ភ្នំពេញ ៖ លោក ផែង សុវិជ្ជានោ រដ្ឋលេខាធិការ ក្រសួង សាធារណការ និងដឹកជញ្ជូន បានប្តេជ្ញាចិត្ត ក្នុងការក សាងនូវប្រព័ន្ធដឹកជញ្ជូន ដែលទំនើប មានសុវត្ថិភាព និងអាចជឿទុកចិត្តបាន ជូនប្រជាពលរដ្ឋ។ ក្នុងឱកាសសម្ពោធ ដាក់ឲ្យដំណើរការជាផ្លូវការ នូវកម្មវិធីចែករំលែកយានជំនិះ ធ្វើដំណើរ នៅកម្ពុជា ដែលរៀបចំ ឡើងដោយក្រុមហ៊ុន UBER នៅថ្ងៃទី២៩ ខែកញ្ញា ឆ្នាំ ២០១៧ លោក ផែង សុវិជ្ជានោ បានឲ្យដឹងថា កម្មវិធី សម្ពោធរបស់ក្រុមហ៊ុន UBER នេះ បង្ហាញឲ្យឃើញពីការសហការគ្នាដ៏ល្អ រវាងរាជរដ្ឋាភិបាល និងវិស័យឯកជន ដើម្បីទាញយកផល ប្រយោជន៍អំពីបច្ចេកវិទ្យាថ្មីៗ ។ លោក ផែង សុវិជ្ជានោ បានថ្លែងថា “ប្តេជ្ញាក្នុងការកសាងនូវប្រព័ន្ធដឹកជញ្ជូនដែលទំនើប មានសុវត្ថិភាព និង អាចជឿទុកចិត្តបាន ជូនប្រជាពលរដ្ឋ ”។ លោកបន្ដថា ក្រសួងបានធ្វើការជាមួយក្រុមហ៊ុន UBER ក្នុងរយៈពេល៦ខែ ដើម្បីសិក្សាស្វែងរកនូវប្រព័ន្ធ ដឹក ជញ្ជូនប្រភេទថ្មី ក្នុងការចែករំលែកនូវយានជំនិះធ្វើដំណើរដូចជា កម្មវិធីចែករំលែកយានជំនិះធ្វើដំណើរ ។ ក្រសួងអបអរសារទរ ចំពោះការសម្ពោធរបស់ក្រុមហ៊ុន UBER ព្រមទាំងសង្ឃឹមយ៉ាងមុតមាំថា ក្រុមហ៊ុន នឹងដំណើរការទៅមុខដោយជោគជ័យ ក្នុងប្រវត្តិសាស្ត្រ នៃប្រទេសនៅអាស៊ី ។ ក្រុមហ៊ុនដទៃទៀតដូចជាក្រុមហ៊ុន Grab នៅមិនទាន់ទទួល បានអាជ្ញាបណ្ណផ្លូវការ ក្នុងការប្រតិបត្តិការ សេវា កម្មដឹកជញ្ជូន របស់ខ្លួននៅកម្ពុជានៅឡើយទេ ។ ក្រុមហ៊ុនទាំងនោះ ត្រូវស្នើសុំអាជ្ញាបណ្ណជាមុនសិន មុននឹង អាចប្រតិបត្តិការ ផ្តល់សេវាដឹកជញ្ជូន របស់ខ្លួននៅកម្ពុជាបាន៕