[Kampuchea Thmey] - កម្ពុជា ចិន កំពុងពង្រឹងការអភិវឌ្ឍហេដ្ឋារចនាសម្ព័ន្ធដឹកជញ្ជូននៅប្រទេសកម្ពុជា
2019-07-27
ទៅកាន់ទំព័រចុះផ្សាយក្នុង Kampuchea Thmey
ភ្នំពេញ ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និង ដឹកជញ្ជូន បានទទួលជួបសម្ដែងការគួរសមលោក Li An ទីប្រឹក្សាសេដ្ឋកិច្ច និងពាណិជ្ជកម្ម នៃស្ថានទូតចិនប្រចាំកម្ពុជា ដែលនឹងត្រូវបញ្ចប់អាណត្តិរបស់ខ្លួននៅខែកក្កដា ឆ្នាំ២០១៩នេះ។
កិច្ចជំនួបពិភាក្សាការងារនេះ ប្រព្រឹត្តឡើង កាលពីពេលថ្មីៗនេះ នៅទីស្ដីការក្រសួងសាធារណការ និងដឹកជញ្ជូន ដោយមានការចូលរួមពីមន្ត្រីពាក់ព័ន្ធមួយចំនួនផងដែរ។
ថ្លែងក្នុងជំនួបនោះ លោកទេសរដ្ឋមន្ត្រី ស៊ុន ចាន់ថុល បានថ្លែងការកោតសរសើរ និងអំណរគុណយ៉ាងខ្លាំងចំពោះការគាំទ្រពីសំណាក់មិត្តចិន តាមរយៈលោក Li An ក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូននៅកម្ពុជា ដោយបានតភ្ជាប់ទៅគ្រប់ច្រកល្ហក ខ្វាត់ខ្វែងដូចសរសៃឈាមនៅក្នុងប្រទេស ក៏ដូចជាបានតភ្ជាប់ទៅនឹងប្រទេសជិតខាងក្នុងតំបន់អាស៊ានផងដែរ។
លោកទេសរដ្ឋមន្ត្រីបានគូសបញ្ជាក់ថា តាមរយៈការអភិវឌ្ឍហេដ្ឋារចនាសម្ព័ន្ធដឹកជញ្ជូននេះ បានធ្វើឲ្យកំណើនសេដ្ឋកិច្ចជាតិមានលក្ខណៈរឹងមាំ និងមាននិរន្តរភាព ដោយរក្សាបាននូវកំណើនសេដ្ឋកិច្ចជាតិប្រចាំឆ្នាំ ក្នុងរង្វង់៧% ក្នុងរយៈពេលជាងពីរទសវត្សរ៍ចុងក្រោយនេះ។
ជាមួយគ្នានោះដែរ លោកទេសរដ្ឋមន្ត្រីក៏បានថ្លែងអំណរគុណចំពោះលោក Li An ដែលបានផ្ដល់កិច្ចសហប្រតិបត្តិការល្អ ក្នុងការជំរុញការកសាងហេដ្ឋារចនាសម្ព័ន្ធនៅក្នុងព្រះរាជាណាចក្រកម្ពុជាក្នុងអាណត្តិរបស់លោក និងសូមជូនពរលោក Li An មានសុខភាពល្អ និងទទួលបានជោគជ័យ ក្នុងបេសកកម្មថ្មីលើទឹកដីប្រទេសឥណ្ឌូនេស៊ី។
ទន្ទឹមនឹងនោះផងដែរ លោកទេសរដ្ឋមន្ត្រី ស៊ុន ចាន់ថុល ក៏បានស្វាគមន៍ចំពោះ លោក Wu Guoquan ដែលនឹងមកជំនួសតំណែងជាទីប្រឹក្សាសេដ្ឋកិច្ច និងពាណិជ្ជកម្មនៃស្ថានទូតចិនប្រចាំកម្ពុជា។ លោកទេសរដ្ឋមន្ត្រីសង្ឃឹមយ៉ាងមុតមាំថា លោក Wu Guoquan នឹងផ្ដល់កិច្ចសហការ និងគាំទ្រដល់ក្រសួង ក៏ដូចជារាជរដ្ឋាភិបាលកម្ពុជាក្នុងការជំរុញការអភិវឌ្ឍគម្រោងអាទិភាពមួយចំនួន ដូចជា គម្រោងអភិវឌ្ឍន៍អាងប្រព្រឹត្តិកម្មទឹកកខ្វក់ គម្រោងផ្លូវល្បឿនលឿន គម្រោងផ្លូវដែក និងគម្រោងផ្លូវជាតិសំខាន់ៗមួយចំនួននៅកម្ពុជា៕
ដោយ ៖ រ៉ាវុទ្ធ
