[Bayon TV] - ឯកឧត្ដម ស៊ុន ចាន់ថុល ជំរុញឱ្យក្រុមហ៊ុនដឹកជញ្ជូនទាំងអស់ត្រូវគោរពតាមលក្ខខណ្ឌ និងច្បាប់ស្តីពីចរាចរណ៍ផ្លូវគោក
2019-07-05
ទៅកាន់ទំព័រចុះផ្សាយក្នុង Bayon TV
ភ្នំពេញ ៖ ឯកឧត្ដម ទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូនបានជំរុញ ឱ្យក្រុមហ៊ុនដឹកជញ្ជូនទាំងអស់ត្រូវតែគោរពតាមលក្ខខណ្ឌ និងច្បាប់ស្តីពីចរាចរណ៍ផ្លូវគោក ដើម្បីផលប្រយោជន៍រួម។
ក្នុងឱកាសអញ្ជើញដឹកនាំកិច្ចប្រជុំស្ដីពី ការងារត្រួតពិនិត្យរឹតបន្តឹងច្បាប់ចរាចរណ៍ផ្លូវគោកជាមួយក្រុមហ៊ុនដឹកជញ្ជូនអ្នកដំណើរ និងទំនិញ ចំនួន១៧៩ក្រុមហ៊ុននៅទូទាំងប្រទេស នៅថ្ងៃទី០៥ ខែកក្កដា ឆ្នាំ២០១៩ នាទីស្ដីការក្រសួងសាធារណការ និងដឹកជញ្ជូន ឯកឧត្ដម ទេសរដ្ឋមន្ដ្រី ស៊ុន ចាន់ថុល បានជំរុញ និងធ្វើការណែនាំឱ្យក្រុមហ៊ុនដឹកជញ្ជូនទាំងអស់ត្រូវតែគោរពតាមលក្ខខណ្ឌ និងច្បាប់ស្តីពីចរាចរណ៍ផ្លូវគោក។
ឯកឧត្ដម ទេសរដ្ឋមន្ដ្រី បានលើកឡើងថា ក្រុមហ៊ុនដែលមិនទាន់បានចុះបញ្ជីត្រូវចុះបញ្ជីក្រុមហ៊ុន អ្នកបើកបរត្រូវតែមានប័ណ្ណបើកបរត្រឹមត្រូវតាមប្រភេទយាន ត្រូវមានលក្ខណៈបច្ចេកទេសស្របតាមបទដ្ឋានដែលបានកំណត់ ត្រូវបិទផ្លាក Logo សម្គាល់ក្រុមហ៊ុនតាមរថយន្តអាជីវកម្មនីមួយៗ ហើយក៏ត្រូវមានលិខិតអនុញ្ញាតអាជីវកម្ម គឺត្រូវសុំលិខិតអនុញ្ញាត ហើយបើហួសសុពលភាពត្រូវមកសុំបន្ត កុំផ្ទុកទំនិញ និងដឹកអ្នកដំណើរលើសកម្រិតកំណត់ ពេលបើកបរត្រូវគោរពច្បាប់ ប្រុងប្រយ័ត្នយោគយល់គ្នាក្នុងការវ៉ាជែង កុំដឹកលើសទម្ងន់កម្រិតកំណត់ កុំប្រើប្រាស់គ្រឿងស្រវឹង និងគ្រឿងញៀន ដូច្នេះ សូមឲ្យបណ្តាម្ចាស់ក្រុមហ៊ុនដឹកជញ្ជូនទាំងអស់ចូលរួមសហការ គោរព និងអនុវត្តច្បាប់ចរាចរណ៍ទាំងអស់គ្នា ដើម្បីផលប្រយោជន៍រួម។
