ភ្នំពេញ ៖ ក្រសួងសាធារណការ និងដឹកជញ្ជូន នៅថ្ងៃទី១៤ ខែមិថុនា ឆ្នាំ២០១៩ ស្អែកនេះ នឹងរៀបចំដាក់តាំងបង្ហាញនូវ ប្រព័ន្ធបច្ចេកវិទ្យាព័ត៌មាន Mobile App របស់ខ្លួន នៅក្នុងពិព័រណ៍ការងារលើកទី២ ដែលរៀបចំឡើងដោយសាកលវិទ្យាល័យ ភូមិន្ទភ្នំពេញ (RUPP)។ ក្នុងពិព័រណ៍នេះ ក្រសួងនឹងធ្វើការដាក់តាំង បង្ហាញនូវកម្មវិធីបច្ចេកវិទ្យាព័ត៌មានសំខាន់ៗចំនួន៣ ដើម្បីផ្សព្វផ្សាយ លើកកម្ពស់សុវត្ថិភាពចរាចរណ៍ និងចែករំលែកចំណេះដឹងទូលំទូលាយដល់សិស្ស-និស្សិត រួមមាន ៖ទី១-កម្មវិធី យល់ដឹងអំពីទ្រឹស្តីនៃការបើកបរ (Cambodia Driving Rules) ដែលអាចឲ្យអ្នកប្រើប្រាស់យល់ដឹងពីសុវត្ថិភាពចរាចរណ៍ ស្លាកសញ្ញាចរាចរណ៍ និងទ្រឹស្តីក្នុងការប្រឡងយកបណ្ណបើកបរ។ ទី២-កម្មវិធីថែទាំផ្លូវ (ROAD CARE Mobile App) ដែលអាចឲ្យអ្នកប្រើប្រាស់រាយការណ៍ពីគ្រលុកសំបុកមាន់ មកកាន់មន្រ្តីមានសមត្ថកិច្ច ដើម្បីចុះទៅធ្វើការជួសជុលបានទាន់ពេលវេលា និងកាត់បន្ថយគ្រោះថ្នាក់ចរាចរណ៍។ និង៣-កម្មវិធីព័ត៌មានសាធារណការ និងដឹកជញ្ជូន (MPWT News) ដែលអាចចែករំលែកដល់អ្នកប្រើប្រាស់ពីព័ត៌មានក្នុងវិស័យសាធារណការ និងវិស័យដឹកជញ្ជូន របស់ក្រសួង ដែលចុះផ្សាយនៅ តាមបណ្តាញសារព័ត៌មាននានា។ សូមបញ្ជាក់ថា ការដាក់តាំង បង្ហាញ ស្តង់ពិព័រណ៍របស់ក្រសួង ក៏នឹងមានការលេងល្បែងកំសាន្ត ឆ្លើយសំណួរ យករង្វាន់មួកសុវត្ថិភាព ចំនួន២០០មួក ពីសំណាក់សិស្ស និស្សិត និងសាធារណជន ផងដែរ៕