កីឡាករ កីឡាការិនីចំនួន ១២៥រូប មកពីក្លឹបចំនួន៨ បានចូលរួមប្រកួតកីឡាហែលទឹក ដណ្តើមពានរង្វាន់ ព្រឹទ្ធាចារ្យ ហែម ថុន លើកទី៣ ឆ្នាំ២០១៩ នៅពហុកីឡដ្ឋានជាតិ មរតកតេជោ រាជធានីភ្នំពេញ --- ថ្ងៃសុក្រ ១១កើត ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែកុម្ភៈ ឆ្នាំ២០១៩ ឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរកីឡាហែលទឹក បានអញ្ជើញជាអធិបតី ក្នុងពិធីបិទការប្រកួតកីឡាហែលទឹក ដណ្តើមពានរង្វាន់ ព្រឹទ្ធាចារ្យ ហែម ថុន លើកទី៣ ឆ្នាំ២០១៩ នៅពហុកីឡដ្ឋានជាតិ មរតកតេជោ ដោយមានការចូលរួមពីមន្ដ្រីជាន់ខ្ពស់ក្រសួងសាធារណការ និងដឹកជញ្ជូន តំណាងក្រសួងអប់រំ យុវជន និងកីឡា គណៈប្រតិភូកីឡា គ្រូបង្វឹក សិស្សានុសិស្ស និងគរុសិស្សនៃវិទ្យាស្ថានជាតិអប់រំកាយ និងកីឡា សរុបចំនួនប្រមាណ ៦៥០នាក់។ ការប្រកួតកីឡាហែលទឹក ដណ្តើមពានរង្វាន់ ព្រឹទ្ធាចារ្យ ហែម ថុន លើកទី៣ ឆ្នាំ២០១៩ នេះ ប្រព្រឹត្តទៅរយៈពេល២ថ្ងៃ ចាប់ផ្តើមពីថ្ងៃទី១៤ ដល់ថ្ងៃទី១៥ ខែកុម្ភៈ ឆ្នាំ២០១៩ ដោយមានកីឡាករ កីឡាការិនី ចូលរួមចំនួន ១២៥នាក់ (ប្រុស ៧២នាក់ ស្រី ៥៣នាក់) មកពីក្លឹបចំនួន ៨ ចូលរួម រួមមាន៖ ក្លឹបក្រសួងសាធារណការនិងដឹកជញ្ជូន ក្លឹបក្រសួងសេដ្ឋកិច្ចនិងហិរញ្ញវត្ថុ ក្លឹបក្រសួងមហាផ្ទៃ ក្លឹបក្រសួងព័ត៌មាន ក្លឹបនាគរាជកំពង់ចាម ក្លឹបសាលាខេនវីដអន្តរជាតិ ក្លឹបមច្ឆានុប និងក្លឹបប៉ារ៉ាឡាំពិកកម្ពុជា។ ការប្រកួតនេះ មានវិញ្ញាសាប្រកួតសរុបចំនួន ២៩ វិញ្ញាសា ដោយធ្វើការប្រកួតជ្រើសរើសយកចំណាត់ថ្នាក់ជ័យលាភីពីលេខ១ ដល់លេខ៣។ ជ័យលាភីចំណាត់ថ្នាក់លេខ១ ទទួលបានមេដាយមាស១ ចំណាត់ថ្នាក់លេខ២ ទទួលបានមេដាយប្រាក់១ និងចំណាត់ថ្នាក់លេខ៣ ទទួលបានមេដាយសំរឹទ្ធ១ រួមជាមួយនឹងថវិកាឧបត្ថម្ភមួយចំនួន។ នៅក្នុងពិធីបិទការប្រកួតនោះ ឯកឧត្តមទេសរដ្ឋមន្ដ្រី បានផ្តល់កិត្តិយសបំពាក់មេដាយជូនកីឡាករ កីឡាការិនីជ័យលាភី រួមជាមួយថវិកាមួយចំនួន និងបានឧបត្ថម្ភថវិកាជូនដល់គណៈកម្មការបច្ចេកទេស ក្រុមគ្រូពេទ្យ គណៈគ្រប់គ្រងពហុកីឡដ្ឋាន សន្តិសុខ និងក្រុមសាព័ត៌មានផងដែរ៕