ភ្នំពេញ៖ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នឹង អញ្ជើញជាអធិបតីភាពក្នុងពិធីចុះហត្ថលេខាលើកិច្ចព្រមព្រៀង គម្រោងធ្វើឱ្យប្រសើរឡើងវិញ ផ្លូវជាតិ លេខ២ (ពីតាខ្មៅដល់អូរចំបក់) និងផ្លូវជាតិលេខ២២ (ពីអូរចំបក់ដល់អង្គតាសោម) រវាងក្រសួង សាធារណការ និងដឹកជញ្ជូន និងក្រុមហ៊ុន HANSHIN Engineering & Construction Co.Ltd ដែលជាគម្រោងឥណទានសម្បទានពីរដ្ឋាភិបាលកូរ៉េ។ ពិធីចុះហត្ថលេខានេះ នឹងប្រព្រឹត្តទៅនៅថ្ងៃអង្គារ ទី២៥ ខែមិថុនា ឆ្នាំ២០១៩ វេលាម៉ោង២និង៣០ នាទីរសៀល នៅសាលប្រជុំជាន់ទី៥ នៃទីស្តីការក្រសួង។ សូមរំលឹកថា ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងក្នុងពេលឯកឧត្តមដឹកនាំក្រុមការងារជំនាញត្រួតពិនិត្យការជួសជុលផ្លូវជាតិលេខ៣ពីក្រុងកំពតទៅវាលរេញ កាលពីថ្ងៃទី១៣ ខែមិថុនា ឆ្នាំ២០១៩ថា «យើងឈប់ទទួលយកផ្លូវធ្វើជាប់ទៀតហើយ តែយកផ្លូវធ្វើរឹងមាំ»៕