រឹតបន្តឹងច្បាប់ចរាចរណ៍! ក្រុមការងារខេត្តព្រៃវែង ចុះកាត់ទ្រុងរថយន្តកែច្នៃខុសលក្ខណៈបច្ចេកទេស នៅស្រុកស្វាយអន្ទរ (ព្រៃវែង)៖ ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស នៃអនុគណកម្មការសុវត្ថិភាពចរាចរណ៍ផ្លូវគោកខេត្តព្រៃវែង កាលពីថ្ងៃទី២០ ខែឧសភា ឆ្នាំ២០២៦ វេលាម៉ោង១២ថ្ងៃត្រង់ បានចុះអនុវត្តការត្រួតពិនិត្យ និងរឹតបន្តឹងច្បាប់ចរាចរណ៍ផ្លូវគោក លើយានយន្តកែច្នៃខុសលក្ខណៈបច្ចេកទេស នៅលើកំណាត់ផ្លូវជាតិលេខ១១ ចន្លោះ PK៤០ ដល់ PK៤១ ស្ថិតក្នុងភូមិពោធិចិន្ដាំ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង។ ប្រតិបត្តិការនេះ ធ្វើឡើងក្រោមការណែនាំពីឯកឧត្តម សាយ សុជាតិ អភិបាលរងនៃគណៈអភិបាលខេត្តព្រៃវែង និងលោក អ៊ុន សុធា ប្រធានមន្ទីរសាធារណការ និងដឹកជញ្ជូនខេត្តព្រៃវែង ដោយដឹកនាំអនុវត្តផ្ទាល់ដោយលោកស្រី ចាន់ សុភា និងមានការចូលរួមសហការពីរដ្ឋបាលស្រុកស្វាយអន្ទរ រដ្ឋបាលឃុំស្វាយអន្ទរ និងប៉ុស្តិ៍នគរបាលរដ្ឋបាលឃុំស្វាយអន្ទរ។ ជាលទ្ធផល ក្រុមការងារបានត្រួតពិនិត្យឃើញរថយន្តកែច្នៃខុសលក្ខណៈបច្ចេកទេសចំនួន១គ្រឿង ដែលបានតទ្រុងខុសស្តង់ដារបច្ចេកទេស។ ក្នុងនោះ ម្ចាស់យានយន្តបានទទួលស្គាល់កំហុស និងយល់ព្រមអនុវត្តតាមការណែនាំរបស់សមត្ថកិច្ច ដោយបានធ្វើការរុះរើ និងកាត់ទ្រុងរថយន្តភ្លាមៗ។ ក្រុមការងារបានអនុវត្តវិធានការរួមមាន៖ *សហការបង្ហូរអង្កាមចេញពីរថយន្ត *កាត់ទ្រុងផ្នែកខាងលើ និងទ្រុងបន្ថែមផ្នែកខាងក្រោយ *ណែនាំឱ្យម្ចាស់រថយន្តធ្វើកិច្ចសន្យាចំពោះមុខក្រុមការងារ *យកសម្ភារដែលបានកាត់ចេញ ទៅរក្សាទុកនៅមន្ទីរសាធារណការ និងដឹកជញ្ជូនខេត្តព្រៃវែង។ ការចុះត្រួតពិនិត្យ និងអនុវត្តវិធានការខាងលើ បានបញ្ចប់ដោយជោគជ័យ នៅវេលាម៉ោង២០៖៣០នាទីយប់ នាថ្ងៃខែឆ្នាំដដែល ដើម្បីធានាសុវត្ថិភាពចរាចរណ៍ និងកាត់បន្ថយហានិភ័យគ្រោះថ្នាក់លើដងផ្លូវសាធារណៈ៕