កំណាត់ផ្លូវជាតិលេខ ៧ ដែលមានប្រវែង ៩៦,៦៣ គម ចាប់ពីខេត្ដក្រចេះទៅច្រកត្រពាំងក្រៀលខេត្ដស្ទឹងត្រែងជាប់ព្រំដែនឡាវ បានឈានទៅចុះហត្ថលេខាលើកិច្ចព្រមព្រៀងអនុវត្តគម្រោងធ្វើឱ្យប្រសើរឡើងវិញ ដែលនឹងត្រូវស្ថាបនាលើកកម្រិតជាផ្លូវក្រាលបេតុងកៅស៊ូ AC។ គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៧ ប៉ែកខាងជើងនេះ មានសក្ដានុពលបម្រើដល់វិស័យឡូជីស្ទីក ដែលនឹងជួយដល់ការជំរុញកំណើនសេដ្ឋកិច្ច និងការតភ្ជាប់នៅក្នុងតំបន់ភូមិភាគឦសាន ជាពិសេសតភ្ជាប់ទៅកាន់ព្រំដែនអន្ដរជាតិកម្ពុជា-ឡាវ (ត្រពាំងក្រៀល-ណងណុកខៀន)។ ផ្លូវជាតិលេខ ៧ គឺជាខ្សែផ្លូវជាតិមួយក្នុងចំណោមផ្លូវជាតិសំខាន់ៗរបស់ប្រទេសកម្ពុជា ដែលមានប្រវែងជាង ៥០០ គីឡូម៉ែត្រ ចាប់ពីទីប្រជុំជនស្គន់ក្នុងខេត្តកំពង់ចាម ទៅច្រកទ្វារត្រពាំងក្រៀលជាប់ព្រំដែនជាមួយឡាវ។ កំណាត់ផ្លូវជាតិលេខ ៧ ដែលមានប្រវែងជាង ៥០០ គីឡូម៉ែត្រ កំពុងស្ថាបនាលើកកម្រិតជាផ្លូវ AC ជាកំណាត់ៗ។ កំណាត់ផ្លូវជាតិលេខ ៧ ចាប់ពីរង្វង់មូលស្គន់ក្នុងស្រុកជើងព្រៃ រហូតដល់រង្វង់មូលស្ពានគីហ្សូណាទីរួមខេត្តកំពង់ចាម ដែលមានប្រវែង ៤៥,៤៨៩គ.ម កំពុងតែស្ថាបនាពង្រីកពី ២ គន្លងទៅ ៤ គន្លង។ កំណាត់ផ្លូវនេះបានបើកការដ្ឋានសាងសង់ឡើងវិញកាលពីអំឡុងដើមឆ្នាំ ២០២៣ ហើយគ្រោងបញ្ចប់នៅឆ្នាំ ២០២៦ នេះ។ ដោយឡែកកំណាត់ផ្លូវជាតិលេខ ៧ ពីរង្វង់មូលខ្លាស្ទុះក្នុងក្រុងក្រចេះ រហូតដល់ចំណុចគីឡូម៉ែត្រលេខ ៤២៤ ស្ថិតក្នុងភូមិអូរព្រះ ឃុំអូរគ្រៀង ស្រុកសំបូរ ចន្លោះ (គ.ម ៣៣១+២៥០ ដល់ គ.ម ៤២៤+៩៤០) ដែលមានប្រវែងជិត ៩៤ គីឡូម៉ែត្រ បានបញ្ចប់ការស្ថាបនាកែលម្អដោយក្រាលបេតុងកៅស៊ូ AC ក្រោមជំនួយឥតសំណងពីប្រទេសចិនដោយប្រើប្រាស់ថវិកាសាងសង់ប្រមាណជិត ៤០ លានដុល្លារ៕