ស្ថិតនៅទិសឧត្តរ ខេត្តឧត្តរមានជ័យកំពុងផ្លាស់ប្តូរមុខមាត់ជាមួយគម្រោងអភិវឌ្ឍ និងសមិទ្ធផលថ្មីៗលេចរូបរាងជាបន្តបន្ទាប់។ នៅក្រុងសំរោង ការដ្ឋានការស្ថាបនាផ្លូវបេតុងភ្លោះដំបូងគេកំពុងលេចរូបរាង ដែលនឹងប្រែក្លាយក្រុងសំរោងជាបេះដូងនៃសេដ្ឋកិច្ច និងទេសចរណ៍របស់ខេត្តឧត្តរមានជ័យ។ លោក ផុន ចាន់និល អភិបាលនៃគណៈអភិបាលក្រុងសំរោងបានឲ្យដឹងថា ផ្លូវបតុងភ្លោះដែលស្ថាបនានេះមានប្រវែងសរុប ៣,៤៦០ ម៉ែត្រ (ទទឹងពី ១៥ ម៉ែត្រ កម្រាស់ ២ តឹក) ដែលការស្ថាបនាក៏មានរៀបការ៉ូឡាសងខាង បង្គោលភ្លើងដៃភ្លោះ និងមានសួនច្បារទ្រូងផ្លូវយ៉ាងស្អាតផងដែរ។ បើតាមមន្រ្តីរដ្ឋបាលក្រុងសំរោង ផ្លូវបេតុងភ្លោះនេះគ្រោងបញ្ចប់ការស្ថាបនាទាំងស្រុងនៅអំឡុងខែកក្កដា ឬខែសីហាខាងមុខនេះ។ ការស្ថាបនាផ្លូវបេតុងភ្លោះដំបូងក្នុងក្រុងសំរោង ក៏មានការចូលរួមពីប្រជាពលរដ្ឋដែលបានស្ម័គ្រចិត្តរុះរើសំយ៉ាបតូប និងរបង ដើម្បីផ្ដល់លទ្ធភាពឱ្យគ្រឿងចក្រដំណើរការតាមផែនការ។ ក្រៅពីផ្លូវបេតុងដែលជាសមិទ្ធផលថ្មី ផ្លូវកៅស៊ូនៅស្រុកបន្ទាយអំពិលដែលមានប្រវែង ៨ គីឡូម៉ែត្រ និងផ្លូវគ្រួសក្រហមនៅស្រុកអន្លង់វែងប្រវែង ៦,៧០០ម៉ែត្រ ក៏បានកំពុងដំណើរការស្ថាបនាទន្ទឹមគ្នា។ ទន្ទឹមសមិទ្ធផលផ្សេងៗដែលនឹងលេចរូបរាងបន្តបន្ទាប់នេះ តាមរយៈការប្ដេជ្ញាចិត្តខ្ពស់និងការខិតខំប្រឹងប្រែងរបស់រដ្ឋបាលខេត្ត សមិទ្ធផលជាច្រើនបានលេចចេញរូបរាងជាផ្លូវការនៅលើទឹកដីដ៏កំសត់នៃខេត្តឧត្តរមានជ័យនេះ មានការប្រែប្រួលជាវិជ្ជមានគួរឱ្យកត់សម្គាល់ រួមមានការស្ថាបនា និងជួសជុលសួនព្រះគណេស, អគាររដ្ឋបាលខេត្ត, ផ្ទះមុខងារសម្រាប់មន្ត្រីរាជការ, អគារ ប.ស.ស, សាលារៀនចំនួន ០៧ខ្នង និងព្រះវិហារចំនួន ០២កន្លែង។ រដ្ឋបាលខេត្តក៏បានរៀបចំសួននាងគង្ហីងនៅកណ្ដាលបឹងស្នោរ, រង្វង់មូលព្រះលោកេស្វរៈ, ផ្លូវបេតុងក្នុងភូមិបុរីរដ្ឋបាល និងប្រព័ន្ធភ្លើងបំភ្លឺសាធារណៈនៅតាមដងផ្លូវជាតិក្នុងក្រុងសំរោង ស្រុកអន្លង់វែង និងស្រុកបន្ទាយអំពិល ប្រកបដោយសោភ័ណភាព។ គម្រោងជាបន្តបន្ទាប់នឹងមានការរៀបចំ “ផ្សាររាត្រី និងផ្សារបន្លែ” នៅបឹងតូច និងកែលម្អ “សួននាងគង្ហីង” ឱ្យក្លាយជាតំបន់ទេសចរណ៍បៃតង។ អភិបាលខេត្តឧត្តរមានជ័យ លោក មាន ចាន់យ៉ាដា បានដាក់បទបញ្ជាយ៉ាងតឹងរ៉ឹងឱ្យពង្រឹងគុណភាពការស្ថាបនាផ្លូវ ក្រោមទស្សនៈដ៏មុតមាំ ”ដើម្បីឱ្យឡានខ្លាចផ្លូវ មិនមែនឱ្យផ្លូវខ្លាចឡាននោះទេ”។ បន្ថែមពីនេះ លោកអភិបាលខេត្តបានជម្រុញឱ្យអនុវត្តតាមបច្ចេកទេស ហាមដាច់ខាតការអន្តរាគមន៍បើកទ្រូងផ្លូវចូលផ្ទះអ្នកធំ ឬអ្នកមាន និងត្រូវធានាឱ្យបានថា ផ្លូវថ្មីនេះក្រៅពីផលប្រយោជន៍នៃការប្រើប្រាស់ផ្លូវ គឺអាចរំដោះបញ្ហាទឹកលិចនៅក្នុងក្រុងសំរោង។ ពាក់ព័ន្ធសមិទ្ធផលដែលសាងសង់ឡើងដើម្បីទុកជាមរតកសម្រាប់កូនចៅអ្នកឧត្តរមានជ័យ លោក មាន ចាន់យ៉ាដា បានសង្កត់ធ្ងន់ថា៖ “ឧត្តរមានជ័យមិនត្រូវជាខេត្តកំសត់រហូតនោះទេ យើងត្រូវប្រឡងប្រណាំងការអភិវឌ្ឍឱ្យស្មើមុខស្មើមាត់នឹងបណ្តាខេត្តដទៃ”៕