ភ្នំពេញៈ ក្នុងរយៈពេល២ឆ្នាំចុងក្រោយនេះ ក្រោមការដឹកនាំរបស់លោក ឃួង ស្រេង ជាអភិបាលរាជធានីភ្នំពេញ បានធ្វើឲ្យរាជធានី មានការអភិវឌ្ឍរីកចម្រើនលើគ្រប់វិស័យគួរឲ្យកត់សម្គាល់ ពិសេសវិស័យសាធារណការ ដែលបានកសាងស្ដារហេដ្ឋារចនាសម្ព័ន្ធ និងការផ្តល់សេវាឲ្យនៅកៀកកិតជាមួយប្រជាពលរដ្ឋ តាមរយៈការបង្កើតឲ្យមានច្រកចេញចូលតែមួយ ដែលទទួលបាននូវការកោតសរសើរ និងគាំទ្រយ៉ាងច្រើនពីសំណាក់ប្រជាពលរដ្ឋ ។ អភិបាលរាជធានីភ្នំពេញរូបនេះ បានដាក់ចេញនូវបទបញ្ជាដល់សមត្ថកិច្ចប៉ូលីស ប៉េអឹម និងអាជ្ញារធគ្រប់ខណ្ឌ ឲ្យបង្កើនការយកចិត្តទុកចំពោះបញ្ហាសន្តិសុខ សុវត្តិភាព ជូនប្រជាពលរដ្ឋទូទៅ មិនថា អ្នកមានឬអ្នកក្រ អ្នកធំឬឧកញ៉ានោះទេ សុទ្ធតែត្រូវការសន្តិសុខ សុវត្ថិភាពដូចគ្នា ពេលមានសន្តិសុខល្អហើយ អ្វីក៏កើតមានដែរ ។ ពាក់ព័ន្ធការងារអភិវឌ្ឍន៍ខាងលើនេះ ត្រូវបាន លោក សាំ ពិសិដ្ឋ ប្រធាន រាជធានីភ្នំពេញ បញ្ជាក់ឲ្យដឹងថា រាជធានីភ្នំពេញ ២ឆ្នាំចុងក្រោយនេះ បានកសាងនូវសមិទ្ធិផលធំៗជាច្រើន ក្នុងនោះមាន បន្តការស្ថាបនាមហាវិថីឈ្នះឈ្នះ ចាប់ពីជាតិលេខ៤ ដល់ជាតិលេខ៦ ប្រវែងជាង២៤គីឡូម៉ែត្រ បានបញ្ចប់ ជាមួយនឹងការដាក់បង្គោលភ្លើង បំភ្លឺសាធារណៈ ជូនប្រជាពលរដ្ឋ ដែលធ្វើដំណើរតាមដងមហាវិថីនេះ ។ សាងសង់បេតុងឆ្លងទន្លេសាប ដោយបានស្ថាបនារួចរាល់ បាឡេឆ្លងកាត់ទន្លេសាប នៅមុខឃ្លាំងសាំងសូគីម៉ិចក្នុងខណ្ឌប្ញស្សីកែវ ។ ការបើកការដ្ឋានស្ថាបនាអាកាសនិងក្រោមដីនៅរង្វង់មូលចោមចៅ ។ ស្ថាបនាប្រទះឡាង ខណ្ឌដង្កោ មេ ពីព្រៃសទៅទួលពង្រ ។ ក្នងនោះលោកអភិបាលរាជធានីភ្នំពេញ បានដឹកនាំការកសាង នូវស្ថានីយបូមទឹកជាច្រើនកន្លែង ដូចជាស្ថានីយបុរី១០០ខ្នង ស្ថានីយលូ៥ ដែលស្ថានីយទាំង២កន្លែងនេះស្ថាបនាបានប្រមាណ៨០ភាគរយហើយ ។ ចូលរួមបន្តការកសាងស្ថានីយបូមទឹកបឹងទំពុន ដែលបានបន្ថែមម៉ូទ័រ២គ្រឿង ការងារស្ថាបនាបង្ហើយស្ថានីយបូមទឹកបឹងត្របែក ស្ថានីយបូមទឹកទួលគោកទី១ និងស្ថានីយបូមទឹកទួលគោកទី២ ដោយបន្ថែមសមត្ថភាពបូមទឹកខ្លាំងជាងមុន រហូតទៅដល់៥ម៉ែត្រគុប ក្នុងមួយវិនាទី ដើម្បីរំដោះ និងកាត់បន្ថយការលិចលង់ ដោយជំនន់ទឹកភ្លៀង ។ ប្រធានមន្ទីរូបនេះបន្តថា នៅមានការងារដឹកនាំស្ថាបនាខ្សែក្រវ៉ាត់ក្រុងទី២ ដែលបាននឹងកំពុងស្ថាបនា ។ អាកាសផ្សារដីហុយ បានដាក់ដំណើរការរាល់ថ្ងៃនេះ ។ បន្តការស្ថាបនាបញ្ចប់ជាតិលេខ១ ខណ្ឌច្បារអំពៅ ។ ការកសាងរង្វង់មូល ស្រ្តីបីគួរស្រូវ ត្រង់ចំណុចប្រសប់ជាតិលេខ២ លេខ២០អា និងជើងឯកព្រែកជ្រៃនៅខណ្ឌដង្កោជាប់នឹងខេត្តកណ្តាល ។ ស្ថាបនាព្រែកថ្លឹងចាប់ពី៦០ម៉ែត្រទៅជាតិលេខ២ជាដើម ។ ល ។ បន្ថែមពីនេះ លោក ឃួង ស្រេង បានដឹកនាំការកសាងនិងប្រែក្លាយប្រឡាយស្ទឹងមានជ័យពីទឹកស្អុយ និងសំរាមភក់ជ្រាំ ឲ្យទៅជាប្រឡាយបេតុងអាមេ មានដើរអមមាត់ប្រឡាយ និងផ្តល់កម្មសិទ្ធជូនពលរដ្ឋ ដែលនៅលើប្រឡាយនេះ ចំនួន១៥២គ្រួសាររួចហើយ អាចសាងសង់ផ្ទះ រស់នៅសមរម្យ ដែលបច្ចុប្បន្នកំពុងស្ថាបនាយ៉ាងមមាញឹក ។ គម្រោងនេះបានបែងចែកជា៤តំណាក់កាល ។ លោក សាំ ពិសិដ្ឋ បានបន្តថា ក្នុងអណត្តិនេះផងដែរ ក៏មានការពង្រីកសហព័ន្ធរុស្សី ដែលមកដល់ពេលនេះ សម្រេចបាន៩០ភាគរយហើយ ។ ការងារដាក់បង្គោលភ្លើងបំភ្លឺសាធារណៈលើបណ្តោយជាតិលេខ១ ចាប់ពីភូមិក្តីតាកុយរហូតដល់ព្រំប្រទល់ខេត្តកណ្តាល ។ ដាក់បង្គោលភ្លើងបំភ្លឺសាធារណៈលើបណ្តោយជាតិលេខ៤ ចាប់ពីរង្វង់មូលចោមចៅរហូតដល់ព្រំប្រទល់ខេត្តកណ្តាល និងនៅក្នុងក្រុងជាច្រើនខ្សែទៀតត្រូវបានដាក់បង្គោលភ្លើងបំភ្លឺសាធារណៈ និងដាក់ភ្លើងស្តុបថ្មី ក្រោមជំនួយរបស់ចៃកា ។ ដោយឡែក សម្រាប់ការបំរើសេវា ជូនប្រជាពលរដ្ឋ នៅរាជធានីភ្នំពេញ ទទួលបានការគាំទ្រពេញចិត្ត ពេញថ្លើម ពីសំណាក់ប្រជាពលរដ្ឋ ក្នុងនោះ ផ្តល់សៀវភៅស្នាក់នៅ អត្តសញ្ញាណប័ណ្ណ អត្រានុកូលដ្ឋាន និងសំបុត្រកំណើតជាដើម ។ អនុវត្តតាមតាមអនុសាសន៍របស់សម្តេចតេជោ ហ៊ុន សែន កាលពីប៉ុន្មានថ្ងៃកន្លងមកនេះ អភិបាលរាជធានីភ្នំពេញ បានដឹកនាំអាជ្ញាធរខណ្ឌ និងមន្ត្រីជំនាញ ចុះសំណេះសំណាល និងពិនិត្យមើលស្ថានភាពជាក់ស្តែង ដើម្បីផ្តល់ជូននូវការប្រើប្រាស់ភ្លើងអគ្គិសនី ក្នុងតំលៃសមរម្យ ដល់អាជីវករលក់ដូរតាមបណ្តាផ្សារក្នុងរាជធានីភ្នំពេញ ឲ្យមកនៅត្រឹម ៧៤០រៀល ក្នុងមួយគីឡូវ៉ាត់ម៉ោង ដែលនឹងចាប់ផ្តើមពីខែមករា ឆ្នាំ២០១៩ នេះតទៅ ។ លើសពីនេះ លោក ឃួង ស្រេង បានជំរុញឲ្យអាជ្ញាធរខណ្ឌ មន្ទីរ ស្ថាប័ននិងស្ថាប័នពាក់ព័ន្ធ យកចិត្តទុកដាក់លើការងាររបស់ខ្លួនអោយបានល្អថែមទៀត ពិសេសលើការរៀបចំតាំងពិព័រណ៌ បង្ហាញសមិទ្ធផលគម្រោងអភិវឌ្ឍន៍សំខាន់ៗ នៅក្នុងពិធីសម្ពោធវិមានអនុស្សាវរីយ៍នយោបាយឈ្នះឈ្នះ និងការរៀបចំទិវាបុណ្យជាតិ៧ មករា ខួបអនុស្សាវរីយ៍លើកទី៤០ នៃទិវាជ័យជំនះ ៧មករាឆ្នាំ១៩៧៩- ៧ មករា ២០១៩ នៅពេលដ៏ខ្លីខាងមុខនេះ៕