[Kampuchea Thmey] - លោក ស៊ុន ចាន់ថុល ស្នើឲ្យក្រុមហ៊ុនដឹកជញ្ជូនទាំងអស់ ត្រូវចូលរួមគោរពច្បាប់ចរាចរណ៍
2019-07-05
ទៅកាន់ទំព័រចុះផ្សាយក្នុង Kampuchea Thmey
ភ្នំពេញ ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងកិច្ចប្រជុំពិភាក្សាស្តីពីការងារដឹកជញ្ជូនផ្លូវគោក បានជំរុញអោយក្រុមហ៊ុនដឹកជញ្ជូនទាំងអស់ ត្រូវចូលរួមគោរពច្បាប់ចរាចរណ៍អោយបានខ្ជាប់ខ្ជួន ដើម្បីសុខសុវត្ថិភាពនៅតាមដងផ្លូវ។
កិច្ចប្រជុំពិភាក្សាស្តីពីការងារដឹកជញ្ជូនផ្លូវគោក នេះប្រព្រឹត្តឡើង កាលពីថ្ងៃសុក្រ ទី០៥ ខែកក្កដា ឆ្នាំ២០១៩ នៅសាលប្រជុំជាន់ទី៥ នៃទីស្តីការក្រសួងដោយមានក្រុមហ៊ុនដឹកជញ្ជូន (អ្នកដំណើរ ទំនិញ និងឆ្លងដែន) ចូលរួមសរុបចំនួន ១៧៩ក្រុមហ៊ុន ក្នុងនោះ ក្រុមហ៊ុនដឹកជញ្ជូនទំនិញមានចំនួន ៨១ក្រុមហ៊ុន (ក្រុមហ៊ុនបានចុះបញ្ចីមានចំនួន ៤៣ ក្រុមហ៊ុន និង ៣៨ក្រុមហ៊ុនទៀតពុំទាន់បានចុះបញ្ជី)។
ក្នុង៨១ក្រុមហ៊ុនមានក្រុមហ៊ុន ចំនួន៧៤ ដែលកំពុងធ្វើប្រតិបត្តិការនៅក្នុងកំពង់ផែទាំងពីរ (ផែភ្នំពេញមាន ចំនួន ៤២ និងផែព្រះសីហនុមានចំនួន ៥៥) ។ក្រុមហ៊ុនដឹកជញ្ជូនអ្នកដំណើរមានចំនួន ៩៨ក្រុមហ៊ុន (៥៥ក្រុមហ៊ុនបានចុះបញ្ជី និង ៤៣ក្រុមហ៊ុនទៀតមិនទាន់ចុះបញ្ជី)។
គោលបំណង នៃកិច្ចប្រជុំនេះ ១-ជំរុញឲ្យបងប្អូនប្រជាពលរដ្ឋទាំងអស់ ព្រមទាំងម្ចាស់ក្រុមហ៊ុន ម្ចាស់យានយន្ត និងអ្នកបើកបរត្រូវចូលរួមគោរព និងអនុវត្តច្បាប់ចរាចរណ៍ ២-ទប់ស្កាត់គ្រោះថ្នាក់ចរាចរណ៍។ ៣-ត្រួតពិនិត្យរថយន្តដឹកជញ្ជូនកែច្នៃខុសលក្ខណៈបច្ចេកទេស។ ៤-ចូលរួមកាត់បន្ថយភាពក្រីក្ររបស់បងប្អូនប្រជាពលរដ្ឋ។ ៥-ធ្វើការផ្សព្វផ្សាយច្បាប់ លិខិតបទដ្ឋានគតិយុត្តនានា ដល់បងប្អូនប្រជាពលរដ្ឋព្រមទាំងម្ចាស់ក្រុមហ៊ុន ម្ចាស់យានយន្ត និងអ្នកបើកបរត្រូវចូលរួមគោរព និងអនុវត្តច្បាប់ចរាចរណ៍។
ដោយឡែក លទ្ធផលត្រួតពិនិត្យរបស់ក្រុមការងារត្រួតពិនិត្យរឹតបន្តឹងការអនុវត្តច្បាប់ ស្តីពីចរាចរណ៍ ផ្លូវគោកនៅគោលដៅដើមទី ក្នុងកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុគិតចាប់ពីថ្ងៃទី១៥-៣០ ខែមិថុនា ឆ្នាំ២០១៩ រួមមាន ត្រួតពិនិត្យរថយន្តសរុបចំនួន ១៩៥៤គ្រឿង ក្នុងនោះមានរថយន្តល្មើស ២២៤គ្រឿង ស្មើនឹង១១% ។ រថយន្តត្រឹមត្រូវ ១.៧៣០គ្រឿង ស្មើនឹង៨៩% ។ ល្មើសលិខិតស្នាម ៣៣% (ប័ណ្ណបើកបរ ឆៀក លិខិតអនុញ្ញាតអាជីវកម្ម) ល្មើសលក្ខណៈបច្ចេកទេស រថយន្ត៦៧%(កង់សឹករនាំងខ្វះប៊ូឡុងតាកេកង់ គន្លឹះកុងតឺន័រ ភ្លើងបំភ្លឺ) ។ រថយន្តល្មើសត្រូវទទួលការផាកពិន័យតាមច្បាប់ចរាចរណ៍ផ្លូវគោក និងអនុក្រឹត្យលេខ៤៤។
នៅក្នុងកិច្ចប្រជុំនោះ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ក៍បានធ្វើការណែនាំឲ្យក្រុមហ៊ុនដឹកជញ្ជូនទាំងអស់ត្រូវគោរពតាមលក្ខខណ្ឌ និងច្បាប់ស្តីពីចរាចរណ៍ផ្លូវគោក។ ក្រុមហ៊ុនដែលមិនទាន់បានចុះបញ្ជីត្រូវចុះបញ្ជីក្រុមហ៊ុន។ អ្នកបើកបរត្រូវមានប័ណ្ណបើកបរត្រឹមត្រូវតាមប្រភេទយាន។ ត្រូវមានលក្ខណៈបច្ចេកទេសស្របតាមបទដ្ឋានដែលបានកំណត់។ ត្រូវបិទផ្លាកLogo សម្គាល់ក្រុមហ៊ុនតាមរថយន្តអាជីវកម្មនីមួយៗ។ ត្រូវមានលិខិតអនុញ្ញាតអាជីវកម្ម(ត្រូវសុំលិខិតអនុញ្ញាត/ហួសសុពលភាពត្រូវមកបន្ត) ។ កុំផ្ទុកទំនិញ និងដឹកអ្នកដំណើរលើសកម្រិតកំណត់។ ពេលបើកបរត្រូវគោរពច្បាប់ ប្រុងប្រយ័ត្នយោគយល់គ្នា(វ៉ាជែង)។ កុំដឹកលើសទម្ងន់កម្រិតកំណត់។ កុំប្រើប្រាស់គ្រឿងស្រវឹង និងគ្រឿងញៀន ។ ម្ចាស់ក្រុមហ៊ុនដឹកជញ្ជូនទាំងអស់ ត្រូវចូលរួមសហការគោរព និងអនុវត្តចរាចរណ៍ ទាំងអស់គ្នា ដើម្បីផលប្រយោជន៍រួម៕
រ៉ាវុទ្ធ
