កិច្ចប្រជុំត្រួតពិនិត្យវឌ្ឍនភាពលើការដាក់ពាក្យបន្តសុពលភាពឆៀក តាមរយៈកម្មវិធីទូរស័ព្ទដៃ (Mobile App) ទីស្ដីការក្រសួង៖ នាថ្ងៃព្រហស្បតិ៍ ទី១២ ខែកុម្ភៈ ឆ្នាំ២០២៦ ឯកឧត្តម នឹម សុធា អនុរដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំកិច្ចប្រជុំត្រួតពិនិត្យវឌ្ឍនភាពការងារលើការអភិវឌ្ឍមុខងារបន្តសុពលភាពឆៀកតាមរយៈទូរស័ព្ទដៃ ដោយមានការចូលរួមថ្នាក់ដឹកនាំអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ថ្នាក់ដឹកនាំអគ្គនាយកដ្ឋានដឹកជញ្ជូនផ្លូវគោក និងមន្ត្រី នៃអគ្គនាយកដ្ឋានទាំងពីរជាច្រើនរូប។ កិច្ចប្រជុំនេះ រៀបចំឡើងក្នុងគោលបំណងដើម្បីពិនិត្យ និងពិភាក្សាលើការរៀបចំលើការអភិវឌ្ឍមុខងារបន្តសុពលភាពឆៀក ដើម្បីផ្តល់សេវាសាធារណៈ របស់ក្រសួងសាធារណការ និងដឹកជញ្ជូន ស្របតាមគោលនយោបាយរបស់រាជរដ្ឋាភិបាល ក្នុងការជំរុញការផ្ដល់សេវាសាធារណៈ និងប្រមូលចំណូលពីសេវាសាធារណៈ តាមរយៈការប្រើប្រាស់ប្រព័ន្ធបច្ចេកវិទ្យាប្រកបដោយភាពងាយស្រួល មានតម្លាភាព និងមានប្រសិទ្ធភាពខ្ពស់។ ឯកឧត្តមអនុរដ្ឋលេខាធិការ បានណែនាំឱ្យក្រុមការងារទាំងអស់បន្តសហការលើកិច្ចការងារអភិវឌ្ឍមុខងារនេះ ឱ្យដំណើរការក្នុងការផ្ដល់សេវាសាធារណៈកាន់តែមានភាពល្អប្រសើរ៕