ភ្នំពេញៈ ក្រសួងសាធារណការ និងដឹកជញ្ជូនគម្រោងនឹងបំពាក់ភ្លើងស្តុបថ្មីចំនួន ២៤ទីតាំងបន្ថែមទៀតនៅតាមបណ្តោយផ្លូវជាតិលេខ៥ ដើម្បីសម្រួលដល់ការធ្វើចរាចរណ៍ និងបញ្ចៀសគ្រោះថ្នាក់ចរាចរណ៍។ នេះបើយោងតាមលោក ផន រឹម អ្នកនាំពាក្យក្រសួងសាធារណការ នាថ្ងៃអង្គារ ទី២៦ ខែឧសភានេះ។បន្ទាប់ពីមានឧបទ្ទវហេតុគ្រោះថ្នាក់ចរាចរណ៍ដ៏រន្ធត់ដែលសម្លាប់កម្មករនិយោជិតចំនួន ៩នាក់កាលពីពេលថ្មីៗនេះ ប្រជាពលរដ្ឋតាមរយៈបណ្តាញសង្គម និងសារព័ត៌មានអនឡាញបានស្នើសុំឱ្យ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ជួយពន្លឿនការដាក់ភ្លើងស្តុបនៅក្នុងទឹកដីនៅខេត្តកំពង់ឆ្នាំងឲ្យបានឆាប់រហ័ស ដើម្បីជួយកាត់បន្ថយគ្រោះថ្នាក់ចរាចរណ៍។លោក ផន រឹម បានឆ្លើយតបថា កិច្ចការទាំងនេះ ក្រសួងកំពុងដំណើរការហើយ ដោយបំពាក់ភ្លើងស្តុបតាមបណ្តោយផ្លូវជាតិលេខ៥ ក្នុងខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។ លើសពីនេះ មិនត្រឹមភ្លើងស្តុបនោះទេ ក្រសួងក៏នឹងបំពាក់បន្ថែមផ្លាកសញ្ញាចរាចរណ៍ ភ្លើងសញ្ញាចរាចរណ៍ និងចំណាំងផ្លាតជាដើម ដែលសម្ភារទាំងនោះបានដឹកទៅកាន់ទីតាំងកំណត់ជាបន្តបន្ទាប់ហើយ។លោកបញ្ជាក់ដូច្នេះថា៖«ឯកឧត្តម ប៉េង ពោធិ៍នា បានគិតគូរខ្ពស់លើចំណុចនេះ ដោយបានចង្អុលបង្ហាញឱ្យក្រុមការងារធ្វើកិច្ចការនេះឱ្យបានល្អ ឱ្យបានលឿន និងឱ្យមានប្រសិទ្ធភាពខ្ពស់។ សម្ភារទាំងនោះបានដឹកទៅកាន់ទីតាំងដំឡើង ដោយបំពាក់តាមទីតាំងកំណត់ ដែលមានការសិក្សាត្រឹមត្រូវច្បាស់លាស់ ពីក្រុមការងារបច្ចេកទេសក្រសួងសាធារណការ និងដឹកជញ្ជូន និងភាគីមិត្តជប៉ុន»។ ឧបទ្ទវហេតុគ្រោះថ្នាក់ចរាចរណ៍រវាងរថយន្តដឹកកម្មករនិយោជិត និងរថយន្តដឹកទំនិញធុនធំ ក្នុងភូមិសាលាលេខ៥ ឃុំអូរឫស្សី ស្រុកកំពង់ត្រឡាច កាលពីព្រឹកថ្ងៃសៅរ៍ ទី២៣ ខែឧសភា បានបណ្តាលឱ្យមានជនរងគ្រោះជាង៥០នាក់។ ក្នុងនោះ បានស្លាប់បាត់បង់ជីវិតចំនួន ៩នាក់ (ស្រី ៨នាក់) រងរបួសធ្ងន់ជាង ១០នាក់ និងរងរបួសស្រាលជាង ៣០នាក់ ក្នុងនោះមានស្ត្រីមានផ្ទៃពោះ ១នាក់ផងដែរ៕