មន្ដ្រីក្រសួងសាធារណការ និងដឹកជញ្ជូនបានឱ្យដឹងថា គោលបំណងសំខាន់នៃកិច្ចប្រជុំនេះ គឺទី១-ជំរុញឲ្យប្រជាពលរដ្ឋទាំងអស់ ព្រមទាំងម្ចាស់ក្រុមហ៊ុន ម្ចាស់យានយន្ត និងអ្នកបើកបរត្រូវចូលរួមគោរព និងអនុវត្តច្បាប់ចរាចរណ៍។ ទី២-ទប់ស្កាត់គ្រោះថ្នាក់ចរាចរណ៍។ ទី៣-ត្រួតពិនិត្យរថយន្តដឹកជញ្ជូនកែច្នៃ ខុសលក្ខណៈបច្ចេកទេស។ ទី៤-ចូលរួមកាត់បន្ថយភាពក្រីក្ររបស់ប្រជាពលរដ្ឋ និងទី៥-ធ្វើការផ្សព្វផ្សាយច្បាប់ លិខិតបទដ្ឋានគតិយុត្តិ នានា ដល់ប្រជាពលរដ្ឋ ព្រមទាំងម្ចាស់ក្រុមហ៊ុន ម្ចាស់យានយន្ត និងអ្នកបើកបរផងដែរ។
យោងតាមលទ្ធផលត្រួតពិនិត្យរបស់ក្រុមការងារត្រួតពិនិត្យរឹតបន្តឹងការអនុវត្តច្បាប់ស្តីពី ចរាចរណ៍ផ្លូវគោកនៅគោលដៅដើមទី ក្នុងកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុគិតចាប់ពីថ្ងៃទី១៥ ដល់ថ្ងៃទី៣០ ខែមិថុនា ឆ្នាំ២០១៩ បានបង្ហាញថា ក្នុងរយៈពេល១៥ថ្ងៃនេះជំនាញបានត្រួតពិនិត្យរថយន្តសរុបចំនួន១៩៥៤គ្រឿង ក្នុងនោះបានរកឃើញមានរថយន្តល្មើស ២២៤គ្រឿង ស្មើនឹង១១% រថយន្តត្រឹមត្រូវ ១.៧៣០គ្រឿង ស្មើនឹង៨៩% ល្មើសលិខិតស្នាម ៣៣% ដែលមានដូចជា ប័ណ្ណបើកបរ ឆៀក លិខិតអនុញ្ញាតអាជីវកម្មជាដើម ចំពោះល្មើសលក្ខណៈបច្ចេកទេស រថយន្តមាន៦៧% ដូចជា កង់សឹក រនាំងខ្វះប៊ូឡុងតាកេកង់ គន្លឹះកុងតឺន័រ និងភ្លើងបំភ្លឺ ហើយរថយន្តល្មើសទាំងនោះត្រូវបានផាកពិន័យតាមច្បាប់ចរាចរណ៍ផ្លូវគោក និងអនុក្រឹត្យលេខ៤៤។
ឯកឧត្ដម ទេសរដ្ឋមន្ដ្រី ស៊ុន ចាន់ថុល បានគូសបញ្ជាក់ថា ដើម្បីសម្រួល និងកាន់តែមានភាពងាយស្រួលដល់ក្រុមហ៊ុនដឹកជញ្ជូន ឯកឧត្ដម បានដាក់ចេញជាទិសដៅថា នឹងរៀបចំជួបជាមួយសមាគមរោងចក្រកាត់ដេរ និងសមាគមដឹកជញ្ជូន ដើម្បីក្តាប់ និងដោះស្រាយសំណូមពរនានា និងជំរុញការអនុវត្តច្បាប់។ បន្តធ្វើការត្រួតពិនិត្យរឹតបន្តឹងច្បាប់នៅកំពង់ផែទាំងពីរ តាមវិធានការសមស្រប ដែលបានដាក់ចេញ និងបើកការបង្រៀនអ្នកបើកបរមិនទាន់មានប័ណ្ណបើកបរចំនួន១០០នាក់ ដោយឥតគិតថ្លៃនៅកំពង់ផែស្វយ័តភ្នំពេញ ពីថ្ងៃច័ន្ទ ដល់ថ្ងៃសុក្រ ហើយប្រលងយកប័ណ្ណបើកបរនៅថ្ងៃសៅរ៍ ហើយជាជំហ៊ានបន្ទាប់នឹងអនុវត្តនៅកំពង់ផែស្វយ័តព្រះសីហនុ បន្ថែមលើនេះនឹងដាក់រថយន្តត្រួតពិនិត្យលក្ខណៈបច្ចេកទេសចល័តចំនួន០២គ្រឿង នៅជិតកំពង់ផែស្វយ័តភ្នំពេញ ដើម្បីឆៀករថយន្ត ដែលរកឃើញថា មិនទាន់បានឆៀក៕
