(ព្រះវិហារ)៖ ក្រុមការងារការិយាល័យសុវត្ថិភាពចរាចរណ៍ នៃមន្ទីរសាធារណការ និងដឹកជញ្ជូនខេត្តព្រះវិហារចំនួន៤រូប ក្រោមការណែនាំពីលោក សំ លាងទ្រី ជាប្រធានមន្ទីរ នៅព្រឹកថ្ងៃទី២២ ខែឧសភា ឆ្នាំ២០២៦ បានចូលរួមសហការជាមួយក្រុមហ៊ុនស្រាបៀរ Ganzberg និងកម្លាំងនគរបាលចរាចរណ៍ខេត្តព្រះវិហារ រៀបចំសកម្មភាពផ្សព្វផ្សាយអប់រំអំពីសុវត្ថិភាពចរាចរណ៍ផ្លូវគោក និងចែកជូនមួកសុវត្ថិភាពដល់ ប្រជាពលរដ្ឋដែលធ្វើដំណើរតាមដងផ្លូវក្នុងក្រុងព្រះវិហារ។ ក្នុងសកម្មភាពនេះ ក្រុមការងារបានចែកជូនមួកសុវត្ថិភាពចំនួន៧០០មួក ជូនប្រជាពលរដ្ឋចំនួន៧០០នាក់ ក្នុងនោះស្រី៣៤៥នាក់ ដើម្បីជំរុញការយល់ដឹង និងលើកទឹកចិត្តឱ្យប្រជាពលរដ្ឋយកចិត្តទុកដាក់ពាក់ មួកសុវត្ថិភាពឱ្យបានត្រឹមត្រូវរាល់ពេលធ្វើដំណើរ ដោយម៉ូតូ ឬទោចក្រយានយន្ត។ ជាមួយគ្នានេះ ក្រុមការងារក៏បានផ្សព្វផ្សាយអប់រំអំពីច្បាប់ចរាចរណ៍ និងវិធានសុវត្ថិភាពសំខាន់ៗ ដោយបានប្រើប្រាស់សម្ភារ និងឯកសារផ្សព្វផ្សាយមួយចំនួនរួមមាន៖ សៀវភៅ “អ្វីដែលអ្នកបើកបរទោចក្រយានយន្តត្រូវយល់ដឹង” ចំនួន៤០០ក្បាល ខិត្តប័ណ្ណស្តីពីប្រការសំខាន់ៗសម្រាប់អ្នកប្រើប្រាស់ផ្លូវថ្នល់ ចំនួន៣០០សន្លឹក។ សកម្មភាពនេះ មានគោលបំណងរួមចំណែកកាត់បន្ថយគ្រោះថ្នាក់ចរាចរណ៍ ផ្សព្វផ្សាយការគោរពច្បាប់ចរាចរណ៍ និងបង្កើនការយល់ដឹងដល់ប្រជាពលរដ្ឋអំពីសារៈសំខាន់នៃការពាក់មួកសុវត្ថិភាព ដែលជាវិធានការចាំបាច់ក្នុងការការ ពារអាយុជីវិត និងកាត់បន្ថយហានិភ័យនៃការរងរបួសធ្ងន់ធ្ងរ នៅពេលមានគ្រោះថ្នាក់ចរាចរណ៍កើតឡើង។ តាមរយៈកិច្ចសហការរវាងស្ថាប័នជំនាញ និងវិស័យឯកជននេះ បានបង្ហាញពីការចូលរួមយ៉ាងសកម្មក្នុងការលើកកម្ពស់វប្បធម៌សុវត្ថិភាពចរាចរណ៍ និងការទទួលខុសត្រូវរួមគ្នា ដើម្បីធ្វើឱ្យការធ្វើដំណើរតាមដងផ្លូវកាន់ តែមានសុវត្ថិភាព និងសណ្តាប់ធ្នាប់ល្អប្រសើរ៕