[Swift news daily] - រដ្ឋមន្ត្រី អភិបាលខេត្ត មន្ត្រីរាជការ និងមហាជន ជិះកង់ ដើម្បីអបអរសាទរការដាក់សម្ពោធវិមានឈ្នះឈ្នះ!
2018-12-28
ទៅកាន់ទំព័រចុះផ្សាយក្នុង Swift news daily
(ភ្នំពេញ)៖ ដើម្បីចូលរួមអបអរសាទរក្នុងការដាក់សម្ពោធវិមានឈ្នះឈ្នះ សហព័ន្ធកីឡាទោចក្រយានកម្ពុជា បានរៀបចំការជិះកង់កំសាន្ត នៅព្រឹកព្រលឹមថ្ងៃសុក្រ ទី២៨ ខែធ្នូ ឆ្នាំ២០១៨។ ការជិះកង់កំសាន្ត ដែលចូលរួមដោយរដ្ឋមន្ត្រីក្រសួងសាធារណការ និងដឹកជញ្ជូន លោកស៊ុនចាន់ថុល លោកសុខចិន្តាសោភា លោកស្រី មិថុនា ភូថង អភិបាលខេត្តកោះកុង រួមទាំងមន្ត្រីរាជការ និងមហាជនរាប់រយនាក់ បានចេញដំណើរកាលពីម៉ោង ៦ ព្រឹក ពីពហុកីឡដ្ឋានជាតិអូឡាំពិក ឆ្លងតាមស្ពានជ្រោយចង្វារ នៅវិមានឈ្នះឈ្នះ។
ក្រៅពីការជិះកង់កម្សាន្តមហាជន ដើម្បីអបអរសាទរពិធីសម្ពោធវិមានអនុស្សាវរីយ៍នយោបាយឈ្នះឈ្នះ និងអបអរសាទរខួបលើកទី២០ នៃការបញ្ចប់សង្គ្រាមស៊ីវិលនៅកម្ពុជា គឺនៅព្រឹកថ្ងៃទី២៩ ខែធ្នូ ឆ្នាំ២០១៨ សហព័ន្ធខ្មែរកីឡាទោចក្រយាន ក៏បានរៀបចំកម្មវិធីប្រកួតជ្រើសរើសជើងឯកថ្នាក់ជាតិ ឆ្នាំ២០១៨ លើវិញ្ញាសាប្រណាំងទោចក្រយាន ចាប់ពីថ្ងៃទី២៩ ដល់ថ្ងៃទី៣០ ខែមិថុនា ឆ្នាំ២០១៨។
ក្នុងនោះ នៅម៉ោង ៨ព្រឹក ថ្ងៃទី២៩ ខែធ្នូ ឆ្នាំ២០១៨ ប្រណាំងកង់ នៅភ្នំប្រសិទ្ធិ ដោយវិញ្ញាសាកង់ភ្នំបុរស ( Elite & Junior ) ដោយ Elite ចម្ងាយ ១៧,៥ គីឡូម៉ែត្រ និង Junior ចម្ងាយ ១៤ គីឡូម៉ែត្រ។ ចំណែកនៅម៉ោង ៩កន្លះព្រឹកថ្ងៃទី២៩ ខែធ្នូ ចាប់ផ្តើមការប្រកួតវិញ្ញាសាកង់ភ្នំនារី ចម្ងាយ ១២ គីឡូម៉ែត្រ។ នៅម៉ោង ១១ ព្រឹក កម្មវិធីប្រគល់មេដាយដល់កីឡាករ និងកីឡាការិនី ទទួលបានជ័យលាភី។
ដោយឡែក នៅថ្ងៃទី៣០ ខែធ្នូ ឆ្នាំ២០១៨ នៅវិមានឈ្នះឈ្នះ សហព័ន្ធខ្មែរកីឡាទោចក្រយាន ក៏នឹងរៀបចំការប្រណាំងកង់ ដោយចាប់ផ្តើមនៅម៉ោង ៧ព្រឹក ប្រកួតវិញ្ញាសាកង់គួកបុរស និងនារី ( Elite, Junior, Master ) ដោយ Elite ចម្ងាយ ១១៣ គីឡូម៉ែត្រ Junior ចម្ងាយ ៩០,៤ គីឡូម៉ែត្រ និងMaster ចម្ងាយ ៩០,៤ គីឡូម៉ែត្រ។ នៅម៉ោង ១១ ព្រឹក ថ្ងៃទី៣០ ខែធ្នូ ឆ្នាំ២០១៨ កម្មវិធីប្រគល់មេដាយដល់កីឡាករ និងកីឡាការិនី ទទួលបានជ័យលាភី។
សហព័ន្ធខ្មែរកីឡាទោចក្រយាន បានគូសបញ្ជាក់ថា កីឡាករជិះកង់ ប្រភេទ Elite ចាប់ពីអាយុ ១៨-៣៩ ឆ្នាំ។ Junior ចាប់ពី ១៤-១៧ ឆ្នាំ។ Master ចាប់ពី ៤០ ឆ្នាំឡើងទៅ និងស្ត្រី មិនកំណត់អាយុទេ។
សូមរម្លឹកថា ក្នុងរយៈពេល ៣ថ្ងៃ ៣យប់ នៃពិធីសម្ពោធវិមានអនុស្សាវរីយ៍នៃនយោបាយឈ្នះ ឈ្នះ និងពិធីអបអរសាទរខួបលើកទី២០ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនូវនយោបាយ ឈ្នះ ឈ្នះ ចាប់ពីថ្ងៃទី២៩-៣១ ខែធ្នូ ឆ្នាំ២០១៨ នៅវិមានឈ្នះឈ្នះ នឹងមានរៀបចំកម្មវិធីជាច្រើន ដូចជា៖ ពិព័រណ៍អំពីសមិទ្ធផលជាតិ-អន្តរជាតិនានា សរុបចំនួនប្រមាណ ៨០០ ស្តង់ កម្មវិធីប្រដាល់គុណដណ្តើមខ្សែក្រវ៉ាត់ ក្បួនជិះកង់កំសាន្ត កីឡាវាយកូនហ្គោល អុកចត្រង្គ បុរសកម្លាំងខ្លាំង ប្រណាំងរទេះគោ ក្របី រទេះសេះ កាយវប្បកម្ម ក្បាច់គុណ កម្មវិធីរបាំ សិល្បះ តន្ត្រី ការរាំកំសាន្ត និងការសម្តែងល្ខោនរឿង “ដំណើរសង្គ្រោះជាតិកម្ពុជា” ព្រមទាំងការបាញ់កាំជ្រួចបែបថ្មី 3D៕
