ភ្នំពេញ៖ ថ្ងៃទី៣០ ខែមករា ឆ្នាំ២០១៩ លោកទេសរដ្ឋមន្ត្រី​ ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងក្នុងកិច្ចប្រជុំប្រចាំខែថា ការចុះបញ្ជីរថយន្តចង្កូតស្តាំគឺត្រូវបិទបញ្ចប់ ដោយមិនអនុញ្ញាតឲ្យមានទៀតនោះឡើយ ដើម្បីកាត់បន្ថយគ្រោះថ្នាក់ចរាចរណ៍ឲ្យបានកម្រិតខ្ពស់ ។ លោករដ្ឋមន្ត្រី បានបញ្ជាក់ថា «ជាមួយយន្តការរដ្ឋបាល និងបច្ចេកវិទ្យាថ្មី ការចុះបញ្ជីរថយន្តចង្កូតស្ដាំត្រូវតែបញ្ឈប់ទាំងស្រុងចាប់ពីពេលនេះតទៅ ដោយគ្មានលក្ខខណ្ឌ ដើម្បីកាត់បន្ថយគ្រោះថ្នាក់ចរាចរណ៍ឲ្យនៅកម្រិតអប្បបរិមា ស្របតាមប្រសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍» ។ ជាមួយគ្នានេះលោកទេសរដ្ឋមន្ត្រីបានអះអាងថា ការបិទបញ្ចប់ការចុះបញ្ជីរថយន្តចង្កូតស្តាំយន្តការមួយប្រយុទ្ធប្រឆាំងនឹងក្រុមជនខិលខូច ដែលនៅតែបន្តលួចនាំយករថយន្តចង្កូតស្តាំចូលក្នុងប្រទេសកម្ពុជាផ្ទុយពីអនុសាសន៍របស់សម្តេចតេជោ ហ៊ុន សែន កាលពីថ្ងៃទី០៥ ខែមករា ឆ្នាំ២០១៦ បានសម្រេចឲ្យប្រជាពលរដ្ឋប្រើរថយន្តចង្កូតស្តាំទាំងអស់ ចូលទៅធ្វើផ្លាកលេខ និងបង់ពន្ធទៅតាមការកំណត់ ហើយអនុគ្រោះដល់ពួកគេមិនឲ្យកែចង្កូតថែមទៀតផង។ ទន្ទឹមគ្នានោះសម្តេចតេជោ ហ៊ុន សែន បានហាមមិនឲ្យមានការនាំចូលរថយន្តចង្កូតស្តាំទៀតនោះឡើយ ៕