[Rasmei Kampuchea Daily News] - ក្រសួងសាធារណការចុះហត្ថលេខាលើអនុស្សរណៈយោគយល់ជាមួយក្រុមហ៊ុនមីឆែលីននិងវើលដ៍ប្រ៊ីជ
ភ្នំពេញៈក្រសួងសាធារណការនិងដឹកជញ្ជូនបានចុះហត្ថលេខាលើអនុស្សរណៈនៃការយោគយល់រវាងជាមួយក្រុមហ៊ុនមីឆែលីននិងក្រុមហ៊ុនវើលដ៍ប្រ៊ីជត្រេឌីងស្ដីពីការបង្កើនសុវត្ថិភាពចរាចរណ៍នៅលើផ្លូវថ្នល់ក្នុងព្រះរាជាណាចក្រកម្ពុជា។
លោកទេសរដ្ឋមន្ត្រីស៊ុនចាន់ថុលរដ្ឋមន្ត្រីក្រសួងសាធារណការនិងដឹកជញ្ជូន,ឯកអគ្គរដ្ឋទូតបារាំងប្រចាំកម្ពុជា,លោកSegsamTraiukosអគ្គលេខាធិការក្រុមហ៊ុនMichelinROHCo.,Ltdនិងលោកឧកញ៉ាសៀរិទ្ធីប្រធានក្រុមហ៊ុនវើលដ៍ប្រ៊ីជត្រេឌីងបានអញ្ជើញចូលរួមក្នុងពិធីចុះហត្ថលេខាកាលពីថ្ងៃទី១៦ខែកក្កដាឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន ។
អនុស្សរណៈនេះគឺបង្កើតកិច្ចសហការលើកកម្ពស់សុវត្ថិភាពចរាចរណ៍ផ្លូវគោកនិងកាត់បន្ថយគ្រោះថ្នាក់ចរាចរណ៍ផ្លូវគោកនៅក្នុងព្រះរាជាណាចក្រកម្ពុជាក្រោមគម្រោង“សុវត្ថិភាពចរាចរណ៍ផ្លូវគោករបស់ក្រុមហ៊ុន Michelin” ក៏ដូចជាគាំទ្រដល់យុទ្ធនាការសុវត្ថិភាពចរាចរណ៍ផ្លូវគោកជាតិកម្ពុជាផងដែរ។
សូមបញ្ជាក់ថា៖ គម្រោង “សុវត្ថិភាពចរាចរណ៍ផ្លូវគោករបស់ក្រុមហ៊ុន Michelin” មានរយៈពេល២ឆ្នាំ ដែលនឹងត្រូវបញ្ចប់នៅថ្ងៃទី៣១ ខែមីនា ឆ្នាំ២០២១ខាងមុខក្រោមការគាំទ្រហិរញ្ញវត្ថុ ចំណេះធ្វើ និងជំនាញបច្ចេកទេសពីក្រុមហ៊ុនMichelinROHសម្របសម្រួលគម្រោងនិងផ្ដល់វិភាគទានហិរញ្ញវត្ថុដោយក្រុមហ៊ុនWorldBridge។ដោយឡែកក្រសួងសាធារណការនិងដឹកជញ្ជូនជាអ្នកផ្ដល់ការគាំទ្រពេញលេញ និងអនុម័តឱ្យអនុវត្តគម្រោងនេះ។
ថ្លែងក្នុងពិធីនោះ លោកទេសរដ្ឋមន្ត្រី តាំងនាមគណៈកម្មាធិការជាតិសុវត្ថិភាពចរាចរណ៍ផ្លូវគោក បានមានប្រសាសន៍ថា គ្រោះថា្នក់ចរាចរណ៍បានសម្លាប់ប្រជាពលរដ្ឋខ្មែរប្រមាណ៦នាក់ក្នុងមួយថ្ងៃ និងបានបំផ្លាញទ្រព្យសម្បត្តិជាង៤០០លានដុល្លារក្នុងមួយឆ្នាំ។
លោកបានបន្តថា គ្រោះថ្នាក់ទាំងនោះបណ្ដាលមកពីកត្តាជាច្រើនដូចជា៖ កត្តាអ្នកបើកបរ កត្តាយានយន្ត ការមិនគោរពច្បាប់និងកត្តាផ្លូវជាដើម។ឆ្លៀតក្នុងឱកាសនោះផងដែរលោកទេសរដ្ឋមន្ត្រីបានជម្រាបជូនបងប្អូនប្រជាពលរដ្ឋថា៖ក្រសួងបានបំពាក់កាមេរ៉ាចាប់ល្បឿននៅតាមផ្លូវសំខាន់ៗមួយចំនួនក្នុងករណីបើកបរលើសល្បឿនកំណត់រថយន្តនោះនឹងត្រូវផាកពិន័យដល់ផ្ទះ។លោកទេសរដ្ឋមន្ត្រីក៏បានអំពាវនាវឱ្យបងប្អូនប្រជាពលរដ្ឋទាំងអស់គោរពច្បាប់ចរាចរណ៍ឱ្យបានខ្ជាប់ខ្ជួនយករថយន្តទៅឆៀកឱ្យបានតាមពេលកំណត់ និងបើកបរដោយមិនស្ថិតក្រោមឥទ្ធិពលនៃគ្រឿងស្រវឹង៕ចំណងជើងរូបថត៖ក្រសួងសាធារណការនិងដឹកជញ្ជូនបានចុះហត្ថលេខាលើអនុស្សរណៈនៃការយោគយល់រវាងជាមួយក្រុមហ៊ុនមីឆែលីននិងក្រុមហ៊ុនវើលដ៍ប្រ៊ីជត្រេឌីងស្ដីពីការបង្កើនសុវត្ថិភាពចរាចរណ៍នៅលើផ្លូវថ្នល់
