ភ្នំពេញ៖ដើម្បីពង្រឹកការងារគ្រប់គ្រងគម្រោងឱ្យមានប្រសិទ្ធិក្រសួងសាធារណការនិងដឹកជញ្ជូនបានសម្រេចប្តូរសមាសភាពមន្ត្រីគម្រោងចំនួន៦នាក់ដែលកំពុងត្រួតពិនិត្យនិងគ្រប់គ្រងការងារស្ថាបនាធ្វើឱ្យប្រសើរឡើងកំណាត់ផ្លូវជាតិលេខ៧ ចាប់ពីបង្គោលគីឡូម៉ែត្រ PK136 –PK300។ យោងតាមក្រសួងសាធារណការនិងដឹកជញ្ជូនឱ្យដឹងនៅថ្ងៃទី២៤ កក្កដា២០១៩នេះបានឱ្យដឹងថាផ្លូវជាតិលេខ៧បង្គោលគីឡូម៉ែត្រ PK136 – PK300សម្រេចប្តូរសមាសភាពមន្ត្រីគម្រោង ៦រូប៖ – ប្រធានក្រុមទីប្រឹក្សាបច្ចេកទេស ១រូប, អនុប្រធានក្រុមទីប្រឹក្សាបច្ចេកទេស១រូប,សមាជិកក្រុមទីប្រឹក្សាបច្ចេកទេស ៤រូប។ក្រសួងបញ្ជាក់ថា ដើម្បីពង្រឹងការងារគម្រោងឱ្យមានប្រសិទ្ធភាពនិងប្រសិទ្ធផលខ្ពស់ ក្រសួងសាធារណការ និងដឹកជញ្ជូន បានសម្រេចប្តូរសមាសភាពមន្ត្រីគម្រោង RAMP IIដែលកំពុងត្រួតពិនិត្យ និងគ្រប់គ្រងការងារស្ថាបនា ធ្វើឱ្យប្រសើរឡើង កំណាត់ផ្លូវជាតិលេខ៧ ចាប់ពីបង្គោលគីឡូម៉ែត្រ PK136 – PK300 ដោយប្តូរពីកៅស៊ូពីរស្រទាប់ DBST ទៅជាបេតុងកៅស៊ូ ACពង្រីកតួផ្លូវពី ៧ម ទៅ ១១ម (កៅស៊ូ AC ១០ម) មហិរញ្ញប្បទានពីធនាគារពិភពលោកក្នុងទឹកប្រាក់ប្រមាណ៣៦,៤៥លានដុល្លារអាមេរិក។គិតត្រឹមថ្ងៃទី១៨ ខែកក្កដា ឆ្នាំ២០១៩ គម្រោង ផ្លូវជាតិលេខ៧ បង្គោលគីឡូម៉ែត្រ PK136 – PK300នេះសម្រេចបានលទ្ធផល ដូចខាងក្រោម៖ – PK136 – PK186 អ៊ុកៅស៊ូ AC បាន ១០០% – PK186 – PK243 អ៊ុកៅស៊ូ AC បាន ១០០% – PK243 – PK300 អ៊ុកៅស៊ូ AC បាន ៧២% ក្រសួងបានរកឃើញថា មានចំណុចមួយចំនួន នៅមានការខ្វះខាត ដែលតម្រូវឲ្យក្រុមហ៊ុន ដោះស្រាយជាបន្ទាន់ទើបក្រសួង អាចទទួលយកបាន។ សូមជម្រាបជូនថា ផ្លូវជាតិលេខ៧នេះមានប្រវែងសរុបចំនួន ៤៦០,៨៣០គីឡូម៉ែត្រ ជាប្រភេទបេតុងកៅស៊ូ(AC) ចាប់ពីស្គន់ ផ្លូវជាតិលេខ៦ (PK ៧៥+០០០) ដល់ត្រពាំងគ្រៀល (ព្រំដែនកម្ពុជា-ឡាវ)ក្នុងនោះប្រវែងចំនួន២៧៥,៥៦០គីឡូម៉ែត្រត្រូវបានជួសជុលធ្វើឱ្យប្រសើរឡើងវិញចាប់ពីបង្គោលគីឡូម៉ែត្រលេខ១៣៦ដោយប្រើប្រាស់ថវិកាអន្តរ ជាតិសរុបចំនួន៦៩,៨២លានដុល្លារអាមេរិក ពោលគឺ៖ចាប់ពីបង្គោលគីឡូម៉ែត្រលេខPK136 – PK300ជាគម្រោងRAMP IIក្រោមហិរញ្ញប្បទានពីធនាគារពិភពលោកក្នុងទឹកប្រាក់ចំនួន៣៦,៤៥លានដុល្លារអាមេរិកនិងចាប់ពីបង្គោលគីឡូម៉ែត្រលេខ PK332.125 – PK424.690ជាជំនួយឥតសំណងរបស់រដ្ឋាភិបាលចិនក្នុងទឹកប្រាក់ចំនួន៣៣,៣៧ លានដុល្លារអាមេរិក។ នៅថ្ងៃទី២៤ ខែកក្កដា ឆ្នាំ២០១៩ នេះ ឯកឧត្តមទេសរដ្ឋមន្ត្រី បានដឹកនាំគណប្រតិភូក្រសួងសាធារណការ និងដឹកជញ្ជូន ជិះកង់នៅខេត្តត្បូងឃ្មុំ ពិនិត្យស្ថានភាពផ្លូវឋិតនៅបង្គោលគីឡូម៉ែត្រលេខ PK176 – PK166 ក្នុងចម្ងាយផ្លូវ ១០គីឡូម៉ែត្រតាមបណ្តោយផ្លូវជាតិលេខ៧។ យុទ្ធនាការជិះកង់នេះ ធ្លាប់ត្រូវបានធ្វើបានជាច្រើលើកមកហើយដើម្បីពិនិត្យឱ្យឃើញជាក់ស្តែងនូវផ្លូវមានជង្ហុកសំបុកមាន់ ផ្លូវមានទឹកដក់ ស្រកានាគ និងបញ្ហាផ្សេងៗ។សកម្មភាពនេះគឺជាគម្រូសម្រាប់មន្ត្រីអនុវត្តគម្រោង និងថ្នាក់ដឹកនាំត្រូវមានការយកចិត្តទុកដាក់ខ្ពស់លើការពិនិត្យគុណភាពផងដែរ៕