អាចនិយាយបានថា ជាកីឡាថ្មីសម្រាប់កម្ពុជា និង ពលរដ្ធខ្មែរមួយចំនួន មិនទាន់បានស្គាល់ប្រភេទកីឡាមួយនេះ ប៉ុន្តែសម្រាប់សហព័ន្ធកីឡាហែលទឹកបានបន្ថែមវិញ្ញាសាមួយនេះ ដើម្បីបណ្តុះបណ្តាលកីឡាករ កីឡាការិនី និង សម្រាប់ការដណ្តើមមេដាយក្នុងព្រឹត្តការណ៍អន្តរជាតិនាពេលខាងមុខផងដែរ។ ជាក់ស្តែងក្រោយពីវគ្គបណ្តុះបណ្តាល អាជ្ញាកណ្តាល ចៅក្រម គ្រូបង្វឹករួចមក ប្រភេទកីឡាបាល់ទឹក ត្រូវបានជ្រើសយកមកធ្វើការប្រកួត នៅក្នុងព្រឹត្តការណ៍ ប្រកួតកីឡាហែលទឹកជ្រើសរើស ជើងឯកដណ្តើមពានរង្វាន់តេជោ សែន លើកទី៤ ប្រចាំឆ្នាំ២០១៨ នៅមណ្ឌល កីឡាហែលទឹកតេជោសែន ខេត្តកំពង់ចាមដែលបញ្ចប់កាលពីថ្ងៃទី២ធ្នូម្សិលមិញនេះ ។ កីឡា​បាល់​ទឹក ជា​ប្រភេទ​កីឡា​អូឡាំពិក ដែល​គេ​លេង​ក្នុង​អាងទឹក​មាន​ជម្រៅ​ជាង​២​ម៉ែត្រ​ជាមួយ​សមាជិក​ម្ខាង​៤​នាក់​។ ប៉ុន្តែ​ក្រុម​នីមួយៗ​មាន​សមាជិក​ចំនួន​១៣​នាក់​។ សូមបញ្ចាក់ផងដែរថា ការប្រកួតនេះរៀបចំឡើង ដើម្បីរំលឹកដល់ថ្ងៃទី០២ ធ្នូ ១៩៧៨ ថ្ងៃបង្កើតរណសិរ្ស សាមគ្គីសង្គ្រោះជាតិ ដែលបានរំដោះប្រជាជន និងមាតុភូមិកម្ពុជាពីរបបប្រល័យពូជសាសន៍ ប៉ុល ពត ក៏ដូចជាថ្ងៃខួបនៃការសម្ពោធដាក់ ឱ្យប្រើប្រាស់មណ្ឌលកីឡាហែលទឹកតេជោសែន ខេត្តកំពង់ចាម ដែល ជាសមិទ្ធផលក្រោមគំនិតផ្តួចផ្តើមរបស់ឯកឧត្តម ទេសរដ្ឋមន្ត្រី ស៊ុន ចាន់ ថុល និងលោកព្រឹទ្ធាចារ្យ ហែម ថុន ផងដែរ។ ការប្រកួតមានកីឡាករ-កីឡាការិនីចំនួន ១២៥នាក់ ប្រុសចំនួន៦៨នាក់ ស្រី៥៧នាក់ មកពីក្លឹបចំនួន៨ ចូលរួមប្រកួតប្រជែងលើវិញ្ញាសារឯកត្តជន វិញ្ញាសារហែលបណ្តាក់ និងវិញ្ញាសារកីឡាបាល់ទឹក ផងដែរ។ ចំណាត់ថ្នាក់លេខ១បាន ទៅក្លឹប ក្លឹបក្រសួងសារធារណៈការ និង ដឹកជញ្ចូន ឈ្នះមេដាយ ៧គ្រឿង មាស២ ប្រាក់ ២និង សំរឹទ្ធ៣។ចំណាត់ថ្នាក់លេខ២ ក្លឹបក្រសួងមហាផ្ទៃ ឈ្នះមេដាយ ៥គ្រឿង មាស ២ប្រាក់២ និង សំរឹទ្ធិ១ ។រីឯក្លឹបនាគរាជខេត្តកំពង់ចាម ឈ្នះមេដាយ ៣គ្រឿង មាស១ ប្រាក់២។ ឯកឧត្តមទេសរដ្ឋមន្ត្រី ស៊ុន ចាន់ថុល បានផ្តាំផ្ញើ និងជំរុញលើកទឹកចិត្តឲ្យកីឡាករ កីឡាការិនីទាំងអស់ ខិត ខំប្រឹងប្រែងហ្វឹកហាត់ដើម្បីត្រៀមយកមេដាយជូនជាតិយើង ក្នុងព្រឹត្តិការណ៍ស៊ីហ្គេម ដែលកម្ពុជាគ្រោងធ្វើជាម្ចាស់ផ្ទះនៅ២០២៣ខាងមុខ៕