សិក្ខាសាលាពិគ្រោះយោបល់ថ្នាក់ជាតិស្តីពី “គោលការណ៍ណែនាំថ្នាក់ជាតិស្តីពីសុវត្ថិភាពចរាចរណ៍នៅតំបន់សាលារៀន” ភ្នំពេញ៖ នាថ្ងៃអង្គារ ទី៣ ខែមីនា ឆ្នាំ២០២៦ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក និង Dr. Anirban Chatterjee នាយករងអង្គការយូនីសេហ្វប្រចាំកម្ពុជា បានអញ្ជើញជាសហអធិបតីក្នុងសិក្ខាសាលាពិគ្រោះយោបល់ថ្នាក់ជាតិស្តីពី “គោលការណ៍ណែនាំថ្នាក់ជាតិស្តីពីសុវត្ថិភាពចរាចរណ៍នៅតំបន់សាលារៀន”។ សិក្ខាសាលាពិគ្រោះនេះមានការចូលរួមពីសំណាក់ ឯកឧត្តម លោកជំទាវ ជាថ្នាក់ដឹកនាំ និងអគ្គនាយកដ្ឋានក្រោមឱវាទក្រសួងសាធារណការ និងដឹកជញ្ជូន ក្រសួងមហាផ្ទៃ ក្រសួងអប់រំ យុវជន និងកីឡា ក្រសួងសេដ្ឋកិច្ច និងហិរញ្ញវត្ថុ ក្រសួងអភិវឌ្ឍន៍ជនបទ ក្រសួងរៀបចំដែនដីនគររូបនីកម្ម និងសំណង់ អគ្គស្នងការដ្ឋាននគរបាលជាតិ មន្ទីរសាធារណការ និងដឹកជញ្ជូនរាជធានីភ្នំពេញ ខេត្តសៀមរាប កាកបាទក្រហមកម្ពុជា សាលារៀនគោលដៅ តំណាងធនាគារពិភពលោក អង្គការជាតិ វិស័យឯកជន និង ដៃគូអភិវឌ្ឍន៍ សរុបប្រមាណ ៧០នាក់។ សិក្ខាសាលាពិគ្រោះយោបល់ត្រូវបានរៀបចំឡើងដោយអគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក សហការជាមួយអង្គការយូនីសេហ្វប្រចាំកម្ពុជា ក្នុងគោលបំណងដើម្បីបង្ហាញសេចក្តីព្រាងគោលការណ៍ណែនាំថ្នាក់ជាតិស្តីពីសុវត្ថិភាពចរាចរណ៍នៅតំបន់សាលារៀន ប្រមូលមតិយោបល់ពីអ្នកជំនាញលើការកែលម្អសេចក្តីព្រាងគោលការណ៍ណែនាំថ្នាក់ជាតិស្តីពីសុវត្ថិភាពចរាចរណ៍ផ្លូវគោកនៅតំបន់សាលារៀន ទទួលចំណេះដឹងអំពីដំណើរការនៃការរៀបចំសុវត្ថិភាពចរាចរណ៍នៅតំបន់សាលារៀន ព្រមទាំងទិសដៅ និងផែនការនៃការប្រើប្រាស់គោលការណ៍ណែនាំថ្នាក់ជាតិស្តីពីសុវត្ថិភាពចរាចរណ៍នៅតំបន់សាលារៀន៕