ក្រុមការងារពិសេសចុះបង្ក្រាបរថយន្តដឹកលើសទម្ងន់ ៦គ្រឿង នៅខេត្តពោធិ៍សាត់ រកឃើញលើសកម្រិតរហូតដល់ ៤៥តោន (ពោធិ៍សាត់)៖ ក្រុមការងារពិសេសត្រួតពិនិត្យ និងបង្ក្រាបយានយន្តដឹកជញ្ជូនលើសទម្ងន់កម្រិតកំណត់ បានបើកប្រតិបត្តិការចុះត្រួតពិនិត្យយ៉ាងតឹងរ៉ឹងនៅក្នុងភូមិសាស្ត្រខេត្តពោធិ៍សាត់ ដោយរកឃើញរថយន្តដឹកជញ្ជូនធុនធ្ងន់ចំនួន ៦គ្រឿង ផ្ទុកទំនិញលើសទម្ងន់កំណត់ ខណៈរថយន្តខ្លះផ្ទុកលើសរហូតដល់ ៤៥តោន។ ប្រតិបត្តិការនេះបានធ្វើឡើងនៅវេលាយប់ថ្ងៃទី៣១ ខែឧសភា បន្តដល់ថ្ងៃទី១ ខែមិថុនា ឆ្នាំ២០២៦ ដោយអនុវត្តតាមបទបញ្ជាផ្ទាល់របស់ឯកឧត្តមរដ្ឋមន្ត្រី និងជាប្រធានគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់។ ក្រុមការងារត្រូវបានដឹកនាំដោយ ឯកឧត្តម ឯក រដ្ឋ អនុរដ្ឋលេខាធិការ និងជាប្រធានក្រុម ដោយសហការជាមួយមន្ត្រីស្ថានីយជញ្ជីងឃ្លាំងមឿង។ ជាលទ្ធផល នៅលើផ្លូវជាតិលេខ៥៥ ត្រង់គីឡូម៉ែត្រលេខ៣ ស្ថិតក្នុងស្រុកបាកាន ខេត្តពោធិ៍សាត់ ក្រុមការងារបានឃាត់ និងត្រួតពិនិត្យរថយន្តសណ្តោងសឺមីរ៉ឺម៉កភ្លៅ៦ ចំនួន ២គ្រឿង ដែលផ្ទុកទម្ងន់សរុប ៨៧តោន និង ៩០តោន ពោលគឺលើសទម្ងន់កំណត់ចំនួន ៤២តោន និង ៤៥តោនរៀងគ្នា។ ដោយឡែក នៅលើផ្លូវជាតិលេខ៥ ចន្លោះគីឡូម៉ែត្រលេខ១៩១ និង ១៩២ ក្នុងស្រុកបាកានដដែល ក្រុមការងារបានត្រួតពិនិត្យរថយន្តភ្លៅ៤ ចំនួន ៤គ្រឿង ដែលផ្ទុកទម្ងន់សរុបចន្លោះពី ៣៨តោន ដល់ ៤៥តោន ដោយរកឃើញថា មានទម្ងន់លើសកម្រិតកំណត់ចាប់ពី ៨តោន រហូតដល់ ១៥តោន។ មន្ត្រីជំនាញបានបញ្ជាក់ថា ការដឹកជញ្ជូនលើសទម្ងន់កំណត់ មិនត្រឹមតែជាការល្មើសច្បាប់ប៉ុណ្ណោះទេ ប៉ុន្តែថែមទាំងបង្កផលប៉ះពាល់យ៉ាងធ្ងន់ធ្ងរដល់គុណភាពផ្លូវថ្នល់ ស្ពាន និងហេដ្ឋារចនាសម្ព័ន្ធសាធារណៈ ព្រមទាំងបង្កហានិភ័យខ្ពស់ដល់សុវត្ថិភាពចរាចរណ៍ផងដែរ។ អាជ្ញាធរបានអះអាងថា នឹងបន្តរឹតបន្តឹងការត្រួតពិនិត្យ និងអនុវត្តវិធានការច្បាប់ដោយគ្មានការលើកលែង ចំពោះម្ចាស់យានយន្ត និងក្រុមហ៊ុនដឹកជញ្ជូនណាដែលនៅតែបំពានបទប្បញ្ញត្តិស្តីពីការដឹកជញ្ជូនលើសទម្ងន់កម្រិតកំណត់៕