ខេត្តព្រះវិហារ ៖ ក្នុងស្មារតីបម្រើប្រជាពលរដ្ឋ និងការពារសុវត្ថិភាពសាធារណៈ កម្លាំងចម្រុះនៃក្រុងព្រះវិហារបានចុះប្រតិបត្តិការជួសជុលហេដ្ឋារចនាសម្ព័ន្ធផ្លូវលំដែលរងការខូចខាតយ៉ាងធ្ងន់ធ្ងរ ដើម្បីសម្រួលដល់ការធ្វើដំណើរ និងកាត់បន្ថយគ្រោះថ្នាក់ចរាចរណ៍។នៅព្រឹកថ្ងៃទី០៩ ខែឧសភា ឆ្នាំ២០២៦ វេលាម៉ោង ០៨:៣០នាទី ក្រោមការដឹកនាំផ្ទាល់របស់ លោកវរសេនីយ៍ឯក លី តៃឈន់ អធិការនគរបាលក្រុងព្រះវិហារ ចុះធ្វើប្រតិបត្តិការជួសជុលផ្លូវត្រូវបានធ្វើឡើងយ៉ាងសស្រាក់សស្រាំ។ក្រុមការងារបានសហការគ្នាយ៉ាងសកម្មក្នុងការដឹកជញ្ជូនថ្ម និងដី ដើម្បីចាក់បំពេញលុបជង្ហុកដែលរងការហូរច្រោះដោយសារទឹកភ្លៀង នៅតាមបណ្តោយផ្លូវលំក្រាលគ្រួសក្រហម ទល់មុខវិទ្យាស្ថាន អាស៊ីកម្ពុជា ស្ថិតក្នុងភូមិសាមគ្គី និងភូមិឯកភាព សង្កាត់ប៉ាលហាល។ការយកចិត្តទុកដាក់លើសុវត្ថិភាពគ្រប់តំបន់ លោកអធិការ លី តៃឈន់ បានបញ្ជាក់ថា៖ សកម្មភាពនេះគឺជាកាតព្វកិច្ចចម្បងក្នុងការធានាថារាល់ផ្លូវលំក្នុងដែនសមត្ថកិច្ច ជាពិសេសក្នុងភូមិទាំង ១០ នៃសង្កាត់ប៉ាលហាល ត្រូវតែមានសុវត្ថិភាពសម្រាប់បងប្អូនប្រជាពលរដ្ឋធ្វើដំណើរ។ លោកបានសង្កត់ធ្ងន់ថា៖ មិនថាបញ្ហាអ្វីកើតឡើងនៅក្នុងតំបន់ដែលលោកគ្រប់គ្រងនោះទេ អាជ្ញាធរនឹងចុះអន្តរាគមន៍ភ្លាមៗ។លោកបន្ថែមទៀតថា៖ ការលះបង់របស់កម្លាំងមូលដ្ឋានជាការកត់សម្គាល់ ប្រតិបត្តិការនេះបានបង្ហាញឱ្យឃើញពីការលះបង់យ៉ាងធំធេងរបស់កម្លាំងបញ្ជាការប៉ុស្តិ៍ អាជ្ញាធរឃុំ-ភូមិ និងប្រជាការពារទាំង ១០ ភូមិ ដែលតែងតែឈរជើងប្រចាំការទាំងយប់ទាំងថ្ងៃ។ ស្មារតីទទួលខុសត្រូវខ្ពស់នេះ មិនត្រឹមតែជួយសម្រួលដល់ការរស់នៅប្រចាំថ្ងៃប៉ុណ្ណោះទេ ប៉ុន្តែថែមទាំងបានពង្រឹងសន្តិសុខ និងសុវត្ថិភាពយ៉ាងរឹងមាំជូនសហគមន៍ទាំងមូលផងដែរ៕