ្មិន និងចូលរួមជាមតិយោបល់ ក៏ដូចជាលើកជាសំណួរសួរដេញដោលឲ្យបានផុលផុស សំដៅក្រេបយកចំណេះដឹងថ្មីឲ្យបានច្រើនបំផុតតាមដែលអាចធ្វើបាន ព្រោះថាចំណេះដឹងទាំងនេះ នឹងបម្រើដល់ការសាងសង់ និងជួសជុលផ្លូវថ្នល់យើងឲ្យបានមាំ និងប្រើប្រាស់បានយូរអង្វែង។ ធ្វើផ្លូវបានមាំ និងជាប់បានយូរអង្វែង គឺជាការសន្សំសំចៃការចំណាយថវិកាជាតិបានយ៉ាងច្រើនបំផុត៕
