មកទល់ថ្ងៃទី១៨ ខែឧសភា ឆ្នាំ២០២៦នេះ មានរយៈពេលមួយឆ្នាំហើយ ដែលផ្លូវជាតិលេខ១០ ត្រូវបានដាក់ឲ្យបងប្អូនប្រជាពលរដ្ឋប្រើប្រាស់ បន្ទាប់ពីបានស្ថាបនារួចរាល់ជាស្ថាពរ។ អង្គភាពគ្រប់គ្រងគម្រោង,ក្រុមការងារអនុវត្តគម្រោង,ក្រុមហ៊ុនសាងសង់(CRBC),ក្រុមហ៊ុនទីប្រឹក្សាបច្ចេកទេស(ក្វាងចូវ វ៉ាងអាន) និងភាគីពាក់ព័ន្ធ បានចុះពិនិត្យលម្អិតចុងក្រោយ ដើម្បីធ្វើពិធីប្រគល់-ទទួលបញ្ចប់សុពលភាព។ ផ្លូវជាតិលេខ១០ ជាហេដ្ឋារចនាសម្ព័ន្ធមួយខ្សែដ៏មានសារសំខាន់ តភ្ជាប់ពីស្រុកសំឡូត ខេត្តបាត់ដំបង ឆ្លងកាត់ខេត្តពោធិ៍សាត់ ក្នុងភូមិសាស្ត្រឃុំប្រមោយ និងឃុំអូរសោម ស្រុកវាលវែង រហូតដល់ក្រុងខេមរភូមិន្ទ ខេត្តកោះកុង មាន ប្រវែងជាង ១៩៧គីឡូម៉ែត្រ។ ផ្លូវជាតិមួយខ្សែនេះ បានក្លាយជាចរន្តបម្រើដល់សេដ្ឋកិច្ចខេត្តតាមដងផ្លូវ និងជាប្រភពនៃការតភ្ជាប់តាមបណ្តាទិសទេសចរណ៍ផង ដែលនឹងក្លាយជាជម្រើសបន្ថែមសម្រាប់អ្នកទេសចរក្នុងការធ្វើដំណើរកម្សាន្តតំបន់ព្រៃភ្នំ ព្រៃព្រឹក្សា និងខេត្តជាប់សមុទ្រ តារារះទិសនិរតី។ នេះជាការបំពេញយ៉ាងសំខាន់នៃយុទ្ធសាស្ត្របញ្ចកោណរបស់រាជរដ្ឋភិបាលនីតិកាលទី៧ សំដៅពង្រឹងសរសៃឈាមសេដ្ឋកិច្ចបង្កើនចរន្តដឹកជញ្ជូន បង្កើតឱកាសសម្រាប់អ្នកវិនិយោគ និងប្រជាជន។ ផ្លូវជាតិតភ្ជាប់ខេត្តពាយ័ព្យ ទៅកាន់ខេត្តភាគនិរតីនៃប្រទេសកម្ពុជាមួយខ្សែនេះ បានឆ្លងកាត់តំបន់ភ្នំខ្ពស់រាប ជ្រោះជ្រងជ្រលងដងអូរស្ទឹង ព្រៃព្រឹក្សាខ្ពស់ទាប ដ៏ខៀវស្រងាត់គ្រប់រដូវកាល។ ព្រមជាមួយគ្នានេះ ក៏មានស្ពានខ្ពស់ជាងគេ ភ្ជាប់កំពូលភ្នំពីម្ខាងទៅម្ខាង ឆ្លងកាត់ស្ទឹង បង្កើតបានផ្ទាំងទស្សនីយភាពធម្មជាតិដ៏ទាក់អាញក្រៃលែង៕